28
ABuulus Diki’d eya Uḵa ’Cesh gi Pam Maliitha mo
Dhali ki aman yekina mo tani ŋ’ko’d aman nyiṯẖkina a/uḵa ’cesh yin jin ta a’di jin yuḵu ka Maliitha mo. Dhali ’kwani gun ’koki wal ’twaŋ Griḵi mo ṯorki aman mii kun muma uni mo haali/ uni ’thaki o’d mo dhali bu’thki amani ’baar mo ’kup̱ ki is buni mo haala sho’k di’d mmowol yi’de/ mo dhali haali/ mo ’thup̱a’thup̱ mo be. Hili ka Buulus tulki c̱iŋkira/ is imonṯal ’de/ mo dhali dhu uni e o’d jin shwa’d mo tani tashan ’thi p̱u’dki’d ka pije/ gom mom ’batha’d mo dhali ’tampal a’di i’bame’d piti mo. Dhali ki ’kwani gun ’koki wal ’twaŋ Griḵi p̱arki ari to/e jin ta ga ac̱i/i cine/ mmoshir ka ’cajala/ ’peni me’d piti mo tani uni oki gwo ka rem ’kup̱ mo ki: Wathi/ yan de ita’da man’kosha mee mo be. A’di bala yeki’d mana ’pena dhan yi’de/ mo tani mo jin miinu ka ḵar/e non a’di mmodi ki e mo be. Bahili a’di biṯki to/e isi o’d jin shwa’d mo dhali a’di diki bu’th mo/isa nyor mo. Hili uni c̱orki a’di ki a’di mina isi ’taki dhe’th mo walla mmomina jwa ’taki ḵal a’di mmobiṯ e me’d mo. Dhali ki uni ’kokin ki rash rash mo mmoc̱or a’di mo dhali mmohila uni ki tonthusa kamu/ diki p̱u’du/ i a’di mo tani uni woṯẖa bwam buni ’kup̱ mo dhali o gwo mo ki a’di ta’da rum mo be.
Dhali e moŋ gu’b kun tulu ’kup̱ e mo yan mo tani mo ’kon gun ta ji gi wathi/ ma ’kaŋ’kup̱ ma uḵa ’cesh yan jin yuḵkunu gway ka Publiyuus mo. A’di bu’thki aman mo dhali dhu am mmo/ish mo ka cimi kwara mmota yilkina/ mo. Dhali a’di wakan si’da/ ki CoPubliyuus ishki ’ko’da ’cesh mmo’batha a’di is ki ’ba’th dhali mmo’thi mo. A’di jin yan ma Buulus nycine/ mo dhali mmo’tho mo dhali mmodhu me’d piti ap̱o/ a’di mo mmowac̱ a’di mo. Dhali ki mii yan miikunu mo tani kun tiya si’da/ kun ’kosha ’batha tiya eya uḵa ’cesh yan mo tani p̱u’dkin mo dhali uni ’kokunu mo mmowac̱ si’da/ mo be. 10 Uni si’da/ taḵki aman gi montaḵ ka ris mo dhali ki aman ’cuḵkina ḵur yi’de/ jin bela ’tham mo tani uni dhu to gun mina am mii ’taki mii ta eya ḵur yi’de/ jin bela ’tham mo.
Buulus Merki’d e Pa Ruumiya mo
11 Dhali ’ko’da ppe ’kup̱i kwara mo tani am ’cuḵkina ḵur yi’de/ jin bela ’tham mo jin ta ji gi Pa Iskandariyya mo jin ’baarki’da ppe gi mondiṯ eya uḵa ’cesh yan jin ta gi jamasa ’de/ jin ta isa kam su/ mo. (Ikam gi uni su/ gwansan ta iya/ ma Sap̱s jin ta com to gun luŋa ’Kwaniŋ Griḵi mo dhali iya/ gwansan iyuḵu gway ka Kasṯuur mo dhala P̱olok mo dhali imanmiiya ḵur yi’de/ ki luŋ uni me’d imanshu uni bway e bway yi’de/ mo.) 12 Dhali mmotakina aman Pan Sirakuusa gi me’d mo tani aman ’kokina mo imun ka cimi kwara mo. 13 Dhali ’peni mo yan mo tani aman kukulkina bway mo dhali aman merkina e Pa Righiyuun mo dhali ’ko’da cim ’de/ mo tani ’tham gi ’bana biny cam poshki’d mo, dhali ’ko’da cim jiŋ ’ko’d mo tani aman p̱u’dkina e Pam Puthiyuuli mo 14 e mo jin gamkina amana waḵ bam mo dhali aman ṯu’ckunu mo mmo’ko nyaḵki uni ka cim pesu/ mo. Dhali wakan mo tani am p̱u’dkina e Pa Ruumiya mo be. 15 Dhali ’peni mo yan tani awaḵ bam, ki uni ciḵki gwo gom aman mo tani, uni iiyin mo mmoraḵ am ibway mo ntagi Mo ma Suug gi Pa Appiyuus mo dhali Mo gi Gu’b Yilkina/ Ikwara mo be. Dhali ka Buulus mishki uni mo tani a’di maŋki’da Arumgimis mo dhali bwa ta a’di wathimpa mo be. 16 Dhali ki aman cic̱kina e Pa Ruumiya mo tani Buulus dhalkunu bway mo mmoc̱a’b a’di ’de/ nyaḵka askar jin ji a’di mo be.
ABuulus A’di C̱iki Gwo e Pa Ruumiya mo
17 Dhali ’ko’da cim kwara mo tani a’di yuḵki uni mo mmotul is imonṯal ’de/ mo uni gun tana ’kaŋ’kup̱ gi ’Kwani Yahuuda/ mo dhali ki uni ’kokin mmotul isi monṯal ’de/ mo tani a’di oki gwo i uni mo ki: Aha/ ma waḵ bum, aha/ bala miikina toŋ kamu/ ap̱oŋ ’kwani yisa walla ap̱o/ mii gi ibabam bana bala aha/ c̱ikunu ’peni Pa Urushaliim mo mmota habuus e me’d gi ’Kwani gi Pa Ruumiya mo. 18 Dhali ki uni ṯirrishki aha/ ki gwo mo tani uni ona bwa ki kar aha/ ki ’kus mo haali/ mo jin yeru aha/ is ki gway mo diki ta ’pemen jin midi ta ji gi mowu mo. 19 Hili ki ’Kwani Yahuuda/ oki gwo ap̱o/ a’di mo tani aha/ ṯu’ckunu mo mmoyip̱ ’kup̱ ’kup̱ ka Kaysar mo, yisa mmotaka/ gi toŋ kamu/ jin miga/ yer ’kwani gi kal pem is ki gway mo yisa. 20 Haali/ gom moyer is ki gway yan tan a’di iyuḵkika/ um mmop̱araa/ e mo dhali mmoṯora ṯor nyaḵki aha/ mo haali/ goma ’teŋ kap̱e/ gi ’Kwani ma Israyiil mo tani aha/ deḵkunu ka jindhiir yan mo. 21 Dhali uni oki gwo i a’di mo ki: Aman ’kokina ki bu’th gwo jin ’kwarkunu ’peni Pa Yahuudiyya gom /e walla ṯal ’deŋ kamu/ ’pena waḵ pini yisa di’da jin p̱u’dki’d imahan mo dhali mmoc̱i gwo walla mmo/o gwon tonthusa kamu/ ’de/ gom /e mo. 22 Hili aman ona ki a’di ’boro’d mmociḵ gwo ’peni /e a’di jin di /e i bwa wakan mo. Haali/ gom gwo gi c̱e yan mo tani a’di mishu mo ibwam aman ki gwo jin onu ap̱o/ a’di e mo ’baar mo.
23 Dhali ki uni karkina cim gom a’di mo tani uni ṯẖa’thkin i a’di mo e mo jin c̱a’bkina a’di mo. Dhali a’di ṯorki uni gwo eya tente/ mo mmoc̱i gwo gom Bampa/ ma Arumgimis mo dhali mmolal uni sho’k ki gwo mo goma Yesus mo ’peni gwoŋḵan ma Musa jin c̱inu mo dhali gwo gi imanc̱i gwo ma Arumgimis kadhamo/ mo si’da/ ’peni mon’thamo/ ntagi mom’peŋḵaskum mo be. 24 Dhali kun tiya gamki to gwan is mo kun ’kokunu mo mmo/oku mo dhali gun tiya ’koki gam gwo is mo be. 25 Dhali ki uni ’koki gam bwa me’d mo e bwam uni ’cena mo tani uni iikin mo, ’ko’da Buulus oki jasi gwoŋ kamu/ ṯal ’de/ mo ki: Gwo ona Shi/in Dheleladhelel ki ’bore/ eya Ishaya ka ji sho’k jin ta’da manc̱i gwo ma Arumgimis kadhamo/ mo ibabam bum mo 26 mmo/o gwo mo ki:
Yayi /e mo ma e ’kwani gwansan mo dhali oyi gwo mo ki:
Mmociḵa um a’di ki ciḵ gana/ mo tani um mini mol a’di ’ban ki tash tash mo
dhali um mini par a’di e ka jiŋ gana/ mo tani um mini mol a’di nyiṯẖ ki ’bil ’bil mo.
27 Haala duŋ ’kwani gwansan dhethadhe’th mo
dhali ’cem buni usa us ki pintir mo mmociḵ gwo mo
dhali em buni mu’thkina uni mo
isi ciki/ ki uni mini ’taki nyiṯẖ ki em buni mo
dhali ciḵ ki ’cem buni mo
dhali mish gwo ’ban eya dum buni mo
dhali ’taki ṯu’k ’kup̱ ki aha/ mo
jin miga/ ’taki wac̱ uni mo be.
28 Dhalki a’di mishu si’da/ mo e um ki mowoṯẖ yan ’peni Arumgimis hashkunu mo e ’kwani kun ’koki ta ’Kwani Yahuuda/ mo. Ki uni mini ciḵ si’da/. 29 Dhali ki a’di oki gwo gwansan mo tani ’Kwani Yahuuda/ iikin mo mmosu’kkina uni ki gwo ki nyanye/ e bwam uni ’cena mo be.
30 Dhali a’di c̱a’bki’d mmo’baar yil su/ mo e gu’b pitiŋ gana/ jin c̱ikina a’di aguurush mo mmoc̱a’bi cine/ mo dhali a’di bu’thki uni ’baar kun iiyini a’di mo be, 31 mmoc̱i gwo gom Bampa/ ma Arumgimis mo dhali mmoṯor to gom Tap̱a Yesus Ḵrisṯẖos ki dar gi monyju/i ’baar mo dhali wathi/ p̱iyi’d jin ’tashki a’di ’twa/ mo be.