24
Gwon Dwall jin Dwallkunu Ap̱owa Buulus mo
1 Dhali ’ko’da cim mudhe’d mo tani agasiis jin ca’d jin ta’da Hananiyya p̱u’dki’d ka ’cesh mo nyaḵki ’kwaniŋ gwanyjaḵan tiya mo dhali nyaḵka wa/iŋ gwoŋ kamu/ mo jan ṯal ’de/ jin ta’da Ṯarṯullus mo dhali uni ṯorkina mudhiir gwo eya tente/ ap̱owa Buulus mo be.
2 Dhali ki a’di yuḵkunu mo tani aṮarṯullus ṯelki gwo ’pen mo mmoyer a’di is ki gway mo mmo/o gwo mo ki:
Haali/ gom /e mo tani aman ’kunykina bwa mo ki moŋḵu’th is ki nyanye/ mo dhali gom monthoson pini mo tani tonthus thumu ki ’bore/ gom kal yan mo
3 aman butha a’di em bwayi ’baar mo dhali e mo ’baar mo /e jin ta jim ’borga/ jin tana P̱iliks ki bwa ’baar ki ’bore/ mo.
4 Hili ki aha/ mina diki bul /e ki gwo naskina/ mo tani aha/ ’thona /e ki ji nan pini gom bwa jin tana /e pa mo mmociḵ am gwo ki e ’pe’pere/ mo.
5 Haali/ aman gamkina wathi/ yan jin shwan ma pibi anyor mo dhali aman ḵala wal jin walkunu mo ibwaŋ ’Kwani Yahuuda/ ’baar mo isi mony’ceshi ’baar mo dhala manshu tiya bway gom c̱eŋ ’kwani kun luŋ ji gi Pa Naasira mo.
6 Dhali a’di si’da/ pali mii mo mmodiki kar gu’b gi mondheleladhelel ki jiŋ ḵogu mo dhali a’di si’da/ bu’thkina aman mo dhali aman mina ’taki dwall a’di gwo ki gwoŋḵan bam jin c̱inu mo.
7 Hili amancil ma askar alip̱ jin ta’da Lisiyaas p̱u’dki’d mo dhali ki dhan miim ’bi’th kun caaca mo tani a’di bu’thki a’di mo ’peni bwam me’d bam mo
8 mmoḵan imanyer a’di is ki gway gwo mo mmo/ii ibwambori /e mo, dhali ’peni a’di si’da/ mo tani /e mini mish a’di mo mmoṯirrish a’di ki gwo ki is pini mo mmonyiṯẖ goma ris to gwansani ’baar mo kun yera aman a’di is ki gway mo.
9 Dhali ’Kwani Yahuuda/ si’da/ ’dap̱kin ki gwo ki mo jin yeru a’di is ki gway mo mmogam gwo me’d ki to gwansan ta kuŋ gana/ mo be.
ABuulus ’Ce’dki Gwo She/ Ibwambor ma P̱iliks mo
10 Dhali ka mudhiir wuḵki a’di ki ’kup̱ mo mmo/o gwo mo tani aBuulus thoḵki gwo mo ki:
Haali/ aha/ misha ki /e din ki yil ka ris mmota mandwall gwo gom kal yan mo tani aha/ ki bwam ’boro’d mo tani aha/ mina ’ce’d /e she/ ki gwo mo,
11 haali/ /e mini mish nyiṯẖ ki a’di diki ta acim ’kume’d i’ce’dka su/ ki nyanye/ me’d jin yakika/ ka gagamis mmoluŋ e Pa Urushaliim mo.
12 Dhali uni si’da/ ’koki gam aha/ e gu’b gi mondheleladhelel mmosu’k ki gwo ki wathin ṯal ’deŋ kamu/ walla mmoc̱itha waambuhany ’kwani is ki mii mo si’da/ e gu’b gi montul is buni mo gi mo walla e bampa/ si’da/ mo.
13 Dhali uni si’da/ moli gwo kar ki ji ma du’d e /e gom to gun yera uni aha/ is ki gway mo.
14 Hili yan miga/ ṯor /e mo ki ’ko’di Bway jin yuḵkina uni ki jiny c̱em buni mo tani wakan aha/ miina to goma Arumgimis gi ibabam bam mmogama ris gwo ’baar mo is kun waki gwoŋḵan jin c̱inu mo dhali kun ’kwarkunu e imanc̱i gwo ma Arumgimis kadhamo/ mo
15 mmota ga ’teŋ kape/ eya Arumgimis mo dhali gwohe si’da/ ki is buni hili ’kup̱ ki yan mo, ki mompinu jin midi di mo gom uni kun mii jasi miiŋḵar/e mo dhali uni si’da/ kun ’koki mii miiŋḵar/e mo be.
16 E mii yansan si’da/ mo tani aha/ pira is pem mo mmota gi isi bwaŋ gana/ mmodiki kol ibwambor ma Arumgimis mo dhali ibwambor gi ’kwani isa yempa/ mo.
17 Dhali ’ko’di yil ka ris mo tani aha/ p̱u’dkina mo mmo’do to kun c̱inu gom ’kwani kun hatha’ko’d e kal pem mo dhali to kun c̱inu ki me’d si’da/ mo.
18 E mii gwansan mo tani uni gamki aha/ mo mmothoson is ki dhelel dhelel e gu’b gi mondheleladhelel mo ki dar ga waambuhany ’kwani mo dhali ki dar gi mo ma dulaṯṯ naskina/ mo. Hili ’Kwani Yahuudan tiya kun ’kon ’peni Pa Asiyya mo
19 kun mini ’taki mii ’ko imahan ibwambori /e mo dhali mmomii mo yan jin yeru is ki gway mo waḵki/ uni ta gi toŋ kamu/ ap̱o/ aha/ mo.
20 Walla si’da/ dhalki ’kwani gwansan ki is buni o gwo gom miinthus jana jin gamkina uni mo me’d jin doshka/ ibwambor montul is yan mo,
21 walla isi kan mo gom ’twan ṯal ’de/ yan jin cuuka/ mo mmodoshi bwaman uni mo ki: Gwo gom mompinu ’peni mowu mo tani aha/ yuḵkunu mo gom gwondoṯ ibwambori /e ka tee yan mo.
ABuulus A’di Bu’thkunu e Mo jin Jinuwa Ji mo
22 Hila P̱iliks ki dhal mii e i is mo mmonyiṯẖa a’di ka ji sho’k ki nyanye/ gom Bway yan mo tani a’di si’d uni gwo ’ko’d mo mmo/o gwo mo ki: Ka Lisiyaas jin ta’da mancil ma askar alip̱ midi yayu/ ka ’cesh mo tani aha/ mina mish gwo ki dhegem gom /e mo.
23 Dhali a’di ki c̱i gwoŋḵan eya mancil ma askar iss ’kwanimpa imudhe’d ki a’di minu mii kari mohil mo dhali a’di midi ta gi mo mmoya gi ’kus si’da/ mo dhali minu ’koki non si’da/ ’peni kum pitin tiya mo kun mini iiyu/ i a’di mo.
24 Hili ’ko’da tee gwansan tani P̱iliks p̱u’dki’d nyaḵka Durusilla jin ta ashim piti jin ta’da ’Bom Yahuuda/ mo, dhali hashki’da Buulus mo dhali ciḵ gwo ’peni a’di mo gom gwo jin gamu is eya Yesus Ḵrisṯẖos mo.
25 Dhali me’dyin ṯorkina a’diya ṯor ka rem ’kup̱ gom mo ma ḵar/e mo dhali mo jin ’timuwa du mo dhali gom gwo miiwaḵ jin midi yayu/ yilaŋ kamu/ mo tani P̱iliks ḵo/ki is mo dhali thoḵki gwo mo ki: Yayi ibway pini shwanetan mo ma dhali ki aha/ mina ta gi embul jin ’boro’d mo tani aha/ mina yuḵ /e i aha/ mo.
26 A’di ṯoshki’d si’da/ ka guurush min ma Buulusi ’taki c̱i a’di mo. Gom a’di gi wakan si’da/ mo tani a’di hashki a’di gwo ki ye’th ye’th mo dhali mmobuṯi nyaḵki a’di mo.
27 Hili ki yila su/ kun thimkin mo tani P̱iliks garr ma Purkiyuus P̱asṯuus i embul piti mo dhali mmo/o bwa mmogam momaŋ ’peni ’Kwani Yahuuda/ mo tani P̱iliks dhalki’da Buulus ki mondeḵ is mo be.