22
1 Imudhum pem dhali ibaba, kana, ciḵi um gwo jin miga/ ’ce’d um she/ shwane/ mo.
2 Dhali ki uni ciḵki gwo ki a’di oki uni gwo ki ’twaŋ ’Kwani Yahuuda/ mo tani uni ’kokin ki shwam ki muṯṯ mo dhali a’di ki o uni gwo mo ki:
3 Aha/ tana ji Yahuuda/ jin dhodhu mo e Pan Tharsuus gi Paŋ Kilikiyya mo dhali hili aha/ thip̱kunu e bampa/ yan em bwam sho’k ma Ghamala/iil mo be. Dhali aha/ ye’thkunu sho’k ki gwo mo gom mii gi gwoŋḵan jin c̱inu mo kun ta kuny ji sho’k mo ’peni ibabam bana mo be dhali aha/ shwanaa nyor mo goma Arumgimis si’da/ me’d umi ’baar mo kun ’kokin shwanetan mo.
4 Dhali aha/ ṯo’ckina uni kun ta kum Bway yan ’kus mo igam uni wun mo mmodeḵ uni mo dhali mmoc̱i uni eya sijin mo uni kun ta kuŋ gwas mo dhali up̱i lu/ mo.
5 Wakan si’da/ agasiis jin ca’d daḵ gwo me’d ki aha/ mo dhala ris ’kwaniŋ gwanyjaḵa/ ’baar mo ka ŋul ’kup̱ mo. ’Peni uni si’da/ kun bu’thkika/ warka/ eya waḵ yan mo dhali mmoya mo e Pan Dimashk mo mmosus uni si’da/ kun ’kon mo mmun mmosus ki mondeḵ is mmori’c mo e Pa Urushaliim mo be.
ABuulus Ṯorki Mii jin Ṯu’k A’di Is mo
6 Dhali a’di wara’d mo me’d jin dika/ mo e moyam pem mo dhali ’dish Pan Dimashk is mo ka tente/ muru’di di ibwaŋ ’kup̱ mo tani ki jahanne/ adhan moŋkush caaca ’twaḵki mo mo ’peni momis mo mmo’kam aha/ is mo be.
7 Dhali aha/ biṯkina p̱owa ’cesh mo dhali ciḵ ’twa/ jin o aha/ gwo mo ki: Shawuul Shawuul. Ata ṯoca /e aha/ ’kus kan mo?
8 Dhali aha/ thoḵkina gwo mo ki: /E tana ja Tap̱a? Dhali a’di oki aha/ gwo mo ki: Aha/ tana Yesus gi Pa Naasira jin ṯoca /e ’kus mo be.
9 Dhali uni gun ’kokin nyaḵki aha/ mo tani uni mishki moŋkush ka jiŋ gana/ mo tani hili uni ’koki ciḵ ’twa/ gi a’di jin oki aha/ gwo mo be.
10 Dhali aha/ ona gwo mo ki: Ata miga/ mii mo Tap̱a? Dhali Tap̱a oki aha/ gwo mo ki: Cuyi /e mis mo dhali yayi e Pan Dimashk mo dhali e mun mo tani a’di minu ṯor /e mo goma ris to ’baar mo kun thosonkunu gom /e mo mmomii mo be.
11 Dhali ki aha/ mola mo hil gom mondhel gi moŋkush c̱aan mo tani aha/ merkina mo e Pan Dimashk mo mmosuskina uni kun nyaḵki ’ko ki aha/ me’da bi mo.
12 Dhali jan ṯal ’de/ jin ta’da Hananiyya jin ta wathiŋ gayiin gom gwoŋḵan jin c̱inu mo dhali jin maŋ ma ris ’Kwani Yahuuda/ ’baar mo kun ’koni mun mo tani
13 p̱u’dki’di aha/ mo dhali mmodosha a’di mmo’dish aha/ is mo tani a’di oki aha/ gwo mo ki: Akam pem ka Shawuula, budhi momish mo mo ma. Dhali ki mo yansan mo tani aha/ bu’thkina momish mom pem mo dhali aha/ misha a’di mo be.
14 Dhali a’di o’d ka Arumgimis gi ibabam bana iski /e mo mmomish bwam piti mo dhali mmop̱ar mo ma ḵar/e gi jan ’de/ e mo dhali mmociḵ cuuwa/ ’peni ’twam piti mo be.
15 Haali/ /e mini ta aman/o gwo gom a’di eya ris ’kwani gom a’di jin misha /e mo dhali jin ciḵa /e mo si’da/.
16 Dhali shwane/ ata c̱a’ba /e mmomii mo? Cuyi /e mis mo ma dhali miiyi is pini ki yi’de/ mo mmolam miinthus pini mo mmoyer gway piti mo.
ABuulus A’di Yuḵkunu mo gom ’Kwani kun ’Koki Ta ’Kwani Yahuuda/ mo
17 Dhali me’d jin doḵkika/ ka nyaŋ’ko’d mo e Pa Urushaliim mo dhali ki aha/ dikina mmo’tho mo e gu’b gi mondheleladhelel mo tani aha/ biṯkina is jwa mo be.
18 Dhali aha/ p̱arkina a’di e mo mmo/o gwo i aha/ ki: Meri is mo dhali yayi mo ise/ ki jahanne/ ’peni Pa Urushaliim mo haali/ uni mini ’koki bu’th gwonṯor ’peni /e gom aha/ mo be.
19 Dhali aha/ okina gwo mo ki: Tap̱a, uni ki is buni mishkin ki aha/ dhukina uni gun gamki /e gwo is eya sijin mo dhali aha/ dorkina uni eya ris gu’b gi montul isi ’baar mo ki ’beles mo.
20 Dhali ka bas ma Isṯip̱anuus jin ta’da man/o gwom pini diki’d mmowol mo tani aha/ si’da/ doshkina ki ’dishe/ mo dhali gam bwa me’d mo dhali mmodhu burrinye/ gi uni gun ’koshki a’di mo.
21 Dhali a’di oki aha/ gwo mo ki: Yaku/ mo ma haali/ aha/ mina hash /e mo e mo jin si’dasi’d isa dhana/ mo e ’kwani kun ’koki ta ’Kwani Yahuuda/ mo be.
ABuulus A’di Jikunu mo
22 Dhali uni c̱i a’di ’cem buni ki gwo yan mo. Dhali uni ’de’kki ’twam buni mo dhali o gwo mo ki: Guyi ji wakan mo ’peni mony’cesh mo haali/ a’di diki ha me’d jin mina a’di ’taki di ki e mo be.
23 Dhali ki uni cuukin mo dhali ṯa’kki burrinyem buni mo dhali yeḵki bu’da ’ceshi momis mo tani
24 amancil ma askar alip̱ ḵanki gwo ki a’di minu sus mo e gu’b gi i/askar mo mmoḵan gwo ki a’di minu mii ṯirrish ki mondor ki yis bip̱ mo jin mina a’di ’taki mish ki kata yan a’di jin cuuna uni ap̱o/ a’di kan mo.
25 Dhali ki uni deḵki a’di mo ki wac̱kan mo tani aBuulus oki gwo eya mancil ma askar iss ’kwanim pa imudhe’d jin doshki’d ki ’dishe/ mo ki: A’di ta gwoŋḵan ’taa jin mina umi dor wathi/ jin ta ji Pa Ruumiya ki yis bip̱ ki dar gi miiwaḵ kan mo ’taa?
26 Dhali ka mancil ma askar iss ’kwanim pa imudhe’d ciḵki a’di mo tani a’di yaki’d eya mancil ma askar alip̱ mo dhali ṯorki a’di gwo mo mmo/o gwo mo ki: Ata mura /e imii mo? Haali/ wathi/ yan ta ji gi Pa Ruumiya mo be.
27 Dhala mancil ma askar alip̱ p̱u’dki’d mo dhali o a’di gwo mo ki: Ṯoraa/ gwo mo ma, /e ta jim Pa Ruumiya ’taa? Dhali a’di ki o a’di gwo mo ki: Nye.
28 Dhala mancil ma askar alip̱ thoḵki gwo mo ki: Ki dhan to gun tulu ’kup̱ mo tani bu’thkika/ mo mmota jany ’cesh gi bampa/ yan mo. Dhala Buulus o gwo mo ki: Hili aha/ tana jim Pa Ruumiya jin dhodhu mo be.
29 Dhali uni gun ’kokin mmomuri ṯirrish a’di mo tani ise/ uni iikin ’peni a’di mo. Dhala mancil ma askar alip̱ si’da/ ḵo/ki is mo haali/ a’di mishki’d ki a’di ta ji Pa Ruumiya mo haali/ a’di deḵki a’di mo be.
ABuulus Doshki’di Bwambor Montul Is gi ’Kwani Yahuuda/ mo
30 Hili ka cim jiŋ ’ko’d mo tani mmoŋap̱a a’di gwo mmomish gwoŋ ḵa’b yan jin ḵa’bu mo mmoyera ’Kwani Yahuuda/ a’di is ki gway mo tani a’di ’cuḵki a’di mo dhali ḵanki’da gasiis kun can gwo mo dhali ’kwani gi montul is buni yani ’baar mo mmotul isi monṯal ’de/ mo dhali a’di suski’da Buulus ka ’cesh mo dhali kar a’di ibwambori uni mo be.