9
Uni kun Hashu ka ’Kume’d I’ce’dka Su/ mo
1 Dhali a’di ki yuḵ uniŋ ’kume’d i’ce’dka su/ mmonṯal ’de/ mo dhali a’di ki c̱i uni mom’bi’th mo dhali moshirr mo ap̱owa risa ruma ’cesh mo dhali mmowac̱a ris mom’ba’th mo.
2 Dhali a’di hashki uni mo ka pije/ mmoc̱i gwo mo gom Bampa/ ma Arumgimis mo dhali mmowac̱a wac̱ mo be.
3 Dhali a’di ki o uni gwo mo ki: Dhalku/ ki ḵal to gom iim bum e bway mo ma, dhalku/ ki ḵal cwa mo walla ḵucaŋ mo walla maa mo mo walla guurush mo, dhali dhalku/ ki ta gi burrinyem bwamani su/ mo.
4 Dhali e gu’b yin jin mina umi cic̱ mo tani ’koyi mmaṯṯaan mo ma dhali ’peni maṯṯaan mo tani iiku/ mo ma.
5 Dhali e mo yin jin mina ’kwani ’koki bu’th um mo tani ki um murini dhal pa c̱aan ’pen mo tani piri abuhany ’peni sho’k bum mo ma. A’di ta gwo jin onu ap̱o/ uni mo be.
6 Dhali uni iikin mo dhali ii mo e bampa/ ’baar mo mmoc̱i gwom ’borga/ mo dhali mmowac̱a wac̱ mo e mo ’baar mo.
Mowu ma Yohaan jin Ta’da Manmiiya Mii ki Yi’de/ mo
7 Dhali ka Hirodus jin ta’da ra/iis rub ciḵki’da ris to gwansan kun miikunu mo tani a’di dumbulki mo mo haali/ gwo ona ’kwanin tiya mo ka Yohaan a’di ’de’kkunu mo ’peni mowu mo.
8 Dhali kun tiya o gwo mo ki Iliyya a’di piki’d mo dhali ’kwanin tiya o gwo mo ki a’di ta jan ’de/ ’peni imanc̱i gwo ma Arumgimis ka dhamo/ mo a’di cukunu mis mo.
9 Hirodus o gwo mo ki: AYohaan a’di i’ciṯẖka/ ’kup moyi. Hili wathi/ yansan ta’da ja mo jin ciḵkika/ aris to kun wakan mo? Dhali a’di ŋap̱ki’da ŋap̱ mo mmop̱ar a’di e mo be.
Mmoc̱i ’Kwani Alaap̱i Mudhe’d Tonṯe/ mo
10 Dhali e mondoḵ jin doḵkina imandhunu ki she/ mo tani uni ṯorki a’di to kun miikina uni mo be. Dhali a’di ki sus uni mo dhali uni ki ii mo uni ’cena mo e ’peŋkuman bampa/ jin yuḵu ka Beeṯsayda mo be.
11 Dhali ka waambuhany ’kwani da/arki gwo mo tani uni baṯẖki a’di isho’k mo dhali a’di hanki uni mo dhali ṯor uni gwo mo gom Bampa/ ma Arumgimis mo dhali wac̱ uni gwansan kun mini mii ta gi mowac̱ mo be.
12 Dhali ka tente/ di’d mo mmogala bi mo tani uniŋ ’kume’d i’ce’dka su/ mo p̱u’dkin mo dhali o a’di gwo mo ki: Hashka waambuhany ’kwani bway pa mo ma mmo/ii bampa/ mo dhali pa kun ’kon ka kukul is mo mmo/ish mo dhali mmogam tonṯe/ gom bway mo haali/ ana ’kona mo mmahan mo e mo jin dar gi ’kwani mo be.
13 Hili a’di ki o uni gwo mo ki: Um mini c̱i uni tonṯe/ mmoshwa mo. Dhali uni thoḵ a’di gwo mo ki: Ana dara gi to ki nyanye/ mo jasi maaŋḵuthu’di mudhe’d mo dhali to yi’de/ isu/ mo isi ciki/ ana mina mii ii mo dhali yol tonṯe/ goma ris ’kwani kun wakansan mo be.
14 Haali/ uni wana e ki iss ’kwanimpa gwas alaap̱i mudhe’d mo. Dhali a’di ki o imanciḵ a’di gwo gwo mo ki: Ṯuci uni mmo’ko ’pena ’cesh mo ma, e moŋ’kom buni ki iss su/ i’ce’dka ’kume’d mo ki she/ ki she/ mo be.
15 Dhali uni miiki a’di wakan mo dhali dhu uni ’baar mo mmo’ko ’pena ’cesh mo be.
16 Dhali a’di bu’thki maaŋḵuthu’di mudhe’d mo dhali to yi’de/ isu/ mo dhali a’di ki ’de’k e ki mis mo dhali ’bora ’bor bwa i is mo dhali ’ce’d uni mo dhali a’di di’d mmoc̱iki uni mo ki imanciḵ a’di gwo mo mmodhu ibwambor ma waambuhany ’kwani mo be.
17 Dhali aris uni ’baar mo shwakin mo dhali ’kokunu mo mmokap̱ mo be. Dhali uni ki tul uni is mo kun urki ’kup̱ mo dhali uni ’tu’dkina nura/ i’kume’d i’ce’dka su/ mo ki ’pisira/ maa mo be.
ABuṯerus A’di Ṯorki Mii eya Tente/ goma Yesus mo
18 Dhali a’di warki’d mo ki a’di di’d mo mmo’tho mo a’di ’de/ mo tani imanciḵ a’di gwo nyaḵ ’ko ki a’di mo dhali a’di ki doṯ uni gwo mo ki: Ki ’kwani o ki aha/ tana aja mo?
19 Dhali uni thoḵ a’di gwo mo ki: Ka Yohaan jin ta’da manmii ki yi’de/ mo ti. Kun tiya o gwo mo ki: Ki Iliyya mo, dhali kun tiya o gwo mo ki: Ki jan ’de/ ’peni imanc̱i gwo ma Arumgimis kadhamo/ mo jin cukunu mo.
20 Dhali a’di ki o uni gwo mo ki: Hili um o ki aha/ tana aja mo si’da/? Dhala Buṯerus thoḵ a’di gwo mo ki: AḴrisṯẖos ma Arumgimis mo be.
21 Hili a’di ḵanki uni gwo mo dhali ḵan uni gwo ki ḵan gana/ mo ki uni mini dhalku/ ki ṯor gwo yan ki wathin ’deŋ kamu/ mo
22 mmo/o gwo mo ki: Ya/ gi ’Kwani mina isi mii ’kosh ka nyor mo gom to ka ris mo dhali minu waḵ mo ki ’kwaniŋ gwanyjaḵa/ mo dhali ki igasiis mo dhali iman’kwar to mo dhali a’di minu ’kosh jwa mo dhali ka cim kwara mo tani a’di minu piyu/ mo be.
Yesus Ṯorki Wum Piti Nṯwa/a/ mo
23 Dhali a’di ki owa ris ’kwani ’baar mo gwo mo ki: Waḵki/ wathiŋ kamu/ midi yayu/ mmobaṯẖ aha/ isho’k mo tani dhalki a’di non is piti mo ma dhali ’de’k cwany’ciṯẖan dhul piti mo dhali baṯẖ aha/ m’pen mo be.
24 Haali/ a’diyin jin midi woṯẖ mondiki/em piti mo tani midi this a’di e mo dhali a’diyin jin midi this mondiki/em piti e mo gom gway pem mo tani a’di midi woṯẖ a’di mo be.
25 Haali/ to jin nyo/a wathi/ mo tani ta’da tinta mo waḵki/ a’di midi jar e e to gi mony’ceshi ’baar mo dhali this e mo walla ’ce’d sho’k mo ki is piti mo.
26 Haali/ a’diyin jin ’thena is ki aha/ mo dhali ki gwom pem mo tani e a’di si’da/ Ya/ gi ’Kwani mina isi ’the mo ki a’di midi p̱u’du/ mo e monycam piti mo dhali ki monyca ma Ababa mo dhali ki iman’doyu gwom piti kun ḵogu mo.
27 Hili aha/ ṯora um gwo ka jiŋ gana/ mo ki ’kwanin tiya doshkini mahan mo kun mini ’koki nyoḵ mowu nṯwa/a/ mo ki uni mini p̱ar Bampa/ ma Arumgimis e mo be.
Mmowarkin ma Yesus Jamas Piti mo
28 Dhali ki mo wana e ka cim pekwara ŋ’ko’di gwo gwansan kun okina a’di mo tani a’di ki susa Buṯerus nyaḵki a’di mo dhala Yohaan dhala Yakuub mo, dhali sus uni bway ’kuwosh jin turatur mo mmo’tho mo.
29 Dhali ki a’di diki’d mo mmo’tho mo tani jamas gi jis/em piti jin pikina a’di mo tani aŋkala/aŋkal mo dhali burrinyem piti warki’d ki ra/ ra/ mo dhali ki bany bany mo be.
30 Dhali hili ma, ’kwani su/ nyaḵkina ṯor ṯor ki a’di mo be, a’di jin ta’da Musa dhali Iliyya mo be.
31 Uni gun pikin mo e monyca mo dhali uni ki ṯor gwo mo gom yam piti jin mina a’di ya mo, a’di jin mina a’di ithim mo e Pa Urushaliim mo.
32 Buṯerus dhali uni gwansan kun nyaḵki ’ko ki a’di mo tani uni ’ce’da e is mo hili uni ’kokin mo mmorash e mer mo dhali uni p̱arki monycam piti e mo dhali ’kwani su/ gwansan kun doshkin mo nyaḵki a’di mo be.
33 Dhali ki ’kwani su/ iikin mo ’peni a’di mo tani Buṯerus o’da Yesus gwo mo ki: Tap̱a, a’di ’boro’d gom aman mmo’kona aman mmahan mo be. Dhalki aman nyaŋa um c̱iŋa/ ikwara mo ma, ’de/ gom /e mo dhali ’de/ goma Musa mo, dhali jaŋ kamu/ ’de/ gom Iliyya mo, haali/ a’di mol gwo jin ona a’di mo.
34 Dhali ki a’di o gwo yansan mo tani araḵ p̱u’dki’d mo dhali ’kam uni is ka la mo. Dhali uni ’kokin mo mmoḵo/ is mo me’d jin cic̱kina uni e bwam ma raḵ mo.
35 Dhali ’twa/ p̱u’dki’d mo ka pije/ ’peni bwam ma raḵ mo mmo/o gwo mo ki: Yan ta Ya/m pem mo, jim pem jin kwanyka/ mo. Ciḵi a’di gwo mo ma.
36 Dhali ki ’twa/ okunu gwo mo tani Yesus gamkunu a’di ’de/ mo. Dhali uni ’kon ki shwam mo dhali ṯor wathiŋ kamu/ ’de/ gwo mo ka cim gwansan yisa ma e to jin p̱arkina uni e mo.
Yesus A’di Wac̱ki’da ’Ci jin Bu’thkin ma Rum Thus jin Nyo/o’d mo
37 Dhali ka cim jiŋ ’ko’d mo tani ki uni thulkin ka ’cesh ’peni wosha turga/ mo tani awaambuhany ’kwani caaca kagahara mo gamki a’di ’kup̱ mo be.
38 Dhali hili mo mo ma, wathiŋ kamu/ ’peni bwam ma waambuhany ’kwani a’di cuuki’d mo ki: Manṯor Gwo, aha/ yuḵa /e mo mmohila hil ap̱o/ ya/m pem mo. Haali/ a’di ta ya/m pem jin di’d ṯal ’deŋ gana/ mo.
39 Dhali hili ma, arum thus bu’thki a’di mo dhali a’di ise/ ki cuu kagahara mo dhali a’di ki p̱esh mo ntagi a’di mii’da gabusha mo dhali a’di mompola is ki mombol mo dhali a’di diṯa mii mo mmodhal a’di ’pen mo.
40 Dhali aha/ yuḵkina imanciḵ /e gwo mo mmo/ur a’di ka pije/ mo tani hili uni mol a’di mii mo be.
41 Yesus thoḵ a’di gwo mo ki: Ayy um ’kwani kun aṯẖa moŋgam gwo is ki aṯẖ mo dhali kun c̱aca/ ii ki c̱aca/ mo eya nyaḵum yil bum mo tani aha/ mina di ka cim ekata mo e um mo dhali ’dim ’kup̱ e um mo? Susi ya/m pini mmahan mo ma.
42 Ki a’di di’d mmoyayu/ mo tani aruma ’cesh ki mombol a’di is mo dhali p̱esh a’di mo. Hila Yesus ki ḵucura rum thus jin nyo/o’d ki gwo mo dhali a’di ki wac̱a ’ci mo dhali a’di ki c̱i a’di ka nyaŋ’ko’d e com mo.
43 Dhali aris ’kwani ’baar mo ’kokin mo mmomer mo gom mo/eḵ ma Arumgimis mo be.
Doḵ/e aYesus A’di Ṯorki Mowum Piti Nṯwa/a/ mo be
Hili ki uni ’kokin mo mmomer mo goma ris to ’baar mo jin miikina a’di mo tani a’di ki o imanciḵ a’di gwo gwo mo ki:
44 Dhalki gwo gwansan hur bwany’cem bum mo ma, haali/ Ya/ gi ’Kwani minu c̱i mo e me’d gi ’kwaniny’cesh mo.
45 Hili uni ’koki mish gwo yansan ’ban mo jin okina a’di mo dhali gwo yan a’di bagkunu mo ’peni uni mo ki uni mini ’koki nyiṯẖ a’di mo dhali uni ḵo/ a’di mo mmodoṯ a’di gwo mo gom gwo yansan mo be.
Kaja A’di Icade?
46 Dhali gwo jin wala uni cuki’d mo e bwam uni mo mmo/o gwo mo ki: Kaja a’di ica’d ki tiya i bwam uni mo?
47 Hili ka Yesus nyiṯẖki gwo kun kuluma uni eya dum buni mo tani a’di ki bu’th ara ’ci mo dhali kar a’di e ’ko’d gwar piti mo
48 dhali o uni gwo mo ki: A’diyin jin midi bu’th ara ’ci yansan ki gway pem mo tani a’di bu’thki aha/ mo be dhali a’diyin jin midi bu’th aha/ mo tani bu’thki a’di a’di jin hashi aha/ mo haali/ a’di jin midi p̱is mo mbwam umi ’baar mo tani a’di ta jan ṯal ’de/ jin caaca mo be.
A’di jin Diki Di Ap̱o/ Um mo tani A’di Ta A’di gom Um mo be
49 Dhala Yohaan thoḵ a’di gwo mo ki: Tap̱a, am mishkina wathiŋ kamu/ urki’da ruma ’cesh ka pije/ ki gway pini mo dhali aman nonkina a’di mo haali/ a’di diki baṯẖ ana isho’k mo be.
50 Hila Yesus thoḵ a’di gwo mo ki: Dhalku/ a’di ki non mo ma, haali/ a’di c̱aan jin diki di ap̱o/ um mo tani a’di ita a’di gom um mo be.
Yesus Ḵucurki’da Yakuub dhala Yohaan mo be
51 Ki mom piti ’dishkina ’twa/ mo jin minu bu’th a’di mo tani a’di ki kar jis/em piti mo mmoya bway Pa Urushaliim mo. Dhali a’di ki hash iman/ii nṯwa/a/ ki a’di mo.
52 Dhali uni iikin mo dhali cic̱ mo e Bampa/ gi Pan Saamira mmothoson to gom a’di mo be.
53 Hili ’kwani ’koki bu’th a’di mo haali/ jis/em piti karkina a’di mo ’kup̱ ki Pa Urushaliim mo be.
54 Dhali ki imanciḵ a’di gwo jin ta’da Yakuub dhala Yohaan p̱arki a’di e mo tani uni o a’di gwo mo ki: Tap̱a, /e ŋap̱i aman mo mmoḵan o’d gwo mo mmothulu/ ka ’cesh ’peni momis mo dhali shwa uni mo ’taa?
55 Hili a’di ṯu’kki’da bor mo dhali ḵucur uni ki gwo mo be.
56 Dhali uni iikin mo e bampaŋ kamu/ mo.
Uni kun Mini ’Taki Baṯẖa aYesus Nsho’k mo
57 Me’d jin iikina uni e bway tur ki sule/ mo tani wathiŋ kamu/ ki o a’di gwo mo ki: Aha/ mina baṯẖ /e m’pen mo e mo ’baar mo jin mina /e iya mo be.
58 Dhala Yesus ki thoḵ a’di gwo mo ki: Amaḵ uni ta gi jis mo dhali ’dii kun p̱en e momis mo tani ta gi gu’b mo. Hili Ya/ gi ’Kwani a’di dar gi mo mo mmokar ’kup piti nycine/ mo be.
59 Dhali e wathiŋ kamu/ a’di ki o a’di gwo mo ki: Baṯẖi aha/ m’pen mo ma. Hili a’di ki o a’di gwo mo ki: Tap̱a, dhalki aha/ yana nṯwa/a/ mo dhali kan ababam pem mo.
60 Hili a’di ki o a’di gwo mo ki: Dhalki jwa uni kan c̱eny jwam buniŋ gana/ mo ma. Hili gom /e mo tani yayi mo dhali ṯor Bampa/ ma Arumgimis eya tente/ mo.
61 Dhali jan ’deŋ kamu/ o a’di gwo mo si’da/ ki: Aha/ mina baṯẖ /e nsho’k mo Tap̱a. Hili dhalki aha/ ona gwo nṯwa/a/ mo mmotaḵ uni gwansan kun ’koni gu’b pem mo.
62 Yesus ki o a’di gwo mo ki: Jaŋ kamu/ yisa di’d ’deya jin karki me’d piti ap̱o/ to jin goru a’cesh mo dhali mmohil ka isaŋ’ko’d mo a’di jin midi ha me’d mmo’kosh jwa ki Bampa/ ma Arumgimis mo.