108
Gway. Gway jin ta gway ma Dawuu’d.
Adum pem thosonki is mo, ayy Arumgimis. Adum pem thosonki is mo.
Aha/ mina yuḵ gway mo, aha/ mina yuḵ gway mmomaŋa maŋ mo.
Meri e mo, aḵashiram pem.
Meri e mo, ayy adheŋdhenye/ dhala dheŋdhenye/ jin ’kon ma shu/i pesu/ mo.
Aha/ mina mer mon’twash/e e mo.
Aha/ mina c̱i mo jin ’boruwa ’bor bwa i is ki /e mo, ayy Tap̱a, e bwaman ma ris ’kwani mo.
Aha/ mina yuḵ gway mmomaŋ /e e bwaman kal gi ’kwaniny’cesh mo.
Gom mo/en pini jin ṯelu sho’k mo ap̱owa dhan momis mo,
mo ma isiŋ ganam pini a’di jithirki’d e bwaman ma raḵ mo.
Kari is pini ki ca mo, ayy Arumgimis, ap̱o/ momisi ’baar mo.
Dhalki monycam pini a’di di’da p̱o/ mony’ceshi ’baar mo.
Ki a’dim pini jin enu minu ’cuḵ mo tani
/e ki c̱i mowoṯẖ ka bim poros pini mo, dhali thoḵ aha/ ’twa/ mo.
 
Arumgimis oki gwo is e mom piti jin ḵogu mo mmo/o gwo mo ki:
Aha/ mina ya i mis ki moŋ’kuny bwa mo dhali ḵwa/ Pan Shakiim bwa mo
dhali ’to/ to bwa ime’d mo e embul Wosh ma Sukkuut mo.
Jil/aad a’di ta jim pem mo, dhala Manassa a’di ta jim pem mo,
dhala Ep̱rayim a’di ta toŋ’kup̱ pem mo.
Yahuuda/ a’di ta cwa ma maliḵ pem mo.
Muwab a’di ta’da ḵwalal pem jin ’thurka/ me’d mo
dhali e Pan Aduum mo tani aha/ mina biṯa p̱p̱a/ pem mo,
dhali ap̱o/ e Pam P̱alasthiin mo tani aha/ mina ’ther cuuwa/ ki mo jin p̱inu mii e mo.
 
10 Kaja a’di imidi shu aha/ bway e ’peŋkuman bampa/ jin ṯenu gwo mo?
Dhali kaja a’di jin midi shu aha/ bway e Pan Aduum mo?
11 Ki diki ta /e iwaḵki aman mo, ayy Arumgimis?
/E diki nyaḵ ya ki aman mo, ayy Arumgimis, nyaḵki ’kwani ma meem bam mo.
12 Ayy c̱iyi aman mowoṯẖ ’peni ’kup̱ bam mo ma,
haali/ mowoṯẖ ’peni ’kwani mo tani ta jim p̱e’th mo.
13 Ka Arumgimis mo tani ana mina mii mii kun c̱a’bki koŋ koŋ mo.
Haali/ a’di ta a’di jin midi ṯan bway gom ’kwaniŋ ’kup̱ bana mo be.