1 Shwane/ ṯe/ shilki ’kwani is ki she/ e bampa/ mo be. 2 Dhali ki uni shwaki pos mo a’di jin ḵalkina uni ’peni Pa Masir mo tani ababam buni oki uni gwo mo ki: Iiku/ mo doḵ/e mmoyoli ari tonṯe/ gom ana mo. 3 Hila Yahuuda oki a’di gwo mo ki: Wathi/ rumki aman ki gwo ki ’bi’th mo mmo/o gwo mo ki: Um mini mol jis/em pem p̱ar e mo isi ciki/ akam bum midi nyaḵ yayu/ ki um mo. 4 Waḵki/ /e mini hasha kam bam nyaḵki aman mo tani aman mina ii ka luŋgu’b mo dhali yolu /e tonṯe/ mo. 5 Hili waḵki/ /e mini diki hash a’di mo tani aman yisa mina ii ka luŋgu’b mo haali/ wathi/ oki aman gwo mo ki: um mini mol jis/em pem p̱ar e mo isi ciki/ akam bum midi nyaḵ yayu/ ki um mo. 6 Israyiil oki gwo mo ki: Katinta jan miina um aha/ ka jin thus kan mo mmoṯor wathi/ gwo mo o ki um tan ga kama kamu/ mo? 7 Uni thoḵki gwo mo ki: Wathi/ be idoṯki aman gwo ka ḵar/e mo gom is bam mo dhala bas bam mo mmo/o gwo mo ki: A/ababam bum di’d ki e naskina/ mowa? A/um tan ga kam buma kamu/ mowa? A’di jin ṯorkina aman a’di mo tani uni a’di ita gwon doṯ kun thoḵkunu mo. A/ba aman misha to kun mina a’di i’taki mii owa? Mmo/o ki susa kam bum ka luŋgu’b mo. 8 Dhali aYahuuda oki’da Israyiil jin ta’da babam piti gwo mo ki: Hashi dhuru’c wathi/ nyaḵki aha/ mo dhali aman mina cu mis dhali ii mo ki aman mina ’ko ki e mo dhali ’koki wu mo, aman imonṯal ’de/ inyaḵki /e mo dhali ushi uc̱iŋ gwa’dgam bam si’da/ mo. 9 Aha/ mina ya ta a’di jin ’tashu ’twa/ mo gom a’di mo. ’Peni me’d pem mo tani /e mini ’theḵ gwo gom a’di. Waḵki/ aha/ dinaki susu/ a’di pa ka nyaŋ’ko’di /e mo dhali kar a’di ibwambori /e mo tani dhalki mo jin diluwa dil miga/ ḵal e ’ba/ pem ki sule/ sule/ mo. 10 Haali/ waḵki/ aman mina ’taki ’koki ta adiiṯe/ kan mo tani aman anann be mina ’taki p̱u’du/ ka nyaŋ’ko’d me’di su/ mo be.

11 Dhali yan’ko’d ababam buni ka Israyiil oki uni gwo mo ki: Waḵki/ a’di midi mii wakan mo tani ba miiyi a’di yan mo. Buthi maman cwa kun mina umi kwany mo ’peni bampa/ mo dhali dhuyi uni e bwaŋ ḵucaŋ mo dhali ḵalki uni ka luŋgu’b gom wathi/ mo mmota to jin mina um taḵ a’di mo ara ’bi’c cwa ma balsam dhali ara yina dham dhala ’bi’c en’thi/ dhala murr dhali emen cwa jin wana maman ki shu’be/ mo dhali emen cwaŋ kamu/ si’da/ mo. 12 Ḵali aguurush ka ’buḵum ’ban mo nyaḵki um mo. Ḵalka guurush gwan ka nyaŋ’ko’d kun doḵkunu umi is mo e aris ’twaman ma wolgwap̱im bum mo, wariba/ a’di ta mii jin thamunu miiyi mo. 13 Susa kam bum si’da/ mo dhali cuyi mis mo dhali iiku/ i wathi/ doḵ/e mo. 14 Ba dhalka Arumgimis jin Eḵa/ Eḵ c̱i um mii jin miinu mo ibwambori wathi/ mo ki a’di midi hasha kam bum akamu/ ka nyaŋ’ko’d nyaḵka Benyamiin mo. Waḵki/ aha/ minu bu’th uc̱i i’baar mo tani aha/ dara ki mowoṯẖ mo be. 15 Wakan ’kwani ḵalki tontaḵ mo dhali uni ḵalkina aguurush ka ’buḵum ’ban nyaḵki uni mo dhala Benyamiin mo dhali uni cuki mis mo dhali ii ka luŋgu’b bway bampa/ Masir mo dhali uni doshkini bwambor ma Yuusup̱ mo be.

16 Ka Yuusup̱ p̱arki’da Benyamiin e mo tani a’di oki’da manhil to e gu’b piti gwo mo ki: Susi ’kwani gu’b mo dhali ’ciṯẖi/ to/e ’kus mo dhali thosoni to ki jahanne/ mo haali/ ’kwani mini nyaḵ to shwa ki aha/ montee mo. 17 Wathi/ miiki’d me’d jin ḵankin ma Yuusup̱ a’di gwo mo dhali suski ’kwani e gu’b ma Yuusup̱ mo. 18 Dhali ’kwani uni ḵo/ki is mo haali/ uni suskunu bway gu’b ma Yuusup̱ mo dhali uni oki gwo mo ki: A’di ta mii ma guurush wariba/ kun dhukunu e ’twamana wolgwap̱im bana mo ka cim gi ṯwa/a/ yin mo a’di isuskunu ana gu’b mo ’tese/ wakan ki a’di midi ŋap̱ embula ’borga/ ap̱o/ ana mo dhali biṯa p̱o/ ana dhali dhu ana ki c̱iŋkina/ kun yolu mo dhali bu’th thuluny bana mo be. 19 Wakan uni iiki gu’b gi wathi/ jin ta’da manhil to ma Yuusup̱ mo dhali ṯora ṯor nyaḵki a’di e shan’tamo/ gi gu’b mo. 20 Dhali oki gwo mo ki: Ayy tap̱am bam, aman p̱u’dkina ka luŋgu’b ka cim jin ṯwa/a/ mo mmoyol tonṯe/ mo. 21 Dhali ki aman p̱u’dkina e mo jin ishu mo tani aman ḵa’dkina wolgwap̱im bam ’twa/ mo dhali imun mo tani aman ’kwani gamkina aguurush ka ’deṯe/ ’deṯe/ e ’twaman ma wolgwap̱im bam mo, aguurush bam uni idiṯadiṯ mo, wakan aman ḵalina uni doḵ/e nyaḵki aman mo. 22 Dhali aman si’da/ ḵalina aguurusha kamu/ ka luŋgu’b e me’d bam mo mmoyol tonṯe/ mo. Aman yisa misha wathi/ jin dhuki aman aguurush e ’twamana wolgwap̱im bam mo. 23 A’di thoḵki uni gwo mo ki: Shiyi is bum ki gwo jin rokomkunu mo ma. Dhalku/ is ki ḵo/ mo, Arumgimis bum dhali Arumgimis ma babam bum a’di be i’taki mii idhuki umi tom bum kun ish ḵumma/ e ’twamana wolgwap̱im bum mo gom um mo. Aha/ bu’thkina aguurush bum mo. Dhali yan’ko’d a’di suski’da Shim/uun ka pije/ e uni mo. 24 Dhali wathi/ suski ’kwani bway gu’b ma Yuusup̱ mo dhali c̱i uni yi’de/ mo dhali ki uni lamki sho’k buni mo dhali ki a’di c̱iki thuluny buni to mmoshwa mo si’da/ tani 25 uni thosonki tontaḵ buni is mo goma Yuusup̱ midi yayu/ pa mo montee mo haali/ uni ciḵki gwo ki uni mini ’taki shwa tonṯe/ imun mo.

26 Ka Yuusup̱ p̱u’dki pa mo tani uni ḵalki a’di to bway gu’b mo kun ta tontaḵ kun takina uni mo dhali uni goŋki is ka ’cesh mo e a’di mo ntaga ’cesh gana/ mo. 27 Dhali a’di ’theḵki gwondoṯ mo gom moŋ’kom buni dhali o gwo mo ki: A/ababam bum di’d ki ’bore/ mo ’te/ tana? wathin dhan jin ṯorkina um aha/ gwo mowa? A/a’di di’d ki ’bore/ mowa? 28 Uni thoḵki a’di gwo mo ki: C̱iŋkinam pini jin ta’da babam bam mo tani a’di idi’d ki ’bore/ mo, a’di di’d ki e naskina/ mo be. 29 Dhali a’di i’de’kki em piti ki mis mo dhali misha kam piti ka Benyamiin mo jin ta ya/ gi kum mo dhali o gwo mo ki: A/ara kam bum jin gwa’da’d a’dana a’di jin ṯorkina um aha/ mowa? Arumgimis midi mii mii ma ’the gom /e ya/m pem. 30 Dhali yan’ko’da Yuusup̱ di’bki mii is mo ki jahanne/ haali/ adum piti gworki’d mo goma kam piti mo dhali a’di ŋap̱ki mo mo mmoko nycine/ mo. Dhali a’di yaki gu’b ish piti mo dhali ko imun mo. 31 Dhali yan’ko’d a’di lamki jis/em piti mo dhali yayu/ ka pije/ mo dhali butha du mo dhali o gwo mo ki: Dhalki tonṯe/ a’di ipashu mo. 32 Uni c̱iki a’di tonṯe/ ki is piti a’di ’de/ mo dhali uni ’cena c̱em buni mo dhali ’Kwani Masir kun nyaḵki tonṯe/ shwa ki a’di uni ’cena c̱em buni mo haali/ ’Kwani Masir mini mol tonṯe/ shwa nyaḵki ’Kwani Ibraan mo haali/ a’di midi ta miin nyogga/ gom ’Kwani Masir mo. 33 Dhali uni dhukunu ’pena ’cesh mo ibwambori a’di mo, a’di jin ta’da bwanyara/ me’di isi gwo ma bwanyara/ jin tana a’di ka ḵar/e mo dhali ara gwa’dga/ me’d isi dhuru’c piti jin tana a’di mo. Dhali ’kwani hilkin e ka rem ’kup̱ mo dhali mer kagahara mo be. 34 To kun ’tuntulu/ bwa ime’d ’pena tharabeesa ma Yuusup̱ mo tani a’di ḵalkunu uni mo hili aBenyamiin a’di ’tuntulkunu to ime’d me’di mudhe’d mo mmobol kum buni e mo. Wakan uni p̱iki to mo dhali ’kuny bwa nyaḵki a’di mo be.