3
Mii jin Miina ’Kwani To mo gom ku gi ’Koki Ta ’Kwani Yahuuda/ mo
1 Gom ’kup̱ mii yansan mo aha/ jin tana aBuulus mo, aha/ jin tana habuus goma Ḵrisṯẖos jin ta’da Yesus mo gom gway bum mo um kun ’koki ta ’Kwani Yahuuda/ mo.
2 Ṯoshka/ ki um ciḵ gwo mo gom mo jin dhunuwa ’the ma Arumgimis mo a’di jin c̱ikunu aha/ mo gom um mo,
3 mmoṯorkunu aha/ gwo mo jin c̱inu ki jim bag mo mmomish mo ki gwo jin ’ceenu mo, me’d gwo jin ’kwarkika/ ki e ’pe’pere/ mo.
4 Ki um mini deŋ yansan e mo tani um mini nyiṯẖ a’di jin nyiṯẖka/ mo e gwo ma Ḵrisṯẖos jin c̱inu ki jim bag mo,
5 a’di jin dinuki ṯor iya/ gi ’kwanin tiya ka nyaḵum yil buni mo me’d jin ṯorkunu a’di mo shwane/ e unim piti kun dhunu ki she/ ki jiŋ ḵogu mo dhali imanc̱i gwo ma Arumgimis kadhamo/ mo ki Shi/in mo.
6 Ba kani a’di ita gwo gom ’kwani kun ’koki ta ’Kwani Yahuuda/ mo mmonyaḵ mal mo, mmota waḵa ’de/ mo e buŋgwar is mo dhali mmonyaḵ gwo pwaḵ bwa jin onu is eya Ḵrisṯẖos jin ta’da Yesus ki gwom ’borga/ mo be.
7 Gom gwom ’borga/ yan mo tani aha/ karu ka manmii to mo isi ki to jin c̱in ma Arumgimis ki me’d ka ’the mo, a’di jin c̱ikunu aha/ mo ki mo/um ki mom’bi’th piti mo be.
8 E aha/ mo tani ba aha/ itana a’di jin p̱isap̱is mo eya ris uni kun dhunu ki she/ mo tani a’the yansan c̱ikunu aha/ mo mmoc̱i gwo e ’kwani kun ’koki ta ’Kwani Yahuuda/ mo, mo jin tan ma Ḵrisṯẖos pa ki pa mo jin molu deŋ e mo
9 dhali mmodhala ris ’kwani ’baar mo mmop̱ar e mo a’di yan jin ṯi’thkunu mo ki jim bag mo mmoba’kkunu a’di ki yil ka ris mo eya Arumgimis jin uḵki’da ris to ’baar mo be.
10 Dhali wakan mo ka ḵaniisa mo tani ’ban ka ris gi moyuḵ ma Arumgimis mo minu ’taki ṯor mo e mom’bi’th kun molu gadhir mo dhali mom’bi’th mo kun ’kon e mo kun ’kon e momis mo be.
11 A’di yansan ta isi ’kup̱ gwo ibwaŋ gwom piti ki mo jin ta ji ma sule/ mo a’di jin torkina a’di ’twa/a ’cesh mo eya Ḵrisṯẖos jin ta’da Yesus Tap̱am bana mo be.
12 E a’di mo tani ana dara gi monyju/ mo dhali wu a’di jwa i is mo gom bway yan e moŋgam gwo is bana e a’di mo be.
13 Wakan aha/ yuḵkina um mo mmodhalka du ki biṯ ka luŋgu’b mo ap̱o/ is pem jin ’koshki aha/ ka nyor mo gom um mo, a’di jin ta montaḵ bum mo be.
Momish Mo/en ma Ḵrisṯẖos mo
14 Gom ’kup̱ mii yansan mo tani aha/ biṯkina ki jiŋ ’kup̱a’dup̱uni bwambor ma Baba mo.
15 ’Peni a’di mo tani arisa waḵ kun ’kon e momis mo dhali kun ’kon e mony’cesh mo tani yerkunu gway mo,
16 ki isi pam piti jin tana a’di mo gom monycam piti mo tani a’di midi ’taki c̱i um mom’bi’th is ki dem dem ki Shi/in piti jin di isi bwaman wathi/ mo.
17 Dhali ka Ḵrisṯẖos midi ’taki di eya dum bum mo ki moŋgam gwo is mo dhali ki um mmotakina um ka birman mo dhali mo jin ḵa’bu/ mo e mo/en mo
18 mini ’taki ta gi mom’bi’th mo mmobu’th nyaḵka ris uni ’baar mo kun dhunu ki she/ ki dhelel dhelel mo a’di jin ta mombeega/ mo dhali mo kun tana luc̱ mo dhali monturga/ mo dhali moŋ’kulga/ mo
19 dhali mmomish mo/en ma Ḵrisṯẖos mo, a’di jin bolki mo jin nyiṯẖuwa nyiṯẖ e mo ki um minu ’taki ’tu’d mo ka ris mo ma Arumgimis jin ’tu’da a’di a’tu’d mo be.
20 Dhali e a’di mo, a’di jin ta gi mom’bi’th mo mmo/um mo e bwam ana mo, a’di jin mishki to mii mo ki nyanye/ mmobola ris to ’baar mo e kun doṯkina ana mo walla kun ṯoshkina ana mo,
21 e a’di mo tani monyca midi di mo eya ḵaniisa mo dhali eya Ḵrisṯẖos jin ta’da Yesus mo ntaga risa nyaḵum yil gi ’kwani mo gom mii ki sule/ mo dhali ki sule/ mo. Amen.