8
Yesus Dhelelki Wathi/ jin ’Kosha Monthus Is mo
1 Ki a’di thulki’d ka ’cesh mo ’peni ’kuwosha turga/ mo tani adhana waambuhany ’kwani kun caaca baṯẖki a’di m’pen mo be.
2 Dhali hili wathi/ jin ’kosha monthus p̱u’dki’di a’di mo dhali c̱a’bki jiŋ ’kup̱a’dup̱uni bwambori a’di mo mmo/o gwo mo ki: Tap̱a, waḵki/ /e ona bwa mo tani /e mishi aha/ mmodhelel mo be.
3 Dhali a’di ki he’th me’d piti mo dhali ta a’di is ki me’d mo mmo/o gwo mo ki: Aha/ ona bwa mo be. Dheleli mo ma. Dhali ki jahanne/ monthus piti dhelelkunu mo be.
4 Dhala Yesus ki o a’di gwo mo ki: Hili /e mini dhalku/ ki o wathiŋ kamu/ gwo mo gom ton ṯal ’de/ yan mo. Hili yaku/ mo dhali ṯor is pini ka gasiis mo dhali c̱i a’di to jin ḵan ma Musa gwo mo e gwoŋḵan mo haali/ a’di ta to jin nyo/i gwo gom ’kwani mo be.
C̱iŋkina/ ma Mancil ma Askar Iss ’Kwanimpa Mmudhe’d jin Wac̱kunu mo
5 Me’d jin cic̱kina a’di mo e Paŋ Kap̱ranahuum mo tani amancil ma askar iss ’kwanimpa mmudhe’d mo tani p̱u’dki’d ’kup̱ ki a’di mo mmoŋap̱ a’di mo,
6 dhali o gwo mo ki: Tap̱a, c̱iŋkinam pem ishki ’ko’da ’cesh ki ’ba’th jin muṯṯ a’di is mo e pa mo dhali a’di shwan ma c̱isa nyor mo be.
7 Dhali a’di ki o a’di gwo mo ki: Aha/ mina yaku/ mo dhali wac̱ a’di mo be.
8 Hili amancil ma askar iss ’kwanimpa mmudhe’d thoḵ a’di gwo mo ki: Tap̱a, aha/ dinaki ha me’d mo jin mina /e yayu/ mo eya galgin gu’b pem mo. Hili oyi jasi gwo mo ’te/ dhali c̱iŋkinam pem minu wac̱ mo be.
9 Haali/ aha/ tana wathi/ jin di ’ko’d e moshirr mo. A/askar ’koni bwam me’d pem mo, dhali ki aha/ ona gwo e jan ṯal ’de/ mo ki: Yaku/ mo tani dhali a’di yaki’d mo. Dhali aha/ ki o gwo e jan ṯal ’deŋ kamu/ mo ki: Yayu/ mo tani a’di yayi’d mo be, dhali e c̱iŋkinam pem ki: Miiyi yan mo ma tani dhali a’di miiki a’di mo be.
10 Ka Yesus ciḵki gwom piti mo tani a’di merki’d mo dhali o uni gwansan gwo kun baṯẖi a’di nsho’k gwo mo ki: Ka jiŋ gana/ aha/ ona um gwo mo ki: Jan ’deŋ kamu/ yisa di’da e ’Kwani ma Israyiil jin gamkika/ jin ta’d gi moŋgam gwo is gi wakansan mo be.
11 Aha/ ṯora um gwo mo ki: Ama’diny ’kwani ka ris mini p̱u’du/ mo ’peni mom’pesho’k mo dhali ’pena bora luŋgu’b mo dhali ’ko atharabeesa nyaḵka Ibrahiim mo dhala Is/hak mo dhala Yakuub mo e Bampa/ gi Momis mo be
12 ki iya/ gi Bampa/ gi Momis mo minu ṯa’k mo e mondhurumi’d jin ta’da ’tum ka ’tum mo tani e mun mo tani ’kwani mini ko mo dhali ’pe’d shem buni mo be.
13 Dhali eya mancil ma askar iss ’kwanimpa mmudhe’d mo tani Yesus ki o a’di gwo mo ki: Yaku/ mo ma. Dhalki a’di miinu mo gom /e mo me’d jin gamkina /e gwo is mo be. Dhali c̱iŋkina/ a’di wac̱kunu mo eya tee c̱aan ki e ’kamu’thki’d mo be.
Yesus Wac̱ki’da Mar ma Buṯerus jin Ta’da ’Bomi mo
14 Dhali ka Yesus cic̱ki gu’b ma Buṯerus mo tani a’di p̱arki’da mar ma Buṯerus e mo jin ta’da ’bomi mo mmo/isha a’di mmo’batha a’di is ki ’ba’th mo.
15 A’di ki ta ayim is ki me’d mo dhali ’ba’th dhalki’da yim ’pen mo dhali ayim cuki mis mo dhali mii a’di to mo be.
16 Ki mom’pimpili/ mo tani uni ḵalki ’kwani i a’di mo aris uni gun bu’th ma ruma ’cesh mo dhali a’di ki ura rum thus kun nyo/on ka pije/ mo ki gwo mo dhali a’di ki wac̱ uni ’baar mo kun ’kokin mo mmo’ba’th mo be.
17 Dhali a’di yan ta gwo jin minu thim mo me’d gwo jin okin ma manc̱i gwo ma Arumgimis kadhamo/ mo jin ta’da Ishaya mo ki: A’di ḵalki isa nyor bana mo dhali ḵalki aris ’ba’th jin ’koshki ana mo be.
Uni kun Mini ’Taki Baṯẖa aYesus Nsho’k mo
18 Dhali ka Yesus p̱arki’da waambuhany ’kwani e kun ’kamki a’di mo tani a’di ḵanki gwo mo mmoya mo mmo’ciṯẖa/ gap̱ ki ’bana kamu/ mo be.
19 Dhala man’kwar to p̱u’dki’d mo dhali o a’di gwo mo ki: Amanṯor Gwo, aha/ mina baṯẖ /e nsho’k mo e mo ’baar mo jin mina /e iya mo.
20 Dhala Yesus ki o a’di gwo mo ki: Amaḵ uni ta gi jis mo dhali ’dii kun p̱en e momis mo tani uni ta gi gu’b mo. Hili, Ya/ gi ’Kwani mo tani a’di dar gi mo mo mmokar ’kup̱ piti nycine/ mo be.
21 Dhala manciḵ gwoŋ kamu/ o a’di gwo mo ki: Tap̱a, dhalki aha/ yana nṯwa/a/ mo mmokana babam pem mo.
22 Hila Yesus ki o a’di gwo mo ki: Baṯẖi aha/ m’pen mo ma dhali dhalki jwa kan c̱eny jwam buniŋ gana/ mo.
Yesus Doshki’da Dhana P̱unthar ’Tham mo
23 Dhali ki a’di cic̱ki’d e bwaaḵur mo tani imanciḵ a’di gwo baṯẖki a’di isho’k mo be.
24 Dhali hili adhana p̱unthar ’tham caaca cuki mis mo e bwam yi’de/ mo, wakan dhala ḵur a’di borkunu mo ki yi’de/ jin bir bakal mo. Dhali hili a’di ishki e mo be.
25 Dhali uni iikin mo mmomer a’di e mo mmo/o gwo mo ki: Woṯẖi/ awoṯẖ mo ma, Tap̱a. Ana ’ce’da sho’k mo be.
26 Dhali a’di ki o uni gwo mo ki: Atinta ḵo/ka um is mo kan, ayy um ’kwani kun gwa’da moŋgam gwo is ki gwa’d kan mo? Dhali yan’ko’d a’di ki cu mis mo dhali ḵucur ’tham ki gwo mo dhali yi’de/ mo dhali adhan mo dosh ki biyuu mo be.
27 Dhali ’kwani merkin mo mmo/o gwo mo ki: Ki wathi/ jana a’danne, ki ’tham dhali yi’de/ ha a’di gwo e mo kan?
’Kwani gi Paŋ Gadara kun Bu’th ma Ruma ’Cesh mo
28 Dhali ki a’di p̱u’dki’d ki ’bana gap̱a kamu/ jin ta bampa/ gi Paŋ Gadara mo tani ’kwani su/ ’kon kun takin ga rum thus kun nyo/on mo gamki a’di ’kup̱ mo kun iiyin ’peni moŋ’kup̱aje mo. Uni shwana nyor kagahara ki jan ṯal ’deŋ kamu/ midi diki ya ki bway c̱aan mo be.
29 Dhali hili uni cuun kagahara mo ki: /E mini miiya tinta e am mo ayy Ya/ ma Arumgimis? /E p̱u’dkin mo mmahan mmodhu am ki isa nyor nṯwa/a/ ki mo diki p̱u’d mo naskina/ ’taa?
30 Dhali ama’diny ḵuthar ’kokin mo mmoshwa mo isa dhana/ mo ’peni uni mo.
31 Dhali arum thus kun nyo/on ki doṯ a’di gwo mo ki: Waḵki/ /e mini dhu am ’pen ka pije/ mo tani hashi aman mo e bwaŋ ḵuthar mo ma.
32 Dhali a’di ki o uni gwo mo ki: Iiku/ mo. Wakan uni iikin mo ka pije/ mo dhali se mo e bwaŋ ḵuthar mo. Dhali hili ama’diny ḵuthar uni yakina wac̱a/ ka luŋgu’b mo e bwaman ma gap̱a al mo dhali uni ’ce’dkunu sho’k ki yi’de/ mo be.
33 Dhali imanhil ḵuthar uni sokin mo dhali uni iikin mo e ’peŋkuman bampa/ mo dhali uni ṯorkina ris to gwansan mo dhali gom to kun miikunu mo goma rum thus kun nyo/on mo.
34 Dhali hili aris ’kwani gi ’peŋkuman bampa/ uni p̱u’dkin mo mmogama Yesus ’kup̱ mo. Dhali ki uni p̱arki a’di e mo tani uni doṯki a’di mo mmodhal mom buni gun ’kokina uni ’pen mo be.