12
Gwo jin Rumu ap̱o/ Imanheka He’k E mo
1 Dhali e mo c̱aan ka waambuhany ’kwani tana ris ka ris mo tulki is mo mmonṯal ’de/ mo dhali uni yap̱ki unin tiya ki is mo tani dhali a’di ṯelki gwo ’pen mo mmo/o imanciḵ a’di gwo gwo mo nṯwa/a/ ki: Jiyi acumaṯ gi ’Kwani P̱arisiyiin ki e ki ’bore/ mo ma, uni kun tana he’k e ka he’k e mo.
2 Toŋ kamu/ yisa di’da jin kumkunu ’kup̱ mo jin minu ’koki ṯor eya tente/ mo walla toŋ kamu/ yisa di’da jin bagkunu mo jin minu ’koki mish mo yisa.
3 Waḵki/ gwo jin ona um e mondhurumi’d mo tani a’di minu ciḵ mo e moŋkush mo dhali a’di jin ona um ki ḵako/ mo ka ḵwal is e gu’b mo tani a’di minu c̱i eya tente/ e ’kuŋgu’b mo be.
A’di jin Minu Ḵo/ mo
4 Aha/ ṯora um gwo mo ikam pem mo ki: dhalku/ ki ḵo/ uni gwansan kun ’koshki buŋgwar is mo ma, dhali ŋ’ko’d uni dar ki miiŋ kamu/ mo jin misha uni mii mo.
5 Hili aha/ mina rum um ki gwo mo gom a’di jin mina umi ḵo/ mo: Ḵoki a’di, a’di jin ta gi mom’bi’th mo mmoṯaka ṯa’k mo e mo ma al o’d mo ’ko’di a’di ’koshki’da ’kosh mo. Nye, aha/ ṯora um gwo mo ki: Ḵoki a’di mo ma.
6 ’Konuki yol ushi ’dii imudhe’d ka ṯariip̱a mowa? Dhali jan ṯal ’deŋ kamu/ ’peni uni yisa thiskunu e mo ibwambor ma Arumgimis yisa.
7 E/ um hili amur’kup̱ bum gana/ si’da/ uni ’baar mo deŋkunu e mo be. Dhalku/ is ki ḵo/ mo ma. Haali/ um gama she/ yol ki gam mo mmobol ushi ’dii e mo be.
Mmopiya Ḵrisṯẖos Gwo Mbwambori ’Kwani mo
8 Dhali aha/ ṯora um gwo mo, aris uni ’baar mo ka ’deṯe/ ’deṯe/ kun mini pi gwo gom aha/ mbwambori ’kwani mo tani wakan si’da/ Ya/ gi ’Kwani midi pi a’di gwo mo ibwambori iman’doyu gwo ma Arumgimis mo be.
9 Hili a’di jin waṯki aha/ gway mo mbwambori ’kwani mo tani a’di minu waṯ gway mo ibwambori iman’doyu gwo ma Arumgimis mo be.
10 Dhali aris ’kwani ’baar mo ka ’deṯe/ ’deṯe/ uni kun oki gwo ap̱o/ Ya/ gi ’Kwani mo tani uni minu dhal ’pen mo. Hili a’di jin wal gwo sor ap̱o/ Shi/in Dheleladhelel mo tani a’di minu dhal ’pen mo yisa.
11 Dhali ki uni mini sus um mo e bwambor gu’b gi montul is mo dhali e itap̱a mo dhali e uni gun ta gi moshirr mo tani dhalku/ is ki anan mo gom gwo gi wakata imina umi thoḵ mo walla gwonta imina umi o mo,
12 haali/ Shi/in Dheleladhelel a’di midi ṯor um gwo ki mo yansan gana/ mo gwo jin mina um ḵa i/o mo ba/.
Gwom ’Bi’th/e gom Wathi/ jin Ta Pa ki Pa jin Ta P̱us mo
13 Jan ’deŋ kamu/ ’peni bwaŋ ’kwani ma waambuhany oki a’di gwo mo ki: Manṯor Gwo, ḵana kam pem gwo mo ma, mmopwaḵ mal bwa mo nyaḵki aha/ mo.
14 Hili a’di o a’di gwo mo ki: Wathi/ kaja kar aha/ mo mmota mandwall gwo mo walla mmota manpwaḵki um to bwa mo?
15 Dhali a’di ki o uni gwo mo ki: Hili ki ’bore/ mo ma, dhali jiyi aris mo jin ’thoṯẖu/ bwa ki e ki ’bore/ mo, haali/ mondiki/e gi wathi/ a’di diki gamki mo jin isha tom piti jin gama a’di ka enthus mo.
16 Dhali a’di ki ṯor uni gwo mo ki gwom ’bi’th/e mo mmo/o gwo mo ki: A’cesh jin tana wathi/ jin ta pa ki pa mo tani a’di pirki to me’d mo ka enthus mo be.
17 Dhali a’di ki kulum gwo ibwa ki is piti mo ki: Aha/ mina miiya tinta mo haali/ aha/ dara ki mo mo mmodhu tom pem mo be.
18 Dhali a’di ki o gwo mo ki: To yansan a’di imiga/ imii mo be. Aha/ mina ’kosh themes pem ka ’cesh mo dhali nyaŋ kuny caaga/ mo be. Dhali aha/ mina dhu tom pemi ’baar mo kun ta pos pem mo dhali tom pem kun taka/ mo be.
19 Dhali aha/ mina owa ḵashiram pem gwo mo ki: Ḵashiraa, /e ta gi to kun ’koshi jwa mo kun dhukunu mo gom yil ka ris mo be. Hili mo isunse/ mo ma, shwayi to mo, dhali p̱iyi to mo dhali ’kunyi bwa mo ma.
20 Hili Arumgimis o a’di gwo mo ki: /em p̱us yan mo. Mon’thiny yan shwane/ mo tani aḵashiram pini miga/ doṯ ’peni /e mo, dhali to kun thosonkina /e is mo tani uni mini ta kum maja mo?
21 Wakan a’di jin isha to ḵumma/ gom is piti mo dhali diki ta pa ki pa mo ’kup̱ ka Arumgimis mo.
Mmo/anan Is mo
22 Dhali a’di ki o imanciḵ a’di gwo gwo mo ki: Wakan aha/ ṯora um gwo mo ki dhalku/ is ki anan mo gom moŋ’koki/em bum mo, gom to kun mina umi shwa mo walla to gom buŋgwar is bum mo a’di jin mina umi hithi is mo.
23 Haali/ mondiki/e a’di ica’d ki tonṯe/ mo dhali buŋgwar is a’di boli burrinye/ e mo be.
24 Kulumi gwo ibwa gom ’dii mo ma. Uni ’koki si to mo walla ’koki ’ciṯẖ to mo tani uni si’da/ dar gi gu’b jin dhunu to mo walla themes mo dhali hili Arumgimis thip̱ki uni mo be. Bakata ’te/ um a’di i’bitha yol she/ ki ’bi’th mo mmobol ’dii e mo be.
25 Dhali jan ’deŋ kamu/ ’peni bwam um di’da jin midi anan is mo jin midi mish mar gulan tur piti is mo?
26 Waḵki/ um si’da/ ’koki mish ushi toŋ gwa’dga/ mii mo kun wakan tan mo tani atinta anana um is mo gom miin tiya mo sa/?
27 Kulumi gwo ibwa mo ma, gom jandin to mo mmocakina uni mo. Uni ’koki miiya ṯu’c mo walla sura thus mo. Hili aha/ ṯora um gwo mo goma Sulemaan eya aris monycam piti mo tani a’di dinuki hi’thki burrinye/ jin waki jandi/ ’peni uni gwansan ’de/ mo be.
28 Hili waḵki/ Arumgimis ki hi’th asho ki burrinye/ kun ’kon e bwaasho shwane/ mo dhali ka’thamo/ uni ṯagu i o’d mo tani bakata ’te/ imina a’di hi’th um ki burrinye/, um ’kwani kun aṯẖa moŋgam gwo is ki aṯẖ kan mo?
29 Dhali dhalku/ ki simm to e jin mina umi shwa mo dhali gwo gom to jin mina umi p̱i mo walla dhalku/ ki ta iman/anan is e bwam bum mo.
30 Haali/ aris ’kwani gi kal gi mony’ceshi ’baar mo tani uni simmki to gwansan e mo dhali Ababam bum mishki a’di c̱aan jin mina umi mii ta gi uni mo be.
31 Ma mo simm jasi bampam piti e mo dhali aris to gwansan mini ta kum bum si’da/ mo be.
Mmo/ish Ḵumma/ e Momis mo
32 Dhalku/ is ki ḵo/ mo ma, usha ma’diny mo, haali/ bwa ma Ababam bum midi ’bor mo mmoc̱i um bampa/ mo be.
33 Yoli tom bum kun tana um mo ma. Dhali c̱i to jin c̱inu ki me’d mo gom ’kwani kun hatha ’ko’d mo. Ḵucura jisilaan ki is bum mo ma, uni gun ’koki war ki kun dhamo/ mo, a’di jin ish to ḵumma/ mo e momis jin midi diki ush me’d ki sule/ mo, mo jin daru ka ’di/ mo mmo’dish mo is mo dhali adhurany midi diki ’ce’d uni sho’k mo be.
34 Haali/ mo jin isha tom bum ḵumma/ mo tani a’di imin ma dum bumi ’ko si’da/ mo be.
Imanmiiya Ṯu’c kun Timina Tim mo
35 Dhalki empa’d bum minu ’kam ki to mo dhali c̱itha lambam bum mo
36 dhali wayi e ki ’kwani kun c̱orki tap̱am buni mo mmop̱u’du/ bway pa mo ’peni momiimash jin yuḵuwa yuḵ mo wakan ki uni mini mish ḵa’d ki a’di ’twaŋkal ise/ ki a’di midi pu’du/ mo dhali nagkana campur mo be.
37 Mom’bor mii gom c̱iŋkina/ gwansan uni kun gama tap̱a ki e mo ki a’di p̱u’dki’d ka nyaŋ’ko’d mo. Ka jiŋ gana/ aha/ ona um gwo mo ki a’di midi ’kam empa’d piti ki to mo dhali yuḵ uni mo mmo’kowa tharabeesa mo dhali a’di midi yaku/ mo dhali mii uni to mo be.
38 Waḵki/ a’di p̱u’dki’d mo nṯwa/a/ ki mombwam/e mo tani walla ’ko’di mombwam/e mo tani dhali a’di ki gam uni wakan mo tani mom’bor mii gom c̱iŋkina/ gwansan mo be.
39 Hili mishi yan mo ma, waḵka mancila gu’b midi ’taki misha tente/ jin mina wathin ’di/ iyayu/ mo tani a’di midi ’taki di ki e mo dhali midi diki dhal gu’b piti ’pen mo wathin ’di/ ki ’ce’d mo.
40 Um si’da/ mini mii thoson is mo haali/ Ya/ gi ’Kwani midi p̱u’du/ mo ka tente/ jin mina um ’koki ṯosh ki a’di midi p̱u’du/ mo be.
C̱iŋkina/ jin Diki Ta Isiŋ Gana/ mo
41 Buṯerus o a’di gwo mo ki: Tap̱a, a/e ṯori gwom ’bi’th/e yan jasi gom am mo ’teya, walla gom ’kwani ’baar mo?
42 Dhali Tap̱a ki o a’di gwo mo ki: Kaja a’di jin ta wathi/ isiŋ gana/ mo dhali yuḵa yuḵ mo mmota mandhu to mo? a’di jin mina tap̱am piti kar ari tap̱a ap̱o/ gu’b piti mo mmoc̱i uni tonṯe/ ki ’ban buni ka tente/ ka ḵar/e mo?
43 Mom’bor mii gom c̱iŋkina/ c̱aan mo a’di jin mina tap̱am piti gam mo waḵki/ a’di midi p̱u’du/ mo mmogam a’di mmomii kan mo be.
44 Ka jiŋ gana/ aha/ ṯora um gwo mo a’di midi kar a’di eya p̱owa ris tom piti ’baar mo kun tana a’di mo be.
45 Hili waḵki/ c̱iŋkina/ c̱aan o gwo e is piti mo ki: Tap̱am pem tayi’da diiṯe/ mo mmoyayu/ mo dhali a’di ki ṯel mii ’pen mo mmodor ’kwaniŋ gwaṯẖ kun ta c̱iŋkina/ mo dhali kun ta c̱iŋkina/ nyara/ si’da/ mo dhali a’di ki shwa to mo dhali p̱i to mo dhali ’kosh ma su mo tani
46 tap̱a gi c̱iŋkina/ yansan midi p̱u’du/ mo ka tee yan jin dina a’di ki ṯosh mo ki a’di midi yayu/ mo dhali ki mo jin dina a’di ki mish mo mo dhali a’di midi c̱i a’diya jisa mo dhali a’di midi kar a’di mo nyaḵki uni gun ’koki ta ku isiŋ gana/ mo be.
47 Dhali c̱iŋkina/ c̱aan jin mishi bwan tap̱am piti mo tani dhali diki thoson is mo walla diki mii me’d isi bwam piti mo tani a’di midi bu’th mondor me’d ka ris mo be.
48 Hili a’di jin diki mish mo mo dhali mii to jin midi mii gam mondor mo tani a’di midi bu’th mondor jin gwa’dagwa’d mo. Aris ’kwani ’baar mo ka ’deṯe/ ’deṯe/ uni kun c̱ikunu to ki nyanye/ mo tani ’peni uni mo to jin caaca mo tani minu doṯ mo. Dhali ’peni uni gun c̱ina ’kwani to ki nyanye/ mo tani mina uni doṯ to ki nyanye/ si’da/ mo be.
Yesus ki Raḵ mo gi Ḵwa/u Bwa mo
49 Aha/ p̱u’dkina mo mmokar o’d ap̱o/ mony’cesh mo be. Dhali aha/ ona bwayi ki a’di minu ’tha mo hila/.
50 Aha/ tana gi mo jin minu mii ki yi’de/ mo mmomii nycine/ mo dhali aha/ miina is ki ’kasa/ ’kasa/ mo ntagi a’di minu thim mo be.
51 Um ṯoshkin ki aha/ p̱u’dkina mo mmoc̱i moŋḵu’th is e mony’cesh mo ’taa? Yisa. Aha/ ṯora um gwo mo, hili, mmodhal mii e i is mo mmoḵwa/ bwa mo be.
52 Haali/ ’peni shwane/ mo gu’ba ṯal ’de/ jin mina ’kwani ’ko imudhe’d mo tani uni minu ḵwa/ bwa mo, kun ’koni kwara mo mini ḵwa/ bwa mo ap̱o/ uni kun ’koni su/ mo dhali kun ’koni su/ mo tani mini ḵwa/ bwa mo ap̱o/ uniŋ kwara mo be.
53 Uni mini ḵwa/ bwa mo, ababa ap̱o/ ya/ mo dhali ya/ ap̱o/ com mo, dhali kum ap̱o/ ’bwa/ mo dhali ’bwa/ ap̱o/ kum mo dhali kumpa jin ta’da mare/ ap̱o/ mar pitim ’bomi mo dhali a’bom mash jin ta’da mare/ ap̱o/ mar piti mo be.
Mo jin Nyiṯẖu Mo mo
54 A’di si’da/ ki owa waambuhany ’kwani gwo mo ki: Ki um p̱arkina raḵ e mo mmocu mo ’pena bor ma luŋgu’b mo tani um ki o gwo ki jahanne/ ki: Ari p̱iriny p̱u’dki’d mo be dhali wakan a’di miiki’d mo be.
55 Dhali ki um hilki ’tham ’peni ’ko’d gwar ma biny cam poshki’d mo tani um ki o gwo mo ki: Mo midi ’batha’ba’th mo. Dhali a’di miiki’d mo be.
56 Um ’kwani kun tana he’k e ka he’k e kan mo. Um mishki to nyiṯẖ e mony’cesh kun pikin mo dhali momis mo tani hili, atinta ’kona um ki mish nyiṯẖ mo gi buŋ’kus shwanesan mo?
Mo jin Mina /e Thoson Gwo Nyaḵka Manyer /e Is ki Gway mo
57 Dhali atinta ’kona um ki is bum ki theke’th gwo mo gom a’di jin ’boro’d mo?
58 Me’d jin mina /e ya mo nyaḵka manyer /e is ki gway mo ibwambor ma mandwall gwo mo tani pali gwo mo mmothoson nyaḵki a’di mbway mo hili isi ciki/ ki a’di midi diki dir /e eya dwalliŋ gwo jin ca’d mo dhali adwalliŋ gwo jin ca’d mo midi c̱i /e eya mantor tonthus ’twa/a ’cesh mo dhali amantor tonthus ’twa/a ’cesh mo midi kar /e eya sijin mo be.
59 Aha/ ṯora /e gwo mo ki /e mini diki pi ka pije/ ki sule/ mo ntagi /e mini c̱i ara maliim jiŋ ’ko’d mo be.