21
Mo jin P̱inu Mii E mo Mmocic̱ Pa Urushaliim mo
1 Dhali ki uni ’dishkin e Pa Urushaliim mo dhali p̱u’d mo e Pam Beeṯp̱aji mo e ’Kuwosh Seṯuun mo tani yan’ko’d Yesus ki hash imanciḵ a’di gwo isu/ mo
2 mmo/o uni gwo mo ki: Iiku/ mo ma e bampa/ jin di’d ka p̱ar ’bani um mo dhali ki jahanne/ um mini gam thuluny jin shi’du/ mo dhali aran nyaḵ di ki a’di mo. ’Cuḵi uni mo dhali ’doyu/ uni i aha/ mo ma.
3 Waḵki/ wathin ’deŋ kamu/ midi ’taki o um gwo mo tani um mini o a’di gwo mo ki: Tap̱a a’di midi mii ta gi uni mo dhali a’di midi doḵu/ uni ki jahanne/ mo be.
4 Mii yansan a’di bu’thki mo mo jin minu thim gwo mo, a’di jin okin ma manc̱i gwo ma Arumgimis kadhamo/ mo mmo/o gwo mo ki:
5 Ṯori ’bwa/ ma Sihyuun gwo mo ma,
hili amaliḵ pini a’di p̱u’dki’d e /e mo
mmokar is ki gwa’d mo, dhali a’di merki thuluny ap̱o/ mo,
dhali eya p̱o/ ari thuluny mo, a’di jin ta arin thuluny mo.
6 Imanciḵ a’di gwo uni iikin mo dhali mii a’di me’d gwo ma Yesus jin ḵankina a’di uni mo be.
7 Uni suski thuluny dhali aran mo dhali p̱a’d burrinyem buni ap̱o/ uni mo, dhali a’di merki a’di ap̱o/ mo be.
8 Dhala waambuhany ’kwani ’dishkina ’twa/ m’baar mo uni kun p̱a’dki burrinyem buni mbway mo dhali kun tiya uni ḵwa/kina biny cwa mo dhali p̱a’d uni e bway mo be.
9 Dhala waambuhany ’kwani iikini bwambori a’di mo dhali uni gun baṯẖki a’di nsho’k mo tani ḵumki cuuwa/ mo ki: Hosanna e Ya/ ma Dawuu’d mo. Mom’bor mii gom a’di jin yayi’d ki gway gi Tap̱a mo. Hosanna a’di jin di’d e mo jin eḵa/ eḵ mo.
10 Dhali ki a’di cic̱ki’d mo e Pa Urushaliim mo tani aris ’kwani gi ’peŋkuman bampa/ uni c̱i’thkunu is ki mii mo mmo/o gwo mo ki: Kaja a’danne?
11 Dhala waambuhany ’kwani o gwo mo ki: Yansan ta’da Manc̱i Gwo jin ta’da Yesus ’peni Pa Naasira gi Pany Jaliil mo be.
Mmodhelel Gu’b gi Mondheleladhelel mo
12 Dhala Yesus cic̱ki’d e gu’b gi mondheleladhelel ma Arumgimis mo dhali urki’da ris uni ka pije/ mo uni gun yolki to mo dhali kun yoli to mo e gu’b gi mondheleladhelel mo. Dhali a’di ki ’daŋkala tharabeesa gi uni gun wani emena guurush mo dhali moŋ’ko gi uni gwansan kun yoli gurko/ mo be.
13 A’di ki o uni gwo mo ki: A’di ’kwarkunu mo ki: Gu’b pem minu yuḵ ki gu’b gi mon’tho mo. Hili um ki mii a’di me’d gu’b gi ’kwanin ’di/ mo be.
14 Dhali ’kwaniny ja’da/ dhali uni gun ta ŋwol p̱u’dkini a’di mo e gu’b gi mondheleladhelel mo dhali a’di wac̱ki uni mo be.
15 Dhali hili ki igasiis kun can mo dhali iman’kwar to mo p̱arki miim ’borga/ kun miikina a’di e mo tani dhali uc̱i mmogwona uni mo e gu’b gi mondheleladhelel mo ki: Hosanna e Ya/ ma Dawuu’d mo tani, uni ’kokin ka nyora du mo be.
16 Dhali uni ki o a’di gwo mo ki: A/e ciḵki gwo jin ona uni gwansan mo? Dhala Yesus ki thoḵ uni gwo mo ki: Nye. ’Kona um ki deŋ gwo e ki suny suny mo ’taa? jin o gwo mo ki:
’Peni ’twa/ uc̱i dhali uni gun p̱ina ko mo tani
/e ḵalki momaŋa ’borgaŋ gana/ mo be.
17 Dhali a’di ki dhal uni ’pen mo dhali ya mo e ’peŋkuman bampa/ gi Pam Beeṯaniya mo dhali c̱a’b e mun mo be.
Cwamp̱u/ jin Jeekunu mo
18 Dhali ki mo ta mon’thamo/ mo tani me’d jin doḵkina a’di e ’peŋkuman bampa/ mo tani a’di ’koshkina ṯe/ mo be.
19 Dhali a’di yaki’d mo mmoŋap̱a p̱u/ mo jin di’d e shemen bway mo dhali ki a’di yaki’d mo dhali diki gam maman ṯal ’de/ ’peni a’di mo tani hili jasi ’cemen uni ’cena mo be. Dhali a’di ki o a’di gwo mo ki: Maman ’peni /e mo tani minu ’koki piyu/ shush ka pije/ ki sule/ sule/ mo doḵ/e. Dhali ap̱u/ a’di ḵu’thki’d ki jahanne/ mo be.
20 Dhali ki imanciḵ a’di gwo p̱arki a’di e mo tani uni merkin mo mmo/o gwo mo ki: Hili atinta lan ma p̱u/ ḵu’th hila/ ki jahanne/ kan mo?
21 Dhala Yesus ki thoḵ uni gwo mo ki: Ka jiŋ gana/ aha/ ona um gwo mo ki: Waḵki/ um mini ta gi moŋgam gwo is mo dhali ’koki shi/ bwa ’kup̱ mo tani um mini ’koki mii jasi a’di jin miikunu mo gom cwamp̱u/ yan mo. Hili waḵki/ um mini owa dhan wosha turga/ yansan gwo mo ki: Dhalki a’di gunu mo dhali biṯ mo e bwam ḵumma/ yi’de/ mo tani, a’di minu mii mo be.
22 Dhali ma to yin jin mina umi doṯ ki mon’tho mo tani um mini bu’th a’di mo waḵki/ um ta gi moŋgam gwo is mo be.
Moshirr ma Yesus Doṯkunu Gwondoṯ mo
23 Dhali ki a’di p̱u’dki’d mo e gu’b gi mondheleladhelel mo tani igasiis kun can dhali ’kwani gwanyjaḵa/ gi ’kwani mo, uni p̱u’dkini a’di mo me’d jin ṯorkina a’di gwo mo dhali o gwo mo ki: Ki moshirr jana sa/ mmiikina /e aris to gwansani ’baar mo kan? Dhali aja a’di ic̱iki /e moshirr yansan mo?
24 Yesus ki thoḵ uni gwo mo ki: Aha/ si’da/ mina thoḵ um gwondoṯ mo dhali waḵki/ um mini ṯor aha/ gwon thoḵ mo tani yan’ko’d aha/ si’da/ mina ṯor um gwo mo gom gwo gi moshirr yan jin miikika/ to gwansan mo be.
25 Ki mo jin miin ma Yohaana mii ki yi’de/ mo tani ’peni mana moye? ’Peni momis mo ’taa? Walla ’peni ’kwani mo? Dhali uni walkin ka rem ’kup̱ mo mmo/o gwo mo ki: Waḵki/ ana mina ’taki o ki ’peni momis mo tani a’di midi ’taki o ana gwo mo ki: Ba tinta ’kona um ki gam a’di gwo is mo?
26 Hili waḵki/ ana ona ki, ’peni ’kwani mo tani, ana ḵo/kina waambuhany ’kwani mo. Haali/ uni ’baar mo karkina Yohaan ka manc̱i gwo ma Arumgimis mo be.
27 Wakan uni thoḵkina Yesus gwo mo ki: Aman mola mo mo be. Dhali a’di ki o uni gwo mo ki: Wakan si’da/ aha/ mina diki ṯor um gwo mo gom moshirr yan kun miikika/ aris to gwansan mo be.
Gwom ’Bith/e gom Iya/ Isu/ mo
28 Dhali um kulumki gwo mbwa wakata mo? Gom wathi/ jin ’kona iya/ isu/ mo. Dhali a’di yaki’d mo e a’di jin ta’da bwanyara/ mo dhali o a’di gwo mo ki: Ya/uma, yaku/ mo dhali miiya ṯu’c e bwaman monsinu shwane/ mo.
29 Dhali a’di ki thoḵ a’di gwo mo ki: Aha/ mina ya yisa. Hili ŋ’ko’d mo tani a’di rici’da du is mo dhali ya mo be.
30 Dhali a’di yaki’d mo e a’di jin ’kon ma p̱o/i su/ mo dhali o a’di gwon ṯal ’de/ mo. Dhali a’di ki thoḵ a’di gwo mo ki: Aha/ mina ya mo gana. Hili a’di diki ya mo be.
31 Jana ’peni bwam uni su/ gwansan jin miiki bwa gi com mo? Uni ki thoḵ a’di gwo mo ki: Jin ṯwa/a/ mo be. Dhala Yesus ki o uni gwo mo ki: Ka jiŋ gana/ aha/ ona um gwo mo ki, imantera thulp̱a/ dhali uni gun mii miinyc̱al mo tani mini ii nṯwa/a/ ki um mo e Bampa/ ma Arumgimis mo be.
32 Haala Yohaan p̱u’dki’d mo e um mo ki bway gi miiŋḵar/e mo. Dhali um ’koki gam a’di gwo is mo. Hili imantera thulp̱a/ dhali uni gun mii miinyc̱al mo tani uni gamki a’di gwo is mo be. Dhali hili me’d jin hilkina um a’di mo tani ŋ’ko’d um ’koki rica du is mo dhali gam a’di gwo is mo be.
Gwom ’Bith/e gom Bwaman mo ma Mura’th jin Sinu mo dhali Imanhil Mo mo
33 Ciḵi gwom ’bi’th/eŋ kamu/ mo. Wathi/ jin cila gu’b mo di’d mo a’di jin thosonki mo mo e monsinu mo dhali a’di ki nyaŋa goŋ mmo’kam a’di is mo. Dhali a’di ki c̱wany mo mo mmonyu/a mura’th nycine/ mo dhali a’di ki nyaŋ gu’ba turga/ mo dhali a’di ki dhal a’di e uni gun miina ṯu’c mo dhali a’di ki ya bampa/ jin si’dasi’d mo be.
34 Dhali ki yil gi maman cwa ’dishi ’twa/ mo tani a’di hashki c̱iŋkinam piti e uni gun miina ṯu’c mo mmoḵali maman cwam piti mo be.
35 Dhali imanmiiya ṯu’c bu’thki c̱iŋkinam piti mo dhali dor jan ’de/ mo dhali jaŋ kamu/ ’koshkina uni jwa mo dhali jaŋ kamu/ ’koshkina uni ki wosh mo be.
36 Dhali doḵ/e a’di ki hash c̱iŋkinam piti mo, a’di jin bol kun ṯwa/a/ e ka ris mo, dhali uni mii uni ki miin ṯal ’de/ mo jin miina uni mo be.
37 Yan’ko’d a’di ki hash ya/m pitiŋ gana/ e uni mo mmo/o gwo mo ki: Uni mini taḵ ya/m pem mo be.
38 Hilki imanmiiya ṯu’c p̱arki ya/ e mo tani uni o gwo mo c̱em buni mo ki: Yan ti nta a’di jin midi ḵal mal mo. Iiyu/ mo ma, dhalki ana ’kosha a’di jwa mo dhali ḵal mal piti mo.
39 Dhali uni bu’thki a’di mo dhali biṯ a’di ka pije/ ’peni bwaman monsinu mo dhali ’kosh a’di jwa mo be.
40 Dhali wakan ki com jin cila monsinu mo midi p̱u’du/ mo tani a’di midi mii atinta mo gom imanmiiya ṯu’c gwansan mo?
41 Uni ki thoḵ a’di gwo mo ki: A’di midi dhu uni gwansan kun ta ’kwanin thus mo e mowu jin ḵa/aḵa/ mo, dhali dhal monsinum piti ki imanmiiya ṯuca tiya mo, uni gun mini c̱i a’di maman cwa gi yil buni mo be.
42 Yesus ki thoḵ uni gwo mo ki: ’Kona um ki deŋ gwo e ki suny suny mo ’taa e Gwo ma Arumgimis jin ’kwarkunu mo ki:
Ki wosh gana/ yansan jin nyaŋkunu gu’b mo tani waḵkina imannyaŋ gu’b mo
dhali a’di warki’d mo ki dhan ’kup̱an wosh gi ’pena bi mo.
Mii yansan a’di ita mii jin miikina Tap̱a mo,
dhali a’di ta mii jin meru em bana mo be.
43 Wakan aha/ mina ṯor um gwo mo ki: Bampa/ ma Arumgimis mo minu bu’th ’peni um mo dhali c̱i a’di ki kala kamu/ mo jin midi dho’th maman e a’di mo be.
44 Dhali a’di jin midi ’bar ap̱o/ ’kuwosh yansan mo tani midi ’ce’d bwa ka ’ci’cimi’th mo, hili ki a’di midi biṯ ap̱o/ jan ’deŋ kamu/ mo tani midi yap̱ a’di mo be.
45 Dhali ki igasiis kun can dhali ’Kwani P̱arisiyiin ciḵki gwom ’bi’th/em piti mo tani uni nyiṯẖki gwo ki a’di oki gwo gom uni mo be.
46 Hili ki uni palki mii mmobu’th a’di mo tani uni ḵo/kina waambuhany ’kwani mo haali/ uni karki a’di ka manc̱i gwo ma Arumgimis mo be.