3
Imannyaḵa Ṯu’c Mii goma Arumgimis mo
1 Hili iwaḵ mo, aha/ mola gwo o e um mo me’d ’kwani kun ta gi to gi shi/in mo, hili me’d ’kwani kun ta ku gi buŋgwar is mo, me’d usha ŋa/ eya Ḵrisṯẖos mo be.
2 Aha/ c̱ina uma ko mo mmop̱i mo, yisa tonṯe/ jin ta jiŋ ḵa’c mo. Haali/ um ’koki thoson is gom a’di mo. Dhali isi kani um naskina/ ’koki thoson is gom a’di mo be.
3 Haali/ um ’kon mmo’ko mo naskina/ gom buŋgwar is mo. Haali/ kan mo, mo jin tanu dhap̱an di’d naskina/ e um mo dhali mo jin biruwa bir e bwaman um mo tani ’kona um ki ta ku gi buŋgwar is mo ’taa? dhali mmomii to me’d ’kwani kun ’konuki aḵ mii e mowa?
4 Haali/ wathiŋ kamu/ ki o gwo mo ki: Aha/ tana ji ma Buulus mo, dhali jaŋ kamu/ ki o gwo mo ki: Aha/ tana ji ma Abulluus mo be, ’kona um ki ta ’kwani gi mony’cesh mo ’teya?
5 Ka Abulluus ta’da ta mo? Dhali aBuulus ta’da ta mo? Uni ta c̱iŋkina/ kun gamkina um gwo is nycine/ mo me’d mii gi Tap̱a mo mmodhukina a’di uni ka ’deṯe/ ’deṯe/ mo.
6 Aha/ sikina to mo tani, Abulluus a’di wolki to yi’de/ mo, hili Arumgimis a’di c̱iki mo jin ’twaḵa to mo be.
7 Wakan si’da/ a’di jin siki to mo walla a’di jin wolki to yi’de/ mo tani uni ta toŋ kamuwa? hili Arumgimis a’di ’de/ mo a’di c̱iki mo jin ’twaḵa to mo be.
8 A’di jin siki to mo dhali a’di jin wolki to yi’de/ mo tani uni nyaḵkin mo be, dhali uni ka ’deṯe/ ’deṯe/ mini bu’th to jin miikina uni to mo isi me’d shemen miim buni mo be.
9 Haali/ ana tana ci kun nyaḵ to mii goma Arumgimis mo be. Um ta mondhe’d ma Arumgimis mo, mo jin nyaŋ ma Arumgimis mo be.
10 Isi ki gwo ma ’the ma Arumgimis jin c̱ikunu aha/ mo tani me’da man’kawur gu’b mo jin tana me’d piti gwocon mo tani aha/ ’thikina mo jin ḵa’bu/ mo dhali wathiŋ kamu/ nyaŋki to ap̱o/ a’di mo. Dhalki ’kwani ka ’deṯe/ ’deṯe/ hilin ki ’bore/ mo, a’di jin minu nyaŋ ap̱o/ a’di mo be.
11 Haali/ moŋḵa’buŋ kamu/ yisa di’da jin mina wathin ’deŋ kamu/ i’thi to kan ap̱o/ mo jin ’thikunu mo, a’di jin ta’da Yesus Ḵrisṯẖos mo be.
12 Dhali waḵki/ wathiŋ kamu/ midi nyaŋ to ap̱o/ moŋḵa’b ki ’dolkon gana/ mo dhali ’dolkon kush mo dhali wosh kun ta kun dhel mo dhali cwa mo dhali ḵun’tush mo dhala wusha mo tani
13 arisa ṯu’c gi ’kwani ka ’deṯe/ ’deṯe/ mo tani uni minu ṯor eya tente/ mo. Haala tee midi this a’di ṯor mo haali/ a’di minu ṯor eya tente/ ki o’d mo, dhali o’d a’di midi pala ris e ma ṯu’c kun miina ’kwani ka ’deṯe/ ’deṯe/ mo be.
14 Waḵki/ aṯu’c jin miina wathi/ mmonyaŋ to ap̱o/ mo jin ḵa’bu/ mo midi ṯel mo tani a’di midi bu’th to jin ishki ḵumma/ mo be.
15 Waḵka ṯu’c gi wathiŋ kamu/ c̱ithu/ ki o’d mo tani a’di midi this tom piti e mo. Bahili a’di ki is piti mo tani a’di iminu ta is ki me’d mo, hili a’di mina e wa gi mo jin boruwa bor mo ’peni ’twa/ o’d gana/ mo be.
16 ’Kona um ki misha ki um ta monyc̱a’b ma Arumgimis mowa? dhali Shi/in Dheleladhelel ma Arumgimis di’d e umi.
17 Waḵki/ wathin ’deŋ kamu/ midi shi/ monyc̱a’b ma Arumgimis mo tani Arumgimis midi ’ce’d a’di sho’k mo be. Haali/ monyc̱a’b ma Arumgimis mo tani a’di ḵogu mo dhali monyc̱a’b c̱aan jin c̱a’ba a’di mo tani a’di ita um mo be.
18 Wathin ’deŋ kamu/ midi mii dhalku/ ki he’k is piti e mo. Waḵki/ wathin ’deŋ kamu/ e bwaman um ṯoshki’d ki a’di yuḵayuḵ mo e embul yil yansan mo tani dhalki a’di wara’d ki p̱us mo ki a’di midi ’taki war ki wathi/ jin yuḵayuḵ mo be.
19 Haali/ moyuḵ gi mony’cesh yansan mo tani uni ta e ma p̱ali/ mo goma Arumgimis mo be. Haali/ a’di ’kwarkunu mo ki: A’di bu’thki uni gwansan kun yuḵayuḵ mo eya maḵ buni jin ishkina uni agany mo be.
20 Dhali doḵ/e a’di ’kwarkunu mo ki: Tap̱a a’di mishki gwo kun kuluma ’kwani kun yuḵayuḵ ibwa mo kun ta gwo kun ta p̱e’th mo.
21 Wakan wathin ṯal ’deŋ kamu/ midi mii dhalku/ ’ba/ ki kar ki ca mo gom ’kwani mo be. Haali/ aris to ’baar mo ta kum bum mo be
22 waḵki/ ta ji ma Buulus mo walla ji ma Abulluus mo walla Sap̱a mo walla mony’cesh mo walla mondiki/e mo walla mowu mo walla mo kun ’kon shwane/ mo walla mo kun mini ’ko yilaŋ kamu/ mo tani aris to gwansani ’baar mo tani uni ta kum bum mo be.
23 Dhali um ta ku ma Ḵrisṯẖos mo dhali Ḵrisṯẖos ta ji ma Arumgimis mo be.