8
Mii jin C̱inu To ka ’Ka’d Me’di Is mo
1 Aman ŋap̱a um mmomish mo mo iwaḵ mo gom gwo ma ’the ma Arumgimis mo jin ṯorkunu mo eya ḵaniisa ’baar mo e Pam Makiduniyya mo be.
2 Haali/ e mompal gi mo jin ṯocu bwa mo jin eḵa/ eḵ mo tani moŋ’kuny bwam buni jin eḵki’d ki eḵ mo dhali moha’th’ko’d buni jin shwa’da nyor mo tani a’di guski’d ki sho’k piti mo ki pa jin tana uni ki to jin ’ka’da uni me’di is mo ki miim buni mo be.
3 Haali/ uni c̱iki to mo isi ki jim buni jin tana uni mo, me’d gwo jin mishka/ ṯor mo dhali ki tom buni jin ’ce’de’da p̱o/ jin c̱ina uni mo tani a’di ’peni bwam buniŋ gana/ mo be.
4 Uni ’thoki am mo ka dun dara’d mo gom mii ma ’the yan mmonyaḵ to mii mo mmowoṯẖ uni kun dhunu ki she/ ki dhelel dhelel mo.
5 Dhali yansan miikina uni mo, yisa me’d jin ṯoshkina aman mo, hili nṯwa/a/ mo tani uni c̱iki is buni ki Tap̱a mo dhali ki aman mo ki bwa ma Arumgimis mo be.
6 Isi ki gwo gi wakan mo tani aman ṯirrishkina aTiithus ki gwo mo haali/ a’di ṯelki mii ’pen mo hila/ mo tani a’di midi ’taki mii thim mii ma ’the yan e bwam um mo be.
7 Dhali me’d jin ’kokina um imis eya ris to ’baar mo e moŋgam gwo is mo, e mo jin onu gwo mo, e moyuḵ mo, eya risa du gun darkin gi dar mo, dhali e mo/en bum gom am mo tani hili si’da/ ki um mini ’ko imis gom mii ma ’the yansan si’da/ mo be.
8 Gwo yansan oka/ yisa mmoḵana ḵan mo, hili mmonyo/ mii mo ki mii gi cin tiya kun miina uni ka daran du mo ki mo/en bum si’da/ mini ta kuŋ gana/ kun dar ki washila/ mo be.
9 Haali/ um mishkina ’the gi Tap̱a Yesus Ḵrisṯẖos bana mo, ba ki a’di ta pa ki pa mo tani a’di warki’d ka ha’th’ko’d gom gway bum mo. Wakan ki mo ma ha’th’ko’d piti mo tani um mini war ki uni gun ta pa ki pa mo be.
10 Dhali e mii yansan mo jin ’konu ki baṯẖ mo tani aha/ c̱ikina uma yuḵ mo. A’di jin ’boro’d gom um mo mmothim a’di shwane/ mo tani a’di jin ṯelkina um ’pen ki yil ’de/ yin kagush mo, yisa jasi mmomii to ’te/ mo, hili mmo/o bwa mo be.
11 Wakan ki mo/is bum e bwa jin ona um ki mii a’di mo tani mini ’taki ta p̱ar mo ki miim bum jin thimkina um a’di mo ’peni to gun takina um mo be.
12 Haali/ waḵki/ mo jin isu di’d mo tani a’di mishkunu bu’th mo me’d isi to gun takina wathi/ mo, yisa me’d isi to jin darkina a’di yisaa.
13 Aha/ dinaki o gwo yansan ki kun tiya mini ’taki ta gi mii gun ’disha’dish abor mo dhali uma tiya mmoḵal to kun diṯadiṯ mo.
14 Hili mmonyaḵa nyaḵ to mo, gom tom bum gun ishkin ka enthus mo shwane/ e mo yan mo tani mini ’taki thip̱a thip̱ mo gom tom buni gun hara uni mo, wakan ki tom buni gun ishkin ka enthus mo tani mina uni ’taki thip̱ um ki to gun hara um mo, wakan ki mo jin nyaḵu to midi di mo be.
15 Me’d gwo jin ’kwarkunu mo ki: A’di jin kwanyki to ki nyanye/ mo tani dara’d ki ji gi uri ’kup̱ mo dhali a’di jin kwanyki’d ari’ceenne/ mo tani yisa hara toŋ kamuwa.
Tiithus dhali Kum Piti kun Nyaḵ A’di Ii mo
16 Hili c̱iyi mo jin ’boruwa ’bor bwa i is mo eya Arumgimis mo a’di jin karki bwa jin onu ka daran du mo mmohila hil mo gom um eya du ma Tiithus mo be.
17 Haali/ a’di yisa ibu’thki miiŋ ’kup̱ bam jin yip̱a amana, hili a’di ki is piti ka daran du mo tani a’di midi yaku/ i um mo ki bwam pitiŋ gana/ mo be.
18 Ki a’di mo tani aman hashkina akam bana a’di jin torkina gway piti ḵarash eya risa ḵaniisa ’baar mo gom gwony c̱im piti jin c̱ina a’di mo gom gwom ’borga/ mo be.
19 Dhali hili jasi gom a’di jan yisa, hili a’di karkunu ’pen ka pije/ mo ka risa ḵaniisa ’baar mo mmonyaḵ ya ki am mo gom mii ma ’the yan mo jin ’kokina aman mmoḵal ki mii mo gom monyca gi Tap̱a mo dhali mmoṯor bwam bam jin o’d ka daran du mo mmo/is mo be.
20 Am ’kona e ki mii ki ’kahar mo ki wathin ṯal ’deŋ kamu/ midi diki ’taki ’taḵ manya/ ap̱o/ am mo gom to jin c̱iyunu ki me’d jin ’ka’du i is mo a’di jin miikina aman to mo be.
21 Haali/ aman gukina a’di ki e mo a’di jin ta montaḵ mo, yisa jasi e jis/e gi Tap̱a mo yisa, hili si’da/ e jis/e gi ’kwani mo be.
22 Dhali ki uni mo tani aman hashkina akam bam a’di jin nyo/kina aman mo me’d ka ris mo dhali gamkina aman mo ki a’di i/ona bwa ki oŋ gana/ goma ris to ’baar mo. Dhali hili a’di shwane/ a’di ona bwa ki dhan o jin shi/ashi/ mo gom dhan miim piti jin wukina a’di um jwa i is mo be.
23 Haali/ me’da Tiithus mo tani a’di ita’da manpwaḵ to bwa nyaḵki aha/ mo dhali agarr pem jin miiki to nyaḵki aha/ gom um mo. Dhali gom iwaḵ bana mo tani uni ita imandhunu ki she/ mo eya risa ḵaniisa mo gom monyca ma Ḵrisṯẖos mo be.
24 Wakan nyo/i mii mo ibwambora risa ḵaniisa mo gom mo/en bum mo dhali gom ’bam bam kun dhunu aman ki ca mo gom um mo ibwambori ’kwani gwansan mo be.