101
Gway ma Dawuu’d
Aha/ mina yuḵ gway ki yuḵa gayiin mo dhali ki mo ma ḵar/e mo.
E /e mo tani ayy Tap̱a, aha/ mina yuḵ gway mo.
Aha/ mina yip̱ ’kup̱ ki bway kun ’konu ki dar gi mii ’ba/ mo.
Ayy, kakasja imina /e p̱u’du/ i aha/ mo?
Aha/ mina ya ki dar gi ŋadhum eya dum pem
e gu’b pem mo.
Aha/ mina diki kar e bwambor jis/em pem mo,
ma toŋ kamu/ jin ’coḵa’coḵ mo.
Aha/ shina mii gi uni gwansani e mo kun ṯa’kkin ’peni bway gana/ mo.
Uni mini ’koki thal aha/ mo.
Mo jin iinu ki c̱a’ckon eya du mo tani midi si’d ’peni aha/ mo.
Tonthus miga/ mol mo be.
A’di jin thuthi’da mannyaḵ ’dish gu’b piti ’pen ka ḵwal is mo tani
aha/ mina ’ce’d a’di sho’k mo.
Wathi/ jin ’theḵ ’ba/ mmis dhali jin kar ’ba/ ki ca mo eya dum piti mo tani
aha/ mina mish a’di ’dim ’kup̱ yisa.
 
Aha/ mina hila hil ki mo/en ap̱o/ uni kun ta ku isiŋ gana/ e mony’cesh mo,
ki uni mini nyaḵ ’ko ki aha/ mo be.
A’di jin yaki’d e bway jin ’konu ki dar gi mii ’ba/ mo tani
a’di imidi mii aha/ to mo be.
Wathiŋ kamu/ jin boṯo’d ki mo ma he’k e isa yempa/ mo tani
a’di midi c̱a’bi gu’b pem yisa.
Wathiŋ kamu/ jin baha’da ṯor ka yempa/ mo tani
a’di mol ṯikir c̱a’b e buŋ’kus pem mo be.
Mon’thamo/ itan mon’thamo/ mo tani aha/ mina ’ce’d uni sho’k mo,
aris uni kun ta thus ki thus kun ’kon e mony’cesh mo,
mmo’ciṯẖa ris tonthusi ’baar mo kun miina imanmii uni mo
’peni ’peŋkuman bampa/ gi Tap̱a mo.