4
Buṯerus dhala Yohaan Uni Doshkini Bwambor Montul Is gi ’Kwani Yahuuda/ mo
1 Dhali ki uni ’kokin mo mmo/o gwo i ’kwani mo tani igasiis dhali tap̱a jin ca’d gi imanhil gu’b gi mondheleladhelel mo dhali ’Kwani Sadukiyiin iiyini uni mo
2 mmo’kon ma du uni ki mur mo haali/ uni ṯor ’kwani gwo mo dhali uni o gwo eya tente/ si’da/ ki mompinu ’peni mowu di’d eya Yesus mo.
3 Dhali uni bu’thki uni dhali dhu uni mo mmoji uni ntaga cim jiŋ ’ko’d mo haali/ mo ta mom’peŋḵaskum mo.
4 Hili uni ’kon ka ris ’peni bwam uni kun ciḵ gwo mo uni kun gam gwo is mo dhali mondeŋ gi gwas warki’d ki mondeŋ jin wana e ka alaap̱i mudhe’d mo be.
5 Dhali a’di warki’d ka cim jiŋ ’ko’d mo, ki tap̱am buni dhali ’kwaniŋ gwanyjaḵam buni dhali iman’kwar tom buni nyaḵ is tuli monṯal ’de/ mo e Pa Urushaliim mo.
6 Dhali Hanaan jin ta’da gasiis jin ca’d diki’d imun mo dhala Kayaap̱a mo dhala Yohaan mo dhala Iskandar mo dhali uni ’baar mo kun tana bas ma gasiis jin ca’d mo.
7 Dhali ki uni dhu uni ibwaŋ ’kwani mo tani uni ki doṯ gwo mo ki: Yan miikina um ki mom’bi’th jana mo walla ki gway maja mo?
8 Dhala Buṯerus mmo’tu’dkina Shi/in Dheleladhelel a’di mo tani a’di ki o uni gwo mo ki: Um tap̱aŋ ’kwani mo dhali ’kwaniŋ gwanyjaḵa/ mo,
9 waḵki/ am ka cim yaase ṯirrishu ki gwo mo gom miim ’boro’d jin miikunu mo gom wathi/ jin dumpulki ya mo tani dhali ki mii ja ŋala/ wac̱u/ wathi/ yan mo tani
10 dhalki a’di mishu mo ibwam umi ’baar mo dhala ris ’Kwani ma Israyiili ’baar si’da/ mo ki gway ma Yesus Ḵrisṯẖos gi Pa Naasira mo tani jin ’kosha um ki cwany’ciṯẖan dhul mo dhali jin ’de’kkin ma Arumgimis mo ’peni mowu mo tani e a’di yan tani wathi/ yan doshki’di mahan ibwambori um ki mowac̱ is mo be.
11 A’di ta wosh jin karkunu ki dhan wosh gi ’pena bi mo wosh yan jin ushkina um ki ’tash mo, um kun ta imannyaŋ gu’b mo.
12 Dhali mowoṯẖ yisa di’da e wathiŋ kamu/ yisa haali/ gwaya kamu/ yisa di’da i’bame’d momis jin c̱inu ibwaŋ ’kwaniny’cesh ki ana minu mii woṯẖ mo e a’di mo be.
13 Hili ki uni p̱arkina Buṯerus dhala Yohaan e mo ki uni ’koki ju/ ’kwani mo tani dhali gam gwo ki uni ’koki ta ’kwani kun ’kon mmohila warka/ mo dhali ki uni si’da/ ta ’kwani gun moli to tani uni merkin kagahara mo. Dhali uni nyiṯẖkin ki uni nyaḵki ’ko ka Yesus mo.
14 Dhali mmomisha uni wathi/ jin wac̱u/ mo mmodosh nyaḵki uni mo tani uni moli gwoŋ kamu/ o ap̱o/ a’di mo.
15 Hili ki uni ḵanki uni gwo mo mmo/ii ka pije/ ’peni montul is buni yan mo tani uni ki ṯora ṯor ka rem ’kup̱ mo
16 mmo/o gwo mo ki: Ana mina miiya ta ki ’kwani gwansan sa/? Haali/ ka jiŋ gana/ a’di ṯoru eya tente/ ibwam uni ’baar kun ’kon e Pa Urushaliim mo ki miimer jin misha ’kwani ’baar mo miikunu mo e uni mo dhali ana mola a’di waṯ mo be.
17 Hili jin mina a’di diki p̱ala ibwaŋ ’kwani naskina/ mo tani dhalki ana ḵana uni gwo ki ’bi’th mo ma, gom to kun mina ana ’taki mii ap̱o/ uni mo jin mina uni ’koki ṯor wathiŋ kamu/ ṯal ’de/ gwo mo e gway yan ’peni mo yan ki sule/ mo be.
18 Dhali uni yuḵki uni mo dhali ḵan uni gwo ki uni mini tuḵ gway ma Yesus yan ki sule/ ki sule/ mo mmo’koki ṯor gwo mo walla c̱i gwo ki gway ma Yesus mo.
19 Buṯerus dhala Yohaan thoḵki gwo mo dhali o uni gwo mo ki: Waḵki/ a’di ’boro’d ibwambor ma Arumgimis mo mmoha gwom bum e mo dhali ush ji ma Arumgimis ha e mo tani ’cunycuri um mo ma,
20 haali/ am mina mol gwo ush mmoṯor gom to kun mishkina aman mo dhali kun ciḵa aman mo.
21 Dhali uni, ki uni o uni ki ’bi’th doḵ/e gom to gun mina uni ’taki mii mo tani uni dhalki uni mo mmo/ii mo mmomola uni bway mmogam mo mmoc̱i uni ajisa gom ’kwani mo haala ris ’kwani ’baar mo karkina Arumgimis ki ca mo gom a’di jin miikunu mo be.
22 Haali/ wathi/ yan taki’d gi yili issu/ i/ur ’kup̱ mo jin miikunu miimer i a’di mo be.
Imangam Gwo Is Uni ’Thokin mo ki Dar gi Monyju/ mo
23 Dhali mmodhalu uni bway mo mmo/ii mo tani uni iikin c̱em buni mo dhali lolop̱ki gwo ’baar mo kun okina igasiis kun can dhali ’kwaniŋ gwanyjaḵa/ uni mo be.
24 Dhali uni, ki uni ciḵki a’di mo tani uni ’de’kki ’twam buniya Arumgimis ki bwan ṯal ’de/ mo dhali o gwo mo ki: Ayy Tap̱a, /e jin uḵki momis mo dhali mony’cesh mo dhali dhan ḵumma/ yi’de/ mo dhala ris to ’baar kun ’kon ibwaman uni mo,
25 /e jin o gwo ki Shi/in Dheleladhelel ki ’twa/ ma babam bam ka Dawuu’d jin ta c̱iŋkinam pini ki:
Ata miina ’kwani kun ’koki ta ’Kwani Yahuuda/ apure/ mo,
dhala ris ’kwani kulum to ka wuny is ibwa kan mowa?
26 Tap̱any can gi ’kwaniny’cesh doshkin ki is buni ki ’dishe/ mo
dhali itap̱a tuli isi monṯal ’de/
ap̱o/ Tap̱a mo dhali ap̱o/ a’dim piti jin ta’da Ḵrisṯẖos si’da/ mo.
27 Haali/ ki gwoŋ gana/ e pa yan ap̱o/ c̱iŋkinam pini jin ta’da Yesus a’di jin karu ki she/ gi dhelel dhelel jin kara /e Tap̱a tani Hirodus uni ka Punthi Bilaaṯus nyaḵki ’kwani kun ’koki ta ’Kwani Yahuuda/ mo dhali ’Kwani ma Israyiil si’da/ mo tani uni ’baar mo nyaḵ is tuli monṯal ’de/ mo
28 mmomii a’di yin ki me’d pini mo dhali ki bwam pini jin onu isi ṯwa/a/ ṯwa/a/ innii mo midi war kansan mo be.
29 Dhali shwane/ Tap̱a, hiliya p̱o/ gwo gun ona uni ki ’bi’th gom to kun mina uni ’taki mii ap̱o/ aman mo dhali c̱iki c̱iŋkinam pini ’bi’th mo ma mmo/o gwom pini ki dar gi monyju/ ’kwani mo
30 me’dyin hedha /e abim pini mmomii miiwac̱ mo dhali ki momer mo dhali dhan mii kun caaca kun minu mii ki gway gi C̱iŋkinam pini jin ta’da Yesus jin karu ki she/ gi dhelel dhelel mo.
31 Dhali ki uni ’thon mo tani mo yiḵinki is mo e mo jin tula uni is nycine/ mo dhali uni ’baar mo ’tu’dkunu mo ki Shi/in Dheleladhelel mo dhali uni oki gwo ma Arumgimis ki dar gi monyju/ ’kwani mo be.
Aris To ’Baar mo Gamu Me’d mo
32 Dhala waambuhany ’kwani ’peni bwam uni kun gam gwo is mo ’kon ka dun ṯal ’de/ mo dhali ki bwan ṯal ’de/ si’da/ mo. Dhali jamu/ yisa di’da i bwam uni jin o ki toŋ kamu/ ṯal ’de/ jin tana a’di mo tani ta jim piti ki is piti a’di ’de/ mo. Hili uni dhuna ris to ’baar mo imonṯal ’de/ mo.
33 Dhali gwo gi mom’bi’th caaca mo tani imandhun ma Yesus ki she/ c̱i gwonṯor buni gom mompina Tap̱a Yesus ’peni mowu mo dhala ’the caaca c̱a’bki’da p̱o/ uni ’baar mo be.
34 Haali/ wathiŋ kamu/ yisa di’da ibwam uni jin hara toŋ kamu/ yisa haali/ uni kun ta imanta gi mo mo walla gu’b mo tani uni ki yol uni mo dhala guurush ’doyina uni ki she yol mo be
35 dhali dhu uni isho’k gi imandhunu ki she/ mo dhali to ḵwa/u bwa mo ka ’deṯe/ ’deṯe/ me’d jin mina wathiŋ kamu/ mii ta gi to mo be.
36 Dhala Yuusup̱ jin yuḵa imandhun ma Yesus ki she/ ki gwaya kamu/ ka Barnaaba (ki ’twam buni jin onu ki: ya/ gi momalas mo) jin ta Wathi/ Lawi jin ta wathi/ gi Paŋ Kuprus mo tani
37 mmotana a’di gi mombunto mo tani a’di yolkina a’di mo dhala guurush ’doyina a’di mmodhu isho’k gi imandhunu ki she/ mo be.