7
Gwo jin Ṯoco’d Isi gom Gwo gi Miimash mo
1 Dhali isi gom gwo gun baṯẖu mo gom gwo kun ’kwarkina um mo tani a’di ta shi/ miim ’boro’d mo jin mina wathi/ diki ’disha ’bom is mo ba/.
2 Hili gom mompal gi mo jin miinu miinyc̱al mo tani ’kwaniŋ gwaṯẖ ka ’deṯe/ ’deṯe/ mini mii ta gi up̱ buniŋ gana/ mo dhali up̱ ka ’deṯe/ ’deṯe/ mo tani mini mii ta gi ikaṯẖim buniŋ gana/ mo.
3 Wathiŋ gwaṯẖ midi mii kar ashim piti ki kar ’pempaŋ gana/ mo dhali wakan si’da/ ashim piti midi kara kaṯẖim piti ki kar ’pempaŋ gana/ mo be.
4 Haala ’bom midi mol ta tap̱a gom buŋgwar is pitiŋ gana/ mo, hili wathiŋ gwaṯẖ a’di ita’d mo. Wakan si’da/ wathiŋ gwaṯẖ midi mol ta tap̱a gom is pitiŋ gana/ mo, hili a’bom a’di ita’d mo be.
5 Dhalku/ ki ush ka rem ’kup̱ mo, isi ciki/ wari ki gwo jin gamu me’d mo gom ari mo mo, ki um mini mii ga/ is bum mo mmo’tho mo. Dhali hili gam is mmonṯal ’de/ ŋ’ko’d mo isi ciki/ ka Seṯaan midi diki pal um mo mmo/aṯẖa um mo jin ’timuwa du mo.
6 Aha/ ona gwo yansan ki sheshkon mo, yisa mmoḵan gwowa.
7 Aha/ onayi ka ris ’kwani ’baar mo mini ’taki wa e ki aha/ ki is pem mo. Hili aris ’kwani ’baar ka ’deṯe/ ’deṯe/ mo uni takin gi to gun c̱ikunu ki me’d mo ki ji mum mo ki is buni mo ’peni Arumgimis mo, jan ṯal ’deŋ kamu/ ki ji en ’deŋ kamu/ mo dhali jaŋ kamu/ ki ji en ’deŋ kamu/ mo.
8 E ’kwani kun ’koki mash mo dhali up̱ kun wuna ikaṯẖim buni mo tani aha/ ona ki a’di ta shi/ miim ’boro’d gom uni mmo’ko kan ki lac̱a/ mo me’d aha/ mo be.
9 Hili waḵki/ uni molona du bu’th mo mmo’tim mo tani uni mini mii mash mo. Haali/ a’di ’boro’d mmomash mo mmodhal mii e i is mo mmodhu e ki ’thir ’thir gom mon’dap̱ e mo be.
10 Gom uni gun mashkin mo tani aha/ ḵana gwo mo, dhali hili aha/ yisa, Tap̱a mo, ka ’bom midi diki mii ḵwa/ bwa ’pena kaṯẖim piti mo
11 (hili waḵka yim midi mii kan mo tani dhalka yim di’d ki lac̱a/ mo mmodiki mash mo walla si’da/ dhalka yim o gwoŋ gwam mo uni ka kaṯẖim piti mo) – dhali ka kaṯẖ si’da/ midi diki mii thoson gwo mo mmodhal ashim piti ’pen mo.
12 Gom um gun boc̱kin mo si’da/ tani aha/ ona gwo mo, Tap̱a yisa, ki waḵki/ akam ta gi ash mo jin diki gam gwo is mo dhala yim gam gwo me’d mo mmonyaḵ c̱a’b ki a’di mo tani a’di midi mii diki thoson gwo mo mmodhala yim ’pen mo.
13 Waḵka ’boma kamu/ si’da/ ta ga kaṯẖim piti jin dar gi gwo jin gamu is mo tani dhali a’di ki gam gwo me’d mo mmonyaḵ c̱a’b ka yim mo tani ayim midi mii diki mii thoson gwo mo mmodhal a’di ’pen mo.
14 Haali/ wathiŋ gwaṯẖ jin dar gi gwo jin gamu is mo tani a’di karu ki she/ gi jin ḵogu mo gom gwo gi ash mo be. Dhali a’bom jin dar gi gwo jin gamu is mo tani a’di karu ki she/ gi jin ḵogu mo gom gwo ma kaṯẖ mo. Waḵki/ a’di diki wakan mo tani uc̱im bum si’da/ minu dhu gi ku gun ’koki dhelel mo. Hili me’d jin oka/ mo tani uni dhunu me’d ku gun dhelelin moyi.
15 Hili waḵki/ amannyaḵ c̱a’b jin dar gi gwo jin gamu is mo ona bwa mmoḵwa/ bwa mo tani dhalki a’di miinu wakan mo ma. Ki mo gi wakan mo tani akama kamu/ walla ’bwahama kamu/ minu ’koki deḵ mo ki gwo yansan mo. Haali/ Arumgimis yuḵ ana mo gom moŋḵu’th is mo be.
16 A’boma, /e mini diki mish bunya/ waḵki/ /e mini woṯẖa kaṯẖim pini mowa? Wathiŋ gwaṯẖa, mina /e diki mish bunya/ waḵki/ /e mini woṯẖ ashin mowa?
Mii gi Mondiki/e jin Karkina Tap̱a mo
17 Hili dhalki ’kwani ’baar ka ’deṯe/ ’deṯe/ mo shuna shu/um bway mo e mii gun ṯora Tap̱a uni mo mmomii mo dhali e a’di jin yuḵkin ma Arumgimis uni mo mmomii mo. A’di ta gwoŋḵan pem goma ḵaniisa ’baar mo be.
18 Wathiŋ kamu/ di’da ki a’di ’ciṯẖkunuwa munyjal yis mo hila/ me’d jin yuḵkunu a’di mowa? Dhalku/ ki mii dhal a’di bway mo mmoŋap̱ mo mo mmowar mo gi a’di jin dinuki ’ciṯẖa/ munyjal yis mo. Wathiŋ kamu/ di’da jin yuḵkunu mo ki a’di dinuki ’ciṯẖa/ munyjal yis mowa? Dhalku/ ki mii dhal a’di bway mo mmoŋap̱ mo mo jin minu ’ciṯẖa/ munyjal yis mo.
19 Haali/ mo ma munyjal yis jin ’ciṯẖu/ mo tani walla mo ma munyjal yis jin dinuki ’ciṯẖ mo tani mii toŋ kamu/ yisa, hili mmodhu gwoŋḵan ma Arumgimis kun ’kwarkunu mo be.
20 Aris ’kwani ’baar ka ’deṯe/ ’deṯe/ mo mini mii ’ko kan mo e mom buni ki she/ ki she/ mo e mo kun yuḵkunu uni mo be.
21 /E ta c̱iŋkina/ jin yolu mo ki /e yuḵkunu mo ’taa? Dhalku/ di’d kan mo. Hili waḵki/ /e mini ’taki mish gam mom pini jin dina /e ki ’kus mo tani miiyi /e ’te/ ki is pini ’baḵany mo ma.
22 Haali/ a’di jin yuḵkunu mo e Tap̱a mo tani me’d jin tana a’di c̱iŋkina/ jin yolu mo tani a’di ta wathi/ jin di’d ki ’kus mo e Tap̱a mo. Wakan si’da/ a’di jin di’d ki ’kus mo me’d jin yuḵkunu a’di mo tani a’di ta c̱iŋkina/ jin yolu mo jin ta ji ma Ḵrisṯẖos mo be.
23 Um yolkunu mo ki she/ yol jin ’bitha’bi’th mo. Dhalku/ ki mii doḵ/e ta c̱iŋkina/ gi ’kwani kun mini yol um mo.
24 Wakan iwaḵa, aris mo gunn kun yuḵkunuwa yuḵ ka ’deṯe/ ’deṯe/ mo tani dhalki a’di c̱a’ba’d mo nycine/ mo nyaḵka Arumgimis mo.
Ku gi ’Koki Mash mo dhali ku gi Wuna Ikaṯẖ mo
25 Dhali isi gwo gom uni kun ’koki mash mo tani aha/ dara ki gwoŋḵan ’peni Tap̱a mo. Hili aha/ c̱ikina um ayisany pem mo me’d wathin ’de/ jin ta a’di jin taki’d gi momiimii gi Tap̱a jin minu gam is ki isiŋ gana/ mo.
26 Aha/ ṯosha gom mo jin ’konu ka c̱is e buŋ’kus bana shwane/ mo tani a’di ta shi/ miim ’boro’d gom wathi/ mmoc̱a’b mo kan me’d jin c̱a’ba a’di mo be.
27 A/e deḵkunu ki ashin mowa? Dhalku/ ki ŋap̱ bway mo mmodi ki ’kus mo. A/e din ki ’kus mo ’pena ’boma? Dhalku/ mii ki tash mo mmoŋap̱ momash mo.
28 Hili waḵki/ /e ki mash mo tani /e mii miinthus yisa. Dhali waḵki/ nyara/ masha’d mo tani ayim mii miinthus yisa. Hili uni gwansan kun mashkin mo tani uni mina gwo gi mony’cesh ibal is mo mmoṯo’c bwa mo be dhali aha/ ona bwayi mmo’tash a’di ’twa/ ’peni um mo.
29 Hili ’pemen gwo yan jin oka/ mo tani iwaḵa, atee jin karu mo tani a’di kuṯakuṯ mo be. ’Peni shwane/ mo tani dhalki uni gwansan kun ta gi up̱ mo tani ’kon mo kan mo me’d uni gun daran mo,
30 dhali uni gwansan kun gwokin mo tani me’d jin ’kona uni ki ko mo, dhali uni gwansan kun ’kunykina bwa mo tani me’d jin ’kona bwa uni ki ’kuny mo, dhali uni gwansan kun yolki to mo tani me’d jin ’kona uni ki dar gi to mo,
31 dhali uni gwansan kun usi mony’cesh is mo tani me’d jin ’kona uni ki us mony’cesh is ki sule/ mo. Haali/ yir gi mony’cesh yansan di’d mo mmope mo be.
32 Aha/ ŋap̱a um mmo’ko ki ’kus ’peni mo jin ananu is mo. Dhali wathi/ jin diki mash mo tani a’di ananki is piti mo gom to gi Tap̱a mo, ki a’di midi mii mii gun ’bor Tap̱a bwa mo be.
33 Hili wathi/ jin mashki’d mo tani a’di ananki is mo gom to gi mony’cesh mo jin mina a’di mii to mo jin midi ’bor ash bwa mo.
34 Dhali wakan mo tani to gun ḵoca a’di e nycine/ mo tani uni ḵwa/u bwa mo. Dhali a’bom jin diki mash mo walla nyara/ si’da/ mo tani uni ananki is mo gom to gi Tap̱a mo jin mina uni dhu buŋgwar is buni ki she/ mo ki jiŋ ḵogu/ mo dhali shi/in buni si’da/ mo. Hili a’bom jin mashki’d mo tani a’di ananki is mo gom to gi mony’cesh mo jin mina a’di mii to mo jin midi ’bora kaṯẖim piti bwa mo.
35 Aha/ ona gwo yansan gom shi/ miim ’boro’d gom mowoṯẖ bum mo, yisa mmodhu uma nyoḵi ’ba/ mo, hili mmoshush uma du mo ki shush gana/ mo jin mina umi ḵu’th is mo gom Tap̱a mo ki dar gi miiŋ kamu/ mo be.
36 Waḵki/ wathin ṯal ’deŋ kamu/ midi kulum gwo ibwa mo ki a’di diki mii mii kun mini ha me’d mo gom mondosh piti mo tani waḵki/ bwa en’dap̱ piti ’bitha’bi’th mo tani dhali waḵki/ a’di minu mii mii mo tani dhalki a’di mii a’diyi jin o a’di bwa mo. Dhalki uni mashan mo. A’di ta miinthus yisa.
37 Hili ma, a’diyin jin ṯelu sho’k mo mmodosh mo eya dum piti mo tani dhali dar gi mo jin ’deke’thki a’di mo tani, hili si’da/ a’di ta gi bwa mo mmo’tima du mo dhali ta gi gwo ibwa eya dum piti mo gom mii yansan mo tani mmokara yim mo me’d jim piti jin dosha a’di mo tani a’di mii miim ’boro’d mo be.
38 Wakan be, a’di jin mashki’da yim jin dosha a’di mo tani mii’d ki ’bore/ mo ba/. Dhali a’di jin tuḵki mii mash is mo tani a’di midi bol mii e mo.
39 A’bom a’di deḵa gwoŋḵan ma kaṯẖ mo me’d jin din ma kaṯẖ ki e mo. Ayim di’d ki ’kus mo mmomash mo ’ko’di jwa ma kaṯẖ mo e a’di jin o’da yim bwa moyi, hili e Tap̱a mo be.
40 Hili eya yisany pem mo tani ayim a’di mina bwa ’bor ki nyanye/ mo waḵka yim midi c̱a’b kan me’d jin c̱a’b ma yim mo. Dhali aha/ ṯosha si’da/ ki aha/ tana gi Shi/in Dheleladhelel ma Arumgimis mo be.