32
AYakuub a’di iyaki’d mo e bway piti mo dhali iman’doyu gwo gamki a’di ’kup̱ mo. Dhali ka Yakuub mishi uni mo tani a’di oki gwo mo ki: Uni gwansan ita ’kwani ma mee ma Arumgimis mo. Wakan a’di yuḵki mo c̱aan gway mo ka Mahanaayim mo.
Dhala Yakuub hashki’da ris ’kwani ma gum bway piti nṯwa/a/ ki a’di mo eya Iisu jin ta’da kam piti mo e bampa/ ki Pa Si/iir mo jin ta bampa/ Aduum mo. A’di ye’thki uni sho’k ki gwo mo mmo/o ki: Iiyi ṯorki tap̱am pem ka Iisu gwo mo ki: C̱iŋkinam pini ka Yakuub oki gwo gi wakan mo ki: Aha/ yakina yanyc̱a/ mo e pa Laabaan mo dhali c̱a’b ntagi shwane/ mo. Dhali aha/ tana ga risa morbip̱ mo dhali aris thuluny mo dhali ama’diny ḵa’bal mo dhali aris c̱iŋkinaŋ ’kwaniŋ gwaṯẖ mo kun miina ṯu’c mo dhali aris c̱iŋkina/ nyara/ mo kun miina ṯu’c mo dhali aha/ hashkina gwo mo mmoṯor tap̱am pem gwo mo ki aha/ mina gam mii ma ’the ’peni jis/em pini mo.
Dhali aris ’kwani ma gum bway piti uni doḵkin ka nyaŋ’ko’da Yakuub mo mmo/o gwo mo ki: Aman p̱u’dkina eya kam pini ka Iisu mo dhali a’di di’d mmoyayu/ mo mmogam /e ’kup̱ mo nyaḵki ’kwaniŋ gwaṯẖ kun ’koni iss ’kwanimpa i/iss ’de/ kun nyaḵ iiyu/ ki a’di mo. Dhali yan’ko’da Yakuub ḵo/ki is kagahara mo dhali a’di butha ’tham mo dhali a’di ḵwa/ki ’kwani bwa mo kun ’kokin nyaḵki a’di mo dhali ama’diny ḵa’bal mo dhala buhany bip̱ mo dhali aris kalman mo mmo’ko ka ṯa/ isu/ mo. A’di kulumki gwo ibwa mo waḵki/ Iisu midi p̱u’du/ ka ṯa/ ’de/ mo dhali ’ce’da/ ’ce’d sho’k mo tani aṯaŋ kamu/ minu dhalku mo mmoye mo be.
Dhala Yakuub ki o gwo mo ki: Ayy Arumgimis ma babam pem ka Ibrahiim mo dhali Arumgimis ma babam pem ka Is/hak mo, ayy Tap̱a /e jin oki aha/ gwo mo ki: Doḵi ka nyaŋ’ko’d e bampam pini mo dhali e ’kwani ma bas pini mo dhali aha/ mina mii /e ki ’bore/ mo. 10 Aha/ dina ki ha me’d mo goma ris mo/en jin ṯelu sho’k mo dhali goma ris mii ma isiŋ ganam pini mo uni kun ṯorkina /e c̱iŋkinam pini mo haali/ ki cwa gi me’d pem ’te/ mo tani a’di i’ciṯẖka/ Yi’deŋ Ḵumma/ Uurdun mo dhali shwane/ aha/ warkina ki wathi/ jin ’kon ma ṯa/i su/ mo be. 11 ’Cuḵi aha/ mo ma, aha/ ’thona /e mo ’peni me’d ma kam pem mo isi ’peni me’d ma Iisu mo haali/ aha/ ḵo/kina a’di mo isi ciki/ a’di midi p̱u’du/ mo dhali ’kosh am ’baar mo jwa mo nyaḵki ita’da ki uc̱i ilu/ mo. 12 Hili /e oki gwo mo ki: Aha/ mina mii /e ki ’bore/ mo dhali dhu emen pini mmowa e ka si’b gi bwam ma al yi’de/ mo a’di jin minu mol deŋ e mo goma buhany piti mo.
13 Wakan a’di ishki’d imaṯṯaan mon’thiny mo dhali a’di ki bu’th ’peni to kun tana a’di mo to jin c̱inu ki me’d mo goma kam ka Iisu mo. 14 A’di c̱iki a’di kuman ḵa’bali iss ’kwanimpa i’kume’d mo dhali gwasi mi i/iss ’de/ mo dhali kuman ḵa’bali iss ’kwanimpa i’kume’d mo dhali gwasiŋ ḵa’bali iss ’de/ mo. 15 Dhali kuman kalman kun umuwa ko i iss ’de/ i’ce’dka ’kume’d mo nyaḵki ushan buni mo dhali bip̱i issu/ mo dhali amorbip̱i ’kume’d mo dhali kuman thulunyi iss ’de/ mo dhali gwaṯẖan thulunyi ’kume’d mo. 16 Aris to gwansan idhukina a’di e me’d ma ris c̱iŋkinam piti mo dhali aris uni urkunu ki she/ ki she/ mo dhali a’di oki’da ris c̱iŋkinam piti gwo mo ki: Iiku/ nṯwa/a/ ki aha/ mo dhali kari buli bwaman mo mmo/ur to mo dhali uri to mo. 17 A’di ye’thki uni kun iikin nṯwa/a/ sho’k ki gwo mo ki: Ka Iisu jin ta’da kam pem midi gam um ’kup̱ mo dhali doṯ um gwo mo ki um ta gu maja mo tani, dhali um iini ii mana mo? tani, dhali aris to maja gwansan kun iini bwambori um mo isan? tani, 18 dhali yan’ko’d um mini o gwo mo ki: Uni ta ku gi c̱iŋkinam pini ka Yakuub mo, uni ta to kun c̱inu ki me’d kun hashu /e tap̱am pem ka Iisu mo dhali a’di ki is piti yayi’di ’ko’di aman mo be. 19 A’di mii miin ’de/ yan jin nyaḵka’d mmoye’th uni kun ’kon ma p̱o/ isu/ sho’k gi gwo mo dhali nyaḵki uni kun ’kon ma p̱o/ ikwara mo dhali aris uni kun uru mo ki: Um mini mii o jasi gwon ’de/ mo eya Iisu mo ki um mini gam a’di ’kup̱ mo. 20 Dhali um mini o a’di gwo mo ki c̱iŋkinam pini ka Yakuub a’di di’d mmoyayu/ ki is piti i’ko’di aman mo, haali/ a’di kulumki gwo ibwa mo ki aha/ mina ’taki wan a’di is ki to jin c̱inu ki me’d mo kun iini bwambori aha/ mo dhali yan’ko’d aha/ mina p̱ar jis/em piti e mo: waḵki/ a’di wariba/ midi ’taki bu’th aha/ mo. 21 Wakan to kun c̱inu ki me’d iikin mo mmoshu a’di bway mbwambor mo dhali a’di ki is piti ishki’d mo mon’thiny yin e gu’b burrinyem piti mo.
22 Dhali mon’thiny ’de/ yan mo tani a’di cuki mis mo dhali bu’th i/ashi su/ mo dhali up̱ c̱iŋkina/ nyaram piti isu/ mo ’dhali uc̱im piti ’kume’d i’ce’dka ’de/ mo dhali a’di ki ’ciṯẖa al yi’de/ ma Yabbuug mo. 23 A’di suski uni mo dhali hash uni mo mmo’ciṯẖ yi’de/ jin guski’d mo dhali nyaḵka ris to ’baar mo kun tana a’di mo. 24 Dhala Yakuub a’di dhalkunu a’di ’de/ mo dhali a’di ’tirki’d uni ki wathiŋ kamu/ mo ntagi e ḵali kush mo. 25 Ki wathi/ p̱arki mo e mo ki a’di diki p̱iya Yakuub e ki mii mo tani a’di ki ta a’di bwaman ma wum piti is ki me’d mo ntagi a’di burushki’d mo dhali awum gi Yakuub a’di iraḵki’d mo ’peni gocor piti mo me’d jin ’tirkina a’di nyaḵki a’di mo. 26 Dhali yan’ko’d a’di ki o gwo mo ki: Dhalki aha/ me’d, aha/ yana mo haali/ mo ḵalki kush mo. Hila Yakuub oki gwo mo ki: Aha/ mina dhal /e me’d mo yisa isi ciki/ /e mini mii ’bor aha/ mii mo. 27 Dhali a’di ki o a’di gwo mo ki: Gway pini yuḵu kaja mo? Dhali a’di ki thoḵ a’di gwo mo ka: Yakuub mo. 28 Dhali yan’ko’d a’di ki o gwo mo ki: Gway pini minu mii ’koki doḵ/e yuḵ ka Yakuub yisa, hili ka Israyiil mo haali/ /e askina Arumgimis nycine/ mo dhali ’kwani mo dhali /e p̱iki mii e mo be. 29 Dhali yan’ko’d Yakuub ki doṯ a’di gwo mo ki: Ṯori aha/ gwo mo ma aha/ ’thona /e mo, gway pini yuḵu kaja mo? Hili a’di oki gwo mo ki: Gomatinta idoṯkina /e gway pem mo? Dhali a’di ki la dhiŋ mii is mo i’bor a’di mii mo be. 30 Wakan aYakuub yuḵki mo c̱aan gway mo ka P̱anu/iil mo mmo/o gwo mo ki: Haali/ Arumgimis mishkika/ jis/em piti ka ḵarambor mo dhali hili mondiki/em pem a’di ’tashkunu ’twa/ mo. 31 Atente/ sulki’da p̱o/ a’di mo me’d jin pekina a’di Pa P̱anu/iil mo mmoto’b ki cwa mo haala wum piti ta ŋwol mo. 32 Gom gwo gi wakan mo ’pena cim c̱aan mo tani ’Kwani ma Israyiili ’baar mo tani uni ’koki ’ka to kun miinycuru/ ’kus ki ’bi’th mo mmoraḵ dugu’b buni ’peni awum mo haali/ a’di burushki’da Yakuub awum piti mo ’peni dugu’b mo be.