23
Yesus Diki’d Ibwambor ma Bilaaṯus mo
1 Yan’ko’d aris uni ’baar mo kun tulki is mo uni cuki mis mo dhali susi a’di mo mbwambor ma Bilaaṯus mo.
2 Dhali uni ṯelki mii ’pen mo mmoyer a’di is ki gway mo mmo/o gwo mo ki: Aman gamkina wathi/ yansan mmo/o gwo ap̱o/ bampam bana mo dhali non am ’kup̱ mo si’da/ mmoc̱iya Kaysara thulp̱a/ mo dhali o gwo ki a’di ki is piti ta’da Ḵrisṯẖos jin ta’da Maliḵ mo.
3 Dhala Bilaaṯus ki doṯ a’di gwo mo ki: Ki /e de ntana Maliḵ gi ’Kwani Yahuuda/ mo de? Dhali a’di ki thoḵ a’di gwo mo ki: Ona /e wakan si’da/ mo be.
4 Dhala Bilaaṯus ki o igasiis kun can gwo mo dhala waambuhany ’kwani mo ki: Aha/ dinaki gam miiŋ kamu/ e wathi/ yansan jin ṯẖutha a’di mii mo be.
5 Hili uni ’cece’bki gwo mo mmo/o ki: A’di cuki ’kwani is mo mmoṯor gwo ki tur mo e Bampa/ Yahuudiyya ’baar mo ’peni Pany Jaliil itagi mahansan mo be.
Yesus Diki’d Ibwambor ma Hirodus mo
6 Ka Bilaaṯus ciḵki gwo yan mo tani a’di doṯki gwo mo waḵki/ a’di ta wathi/ gi Pany Jaliil mo.
7 Dhali ki a’di da/arki gwo mo ki a’di cila mo ma Hirodus gi moshirr mo tani a’di hashki a’di ka Hirodus mo, a’di jin di’d ki is piti e Pa Urushaliim ki mo c̱aan mo be.
8 Ka Hirodus p̱arki’da Yesus e mo tani a’di ’kunya bwa kagahara mo haali/ a’di dina gwo ibwa mo isa gush mo mmop̱ar a’di e mo, haali/ a’di ciḵki gwo mo gom a’di mo dhali a’di ṯoshki p̱ar miimera kamu/ e mo jin miikina a’di mo.
9 Wakan a’di doṯki a’di gwon tiya ka ris mo, hili a’di diki ’de’k ’twaŋ kamu/ mo be.
10 Dhali igasiis kun can mo dhali iman’kwar to mo doshkin ki ’dishe/ mo mmo’cwara ’cwar mo mmoyer a’di is ki gway mo be.
11 Dhala Hirodus nyaḵka askar piti mo tani uni kar a’di ki mon’the is mo dhali mmomii a’di ka maḵ mo. Yan’ko’d uni ki hi’th a’di burrinye/ jin c̱a’bki ’be’d ’be’di is mo dhali a’di ki hash a’di ka nyaŋ’ko’d eya Bilaaṯus mo be.
12 Dhala Hirodus dhala Bilaaṯus uni warkin ka mugu ka rem ’kup̱ mo ka teeŋ gana/ c̱aan mo haali/ ki mii yansan nṯwa/a/ mo tani uni ta ’kup̱ ka rem ’kup̱ mo be.
Yesus Torkunu Gwo ’Twa/a ’Cesh mo Mmowu mo
13 Yan’ko’d Bilaaṯus ki tul igasiis kun can is mo dhali ’kwani kun tana ’kaŋ’kup̱ pa mo dhali ’kwani mmonṯal ’de/ mo be.
14 Dhali a’di ki o uni gwo mo ki: Um suski wathi/ yansan i aha/ mo me’d wathin ’de/ jin o gwo ap̱o/ ’kwani mo. Dhali ŋ’ko’d aha/ palkina a’di mo mbwambori um mo. Dhali hili mo mo ma aha/ dinaki gam wathi/ yansan ’peni ton ṯal ’deŋ kamu/ jin ṯẖutha a’di mii mo jin ona um a’di gwo ap̱o/ mo.
15 Walla Hirodus si’da/ haali/ a’di hashki a’di ka nyaŋ’ko’d e ana mo. Dhali hili mo mo ma. Toŋ kamu/ yisa di’da jin ha me’d ki mowu mo jin miikina a’di mo be.
16 Dhali gom mii gi wakan mo tani aha/ mina c̱i a’di monṯo’k mo dhali ’cuḵ a’di mo be.
17 Dhali a’di midi mii ta mii mo jin mina a’di mii ’cuḵ wathin ’de/ gom uni ka cim gun ’boron mo be.
18 Hili uni ’baar mo cuukin ki nyanye/ mo mmonṯal ’de/ mo ki: Ka bor ’deŋ gana/ e wathi/ yansan mo, dhali ’cuḵi amana Baraabas mo –
19 wathi/ jin biṯkunu mo eya sijin mo gom gwo gi onuwa ’cesh e ’peŋkuman bampa/ mo dhali haali/ a’di ta’da man’kosha mee mo.
20 Dhala Bilaaṯus ṯorki uni gwo mo doḵ/e mmodina gwo a’di i bwa mo mmo’cuḵa Yesus mo be.
21 Hili uni cuukin ki dhan ’twa/ kun caaca mo ki: ’Koshi a’di ki cwany’ciṯẖan dhul mo ma. ’Koshi a’di ki cwany’ciṯẖan dhul mo ma.
22 Me’di kwara a’di ki o uni gwo mo ki: Goma tinta? tonthus wakata imiikina a’di mo? Aha/ dinaki gam miiŋ kamu/ jin ṯẖutha a’di mii mo jin midi ha me’d ki mowu mo. Gom mii gi wakan mo tani aha/ mina c̱i a’di monṯo’k mo dhali ’cuḵ a’di mo be.
23 Hili uni ’kokin mo mmo’cece’b gwo mo mmodoṯ gwo ki cuuwa/ kun caaca mo ki a’di minu ’taki ’kosh ki cwany’ciṯẖan dhul mo. Dhali ’twam buni p̱iki gwo jip̱i/ mo be.
24 Wakan Bilaaṯus a’di dhalki gwon dwall me’d mo ki gwom buni kun doṯa uni minu mii mo be.
25 A’di ’cuḵki uni wathi/ jin biṯu eya sijin mo gom gwo gi onuwa ’cesh mo dhali goma mee jin ’kosha a’di mo, a’di jin doṯkina uni mo, hila Yesus a’di c̱ikunu uni mo gom gwo gi bwam buni mo be.
Mo gi ’Koshuwa ’Kosh ki Cwany’ciṯẖan Dhul mo
26 Dhali me’d jin suskina uni a’di i bway mo tani uni bu’thki wathin ’de/ jin ta’da Simaan gi Paŋ Kerawaan mo, a’di jin yayi’d ’peni pa mo dhali uni ki ’thiḵ a’di cwany’ciṯẖan dhul piti m’ba/ mo mmoḵal a’di ŋ’ko’da Yesus mo be.
27 Dhali adhana waambuhany ’kwani baṯẖki a’di isho’k mo dhali ki up̱ ilu/ mo uni gun miikina c̱inthar mo dhali ko kagahara gom a’di mo be.
28 Hila Yesus ṯu’kki ’ban mo dhali o uni gwo mo ki: I’bwa/ gi ’Kwani gi Pa Urushaliim, dhalku/ ki ko gom aha/ mo ma, hili koyi gom is bum mo dhali gom uc̱im bum mo.
29 Haali/ hili mo mo ma, atee mini p̱u’du/ mo jin mina uni o gwo mo ki: Mom’bor mii gom uni gun tana burum mo dhali bwa kun molona dho’th ki sule/ mo dhala bor kun ’koki c̱iya ko mmop̱i ki sule/ mo.
30 Dhali yan’ko’d uni mini ṯel mii ’pen mo mmo/o wosha turga/ gwo mo ki: Biṯi ap̱o/ am mo ma, dhali e wosh kun boc̱a/ she/ ki: Kumi aman is mo ma.
31 Haali/ waḵki/ uni mii to yansan mo ki cwa yathaya’th mo tani atinta midi di mo ŋ’ko’d ki a’di midi ḵu’th mo?
32 ’Kwanin tiya ’koni su/ si’da/ uni kun ṯẖu’thki mii mo, uni suskunu ka pije/ mo mmo’kosh jwa mo nyaḵki a’di mo be.
33 Dhali ki uni p̱u’dkin mo e mo jin yuḵu ka Simaŋ ’Kup̱ mo tani uni ki ’kosh a’di ki cwany’ciṯẖan dhul mmun mo. Dhali uni gun ṯẖuthi mii mo, jan ṯal ’de/ ki ’bana bim poros piti mo dhali jan ṯal ’de/ ki ’bana biny cam piti mo be.
34 Dhala Yesus ki o gwo mo ki: Ababa, dhalki uni miinthus buni ’pen mo ma, haali/ uni ’koki mish to jin miina uni mo be. Dhali uni ṯa’kki to mo mmoḵwa/ burrinyem piti bwa mo.
35 Dhali ’kwani doshkin ki ’dishe/ mo mmohil mo mo, hili ’kwani kun tana ’kaŋ’kup̱ pa mo waḵki a’di mo mmo/o gwo mo ki: A’di woṯẖki kun tiya mo tani dhalki a’di woṯẖ is pitiŋ gana/ mo ma, waḵki/ a’di ta’da Ḵrisṯẖos ’peni Arumgimis mo, a’di jin ta jim pitin ’de/ jin kwanykunu mo.
36 Dhali i/askar si’da/ mii a’di ka maḵ mo. Uni iikin mo dhali c̱i a’di tom’pac̱a’d mo,
37 dhali mmo/o gwo mo ki: Waḵki/ /e tana Maliḵ gi ’Kwani Yahuuda/ mo tani woṯẖi/ is pini mo ma.
38 Dhali gwo si’da/ ’kwarkunu mo ŋ’kup̱i a’di mo ki: Yansan ta’da Maliḵ gi ’Kwani Yahuuda/ mo be.
39 Dhali jan ’de/ jin ṯẖuthi mii mo jin shirkunu ap̱o/ cwany’ciṯẖan dhul mo tani o a’di gwo mo mmo/o ki: Dina /e ki ta Ḵrisṯẖos ’taa? Woṯẖi is pini mo ma dhali aman mo.
40 Hili jaŋ kamu/ ḵucurki a’di ki gwo mo mmo/o gwo mo ki: Dina /e ki ḵo/ka Arumgimis mo ’taa? Haali/ /e dikin ’ko’di me’d gi gwon dwall gi miiwaḵ jin nyaḵa’d mo.
41 Dhali ana ka jiŋ gana/ miinu ka ḵar/e kan mo. Haali/ ana bu’thkina a’di jin minu mii c̱i ana mo gom mii gun miikina ana mo, hili wathi/ yansan diki ṯẖu’th toŋ kamu/ mii mo be.
42 Dhali a’di ki o gwo mo ki: Yesus, kayi aha/ e mo ma, ki /e mini p̱u’dku/ mo e mom’bi’th gi bampam pini mo.
43 Dhali a’di ki o a’di gwo mo ki: Ka jiŋ gana/ aha/ ona /e gwo mo ki: Shwane/ /e mini nyaḵ di ki aha/ mo e monyjaro/ e momis mo.
Mowu ma Yesus mo
44 Dhali mo wana e ka tente/ bwaŋ ’kup̱ mo tani dhali mondhurumi’d p̱u’dki’d mo ap̱o/ mony’ceshi ’baar mo ntaga tente/ mbum ’ban mo be.
45 Ka tente/ uski moŋkush piti mo tani dhali burrinye/ jin di’d e gu’b gi mondheleladhelel mo tani a’di dherkunu bwa mo ka ’ban su/ mo be.
46 Dhali yan’ko’d Yesus ki cuu ki dhan ’twa/ jin caaca mo mmo/o gwo mo ki: Ababa, e me’d pini mo tani aha/ c̱ikina /e shi/in pem mo be. Dhali ki a’di oki gwo yansan mo tani a’di ki c̱i shi/ir piti jiŋ ’ko’d mo.
47 Dhali ka mancil ma askar iss ’kwanimpa imudhe’d p̱arki a’di jin bu’thki mo e mo tani a’di maŋki’da Arumgimis mo dhali o gwo mo ki: Ka jiŋ gana/ wathi/ yansan a’di di’d ka p̱o/ mo be.
48 Dhali awaambuhany ’kwani ’baar mo kun tulki is mo mmop̱ar mo e mo tani ki uni p̱arki a’di jin bu’thki mo e mo tani uni doḵki bway pa mo mmodora bor buni ki me’d mo be.
49 Dhali aris ’kwani kun mishki a’di mo dhali up̱ mo, uni gun baṯẖki a’di nsho’k mo ’peni Pany Jaliil mo tani doshkin isa dhana/ mo dhali p̱ar to gwansan e mo be.
Mo gi Kanuwa Yesus mo
50 Dhali wathiŋ kamu/ di’d jin yuḵu gway ka Yuusup̱ mo, a’di ’peni pa gi ’Kwani Yahuuda/ mo jin yuḵu ka Arraama mo. A’di ta jan ’de/ ’peni montul is gi ’kwaniŋ gwanyjaḵa/ gi ’Kwani Yahuuda/ mo jin ta wathim ’boro’d mo dhali wathiŋ ḵar/e mo be.
51 A’di diki gam gwo me’d ki gwom buni gun ’ko uni mbwa mo dhali mii mo hili a’di c̱orki’da c̱or mo gom Bampa/ ma Arumgimis mo.
52 Wathi/ yansan yaki’d eya Bilaaṯus mo dhali doṯ a’di gwo mo gom is ma Yesus mo be.
53 Dhali yan’ko’d a’di ki bu’th a’di ka ’cesh mo dhali a’di ki ’tam a’di is ki burrinyen dhiny e mo dhali kar a’di e jis wosh jin c̱wanyu gom jis jwa mo jin dinuki kar jan ṯal ’deŋ kamu/ nycine/ naskina/ mo.
54 A’di ta’da tee jin Thosonkunu to mo dhali acim ma pesu/ ṯelkunu ’pen mo be.
55 Dhali up̱ kun nyaḵki ii ki a’di ’peni Pany Jaliil mo tani baṯẖkina baṯẖi sho’k mo dhali uni p̱arki moŋ’kup̱aje e mo dhali mo jin karkunu is piti nycine/ mo.
56 Dhali yan’ko’d uni ki doḵ bway pa mo dhali uni ki thoson to kun ḵuyi mo mo dhala yina p̱i’dna mo.
Dhali ka cim ma pesu/ mo tani uni siki is mo isi ki gwoŋḵan jin ’kwarkunu mo be.