119
1 Mom’bor mii gom uni gwansan kun ’kona bway buni ki dar gi mii i’ba/ mo
uni kun iiyin e gwoŋḵan jin c̱inu gi Tap̱a mo.
2 Mom’bor mii gom uni gwansan kun dhuki gwonyc̱im piti mo,
uni kun simmki a’di e ka dum buni ’baar mo,
3 uni si’da/ kun ’koki ṯẖu’th to mii mo,
hili mmo/ii e bway piti mo be.
4 /E ḵanki gwoŋḵan gi ’twam pini mo
ki uni minu dhu ka duŋ gana/ mo.
5 Ayy ki bway pem minu ṯel sho’k mo
mmodhu gwoŋḵan pini kun bahu mo.
6 Wakan ki aha/ minu ’koki kar ki mo ma ’the is mo,
mmothoson em pem mmoḵo’c eya ris gwoŋḵan pini ’baar mo kun ’kwarkunu mo.
7 Aha/ mina maŋ /e ka du jin dheleladhelel mo,
ki aha/ mina da/ar gwo gom mii ma ḵar/em pini ’peni gwoŋḵan kun onu mo.
8 Aha/ mina mii gwoŋḵan pini kun bahu mo.
Ayy dhalki aha/ ki dhal ’pen mo ka dun ṯẖorony mo.
9 A’di jin ta dhuru’c midi kar bway piti ki dhelel dhelel kata mo?
mmoji a’di isi ki gwom pini mo.
10 Ka dum pemi ’baar mo tani aha/ simmkina /e e mo.
Dhalku/ ki dhal aha/ mmoc̱aca/ mo ’peni gwoŋḵan pini kun ’kwarkunu mo.
11 Aha/ dhukina gwom pini eya dum pem mo,
ki aha/ mina diki mii miinthusa p̱o/ /e mo.
12 Mom’bor mii gom /e mo, ayy Tap̱a.
Ṯori aha/ gwoŋḵan pini kun bahu mo.
13 Ki ’twam pem mo tani aha/ bahkina aris gwoŋḵan pini
kun onu ki ’twam pini mo.
14 E bway gi gwonyc̱im pini mo tani aha/ ’kunya bwa mo
me’d jin miga/ ’kuny bwa eya ris mo jin tanu pa ki pa mo.
15 Aha/ mina kulum gwo ibwa gom gwoŋḵan gi ’twam pini mo
dhali ḵo’c em pem e bway pini mo.
16 Aha/ mina bwa ’kuny mo e gwoŋḵan pini kun bahu mo.
Aha/ mina diki ŋa gwom pini mo.
17 Ṯu/uli nyaḵki c̱iŋkinam pini ki mo jin isha to ka enthus mo,
ki aha/ mina di ki e mo dhali mii gwom pini mo be.
18 Ḵa’di em pem mo ma ki aha/ mina p̱ar momer e
kun ’kon e gwoŋḵan pini jin c̱inu mo.
19 Aha/ tana yilkina/ ki yilkina/ e mony’cesh mo.
Dhalku/ ki bag gwoŋḵan pini kun ’kwarkunu ’peni aha/ mo.
20 Aḵashiram pem a’di ’cumkunu ki mo jin c̱ora/ c̱or mo
goma ris gwoŋḵan pini ’baar kun onu ka yempa/ mo.
21 /E ki ḵucur uni gwansan kun ush ’kwani ga/ mo, dhali uni kun jeenu mo,
uni kun c̱a’ckin mo ’peni bway gi gwoŋḵan pini kun ’kwarkunu mo.
22 Ḵali ’peni aha/ mon’twam buni kun ṯẖunya uni aha/ i is mo dhali mo ma waḵ mo,
haali/ aha/ dhukina gwonyc̱im pini mo.
23 Isi kani ba iya/ ma maliḵ uni ’kokin mo dhali miiya wutha p̱o/ aha/ mo tani
c̱iŋkinam pini a’di midi kulum gwo ibwa gom gwoŋḵan pini kun bahu mo.
24 Gwonyc̱im pini uni a’di i’kunykika/ bwa mo
haali/ uni itana manlogom aha/ ki gwo mo.
25 Aḵashiram pem thalkina bu’da’cesh mo.
Tashi aha/ e mo isi ki gwom pini mo.
26 Ki aha/ ṯorkina bway pem mo tani /e thoḵki aha/ ’twa/ mo.
Ṯori aha/ gwoŋḵan pini kun bahu mo.
27 Kari aha/ mmomish gwo ’ban gom bway gi gwoŋḵan gi ’twam pini mo,
dhali aha/ mina kulum gwo ibwa gom miim pini jin miina /e to ki momer mo.
28 Aḵashiram pem a’di waki’d gom bwan diṯi’d mo.
’Bithi aha/ is mo isi ki gwom pini mo.
29 Kari bway jin ta thus ki thus mmosi’d ’peni aha/ mo.
Dhali ka ’the mo tani ṯori /e aha/ gwoŋḵan pini jin c̱inu mo.
30 Aha/ kwanykina bway gi mii ma isiŋ ganam pini mo.
Aha/ karkina gwoŋḵan pini kun onu ibwambori jis/em pem mo.
31 Aha/ thalkina gwonyc̱im pini mo, ayy Tap̱a.
Dhalku/ ki dhal aha/ bway ki aha/ minu kar ki mo ma ’the is mo.
32 Aha/ mina gus e bway gi gwoŋḵan pini kun ’kwarkunu mo
ki /e mini lala’th mom pem jin mishka/ gwo ’ban is mo.
33 Ṯori aha/ gwo mo ma, ayy Tap̱a, gom bway gi gwoŋḵan pini kun bahu mo
dhali aha/ mina dhu uni ntagi ’pemen mo be.
34 C̱iyi aha/ mo jin mishu gwo ’ban mo ki aha/ mina dhu gwoŋḵan pini jin c̱inu mo
dhali mii a’di ka dum pemi ’baar mo.
35 Susi aha/ e bway gi gwoŋḵan pini kun ’kwarkunu mo
haali/ aha/ ’kunya bwa e a’di mo.
36 Ḵa’da dum pem ki gwonyc̱im pini mo
yisa mmota miiya du is ki me’d mo.
37 Ṯuki em pem ’peni mo jin hiluwa hil kun ’kon bwa ’te/ mo
dhali c̱iyi aha/ mondiki/e e bway pini mo.
38 Rwaci gwom pini jin ona /e is e c̱iŋkinam pini mo,
a’di jin ona /e gom uni gwansan kun ḵo/ki /e mo.
39 Ḵali ’peni aha/ mowaḵ jin ḵalki aha/ ’ko’da ’cesh mo,
haali/ gwoŋḵan pini kun onu mo tani uni ’bora’bor mo.
40 Hili mo mo ma, aha/ c̱orkina gwoŋḵan gi ’twam pini mo
e mii ma ḵar/em pini mo tani /e c̱iyi aha/ mondiki/e mo.
41 Dhalki mo/en pini jin ṯelu sho’k p̱u’dki’d e aha/ mo, ayy Tap̱a,
isi ki bway gi mowoṯẖ pini jin ona /e gwo is mo.
42 Dhali yan’ko’d aha/ mina ta gi gwonthoḵ gom uni gwansan kun ṯẖunyki aha/ ’twa/i is mo
haali/ aha/ gamkina gwo is e gwom pini mo.
43 Dhali dhalku/ ki bu’th gwoŋ gana/ ’peni ’twa/ pem ka dun ṯẖorony mo,
haali/ mo ma ’teŋ kap̱em pem a’di di’d e gwoŋḵan pini kun onu mo.
44 Aha/ mina dhu gwoŋḵan pini jin c̱inu ki ṯikir ṯikir mo
gom ki sule/ sule/ mo dhali ki sule/ sule/ mo.
45 Dhali aha/ mina ya ’baḵany gana/ mo
haali/ aha/ ŋap̱kina gwoŋḵan gi ’twam pini mo.
46 Aha/ si’da/ mina o gwo gom gwonyc̱im pini ibwambori imaliḵ mo
dhali aha/ minu ’koki kar ki mo ma ’the is mo
47 haali/ aha/ gamkina mom pem jin ’kunyka/ bwa mo e gwoŋḵan pini kun ’kwarkunu mo,
a’di jin enka/ mo.
48 Aha/ taḵa gwoŋḵan pini kun ’kwarkunu mo, a’di jin enka/ mo,
dhali aha/ mina kulum gwoŋḵan pini kun bahu mo eya du mo.
49 Kayi gwom pini e e c̱iŋkinam pini mo,
e a’di jin karkina /e aha/ mmota ga ’teŋ kap̱e/ mo.
50 Yansan ta momalas pem mo e monṯo’c bwa mo
ki gwom pini jin ona /e is c̱i aha/ mondiki/e mo.
51 ’Kwani kun dar gi mii ma gayiin mo tani uni p̱e’th aha/ ki p̱etha sor mo,
hili aha/ dinaki ṯu’k mo ’peni gwoŋḵan pini jin c̱inu mo.
52 Ki aha/ kulumkina gwoŋḵan pini kun onu mo ibwa mo ’peni kadhamo/ mo tani
aha/ bu’thkina momalas mo, ayy Tap̱a.
53 Anyor jin deḵu jin ’batha’ba’th mo tani bu’thki aha/ mo gom ’kwani kun ta thus ki thus mo,
uni kun dhalki gwoŋḵan pini jin c̱inu ’pen mo.
54 Gwoŋḵan pini kun bahu mo tani uni warkin ki gway pem jin yuḵka/ mo
e gu’b pem gi moyam pem jin yaka/ luŋ mo be.
55 Aha/ kakina gway pini e mon’thiny mo, ayy Tap̱a,
dhali dhu gwoŋḵan pini jin c̱inu mo.
56 Mom’bor mii yansan a’di biṯki’da p̱o/ aha/ mo
ki aha/ dhukina gwoŋḵan gi ’twam pini mo.
57 Tap̱a a’di ita tom pem jin ’tuntulka/ bwa ime’d mo.
Aha/ ona gwo is mmodhu gwom pini mo.
58 Aha/ ’thona mii ma ’them pini ka dum pemi ’baar mo.
Miiyi mii ka ’the gom aha/ isi gi gwom pini jin ona /e is mo.
59 Ki aha/ kulumkina gwo ibwa gom bway pini mo tani
aha/ woṯẖkina sho’k pem ’ba/ e gwonyc̱im pini mo.
60 Aha/ hurkina ki ’ta’b mo dhali diki ta adiiṯe/ mo
mmodhu gwoŋḵan pini kun ’kwarkunu mo.
61 Ba anyoḵ gi ’kwani kun ta thus ki thus mo tani uni bu’thki aha/ ka gume/ mo
dhali aha/ dinaki this gwoŋḵan pini jin c̱inu e mo.
62 E mombwam/e mo tani aha/ cukina mis mmomaŋ /e mo,
haali/ gom mii ma ḵar/em pini gi gwoŋḵan pini kun onu mo.
63 Aha/ nyaḵkina ya ka ris uni gwansan kun ḵo/ki /e mo,
uni gwansan kun dhuki gwoŋḵan gi ’twam pini mo.
64 Mony’cesh, ayy Tap̱a, a’di ’tu’dkunu mo ki mo/en pini jin ṯelu sho’k mo.
Ṯori aha/ gwoŋḵan pini kun bahu mo.
65 /E ṯu/ulkina ṯu/ul ki ’bore/ gom c̱iŋkinam pini mo,
ayy Tap̱a, isi ki gwom pini mo.
66 Ṯori aha/ gwo isi ki ṯor gana/ mo mmonyiṯẖ to mo dhali moyuḵ mo,
haali/ aha/ gamkina gwo is e gwoŋḵan pini kun ’kwarkunu mo.
67 Nṯwa/a/ ki aha/ wo’ckunu is she/ mo tani aha/ yakina yam per mo,
hili shwane/ aha/ dhukina gwom pini mo.
68 /E ’bora’bor mo dhali mii mii kun ’bora’bor mo.
Ṯori aha/ gwoŋḵan pini kun bahu mo.
69 ’Kwani kun ushina ga/ ga/ mo tani uni ’thoḵki aha/ ka ṯor mo,
hili ka dum pemi ’baar mo aha/ dhukina gwoŋḵan gi ’twam pini mo.
70 Adum buni momaṯa/ momaṯ me’d ḵwalany mo,
hili aha/ ’kunykina bwa mo e gwoŋḵan pini jin c̱inu mo.
71 A’di ’boro’d gom aha/ ki aha/ jwakaṯkunuwa du mo
ki aha/ mina da/ar gwoŋḵan pini kun bahu mo.
72 Gwoŋḵan jin c̱inu ki ’twam pini mo tani a’di ’boro’d gom aha/ mo,
mmobol ’dolkon gana/ ma alip̱ e mo dhali ’ku’kus ’dolkon kush mo.
73 Me’d pini a’di uḵki’da uḵ mo dhali /e c̱iki aha/ jamas mo.
C̱iyi aha/ mo jin mishu gwo ’ban mo ki aha/ mina da/ar gwoŋḵan pini kun ’kwarkunu mo.
74 Uni gwansan kun ḵo/ki /e mo tani mini p̱ar aha/ e mo dhali ’kuny bwa mo
haali/ aha/ tana gi mo ma ’teŋ kap̱e/ e gwom pini mo.
75 Aha/ misha, ayy Tap̱a, ki gwon dwall pini kun toru gwon dwall ’twa/a ’cesh mo tani uni tana ḵar/e mo
dhali /e dorki aha/ ki isa nyor ki mii ma isiŋ ganam pini mo.
76 Dhalki mo/en pini jin ṯelu sho’k mo thoson is mo mmomalas aha/ mo
isi ki gwom pini jin ona /e is gom c̱iŋkinam pini mo.
77 Dhalki momiimiim pini p̱u’du’d e aha/ mo ki aha/ mina di ki e mo,
haali/ gwoŋḵan pini jin c̱inu mo tani a’di ta jim pem jin ’kunyka/ bwa mo.
78 Dhalki uni kun ushina ga/ ga/ mo tani idhunu ki mo ma ’the is mo
haali/ uni ceshki aha/ ki gwo ma maḵ mo.
Gom aha/ mo tani aha/ mina kulum gwo ibwa gom gwoŋḵan gi ’twam pini mo.
79 Dhalki uni gwansan kun ḵo/ /e mo tani ṯu’kkina bor ki aha/ mo,
ki uni mini mish gwonyc̱im pini mo.
80 Dhalka dum pem a’di dar gi mii ’ba/ e gwoŋḵan pini kun bahu mo
ki aha/ minu ’koki kar ki mo ma ’the is mo.
81 Aḵashiram pem a’di gananki ’ba/ mo gom bway gi mowoṯẖ pini mo.
Aha/ tana ga ’teŋ kap̱e/ gom gwom pini mo.
82 Em pem ushi me’d mo mmoc̱or /e gom gwom pini jin ona /e is mo.
Aha/ doṯa gwo mo ki: Kakasja sa/ imina /e imalas aha/ mo?
83 Haali/ aha/ warkina ki ḵucaŋ gi yimana mura’th jin ’koshkin ma ku’d mo,
hili aha/ dinaki ŋa gwoŋḵan pini kun bahu mo.
84 Ki mo gi wakatinta imina c̱iŋkinam pini i’dim ’kup̱ mo?
Kakasja imina /e idwall uni gwansan gwo mo uni kun ṯo’c aha/ bwa mo?
85 ’Kwani kun ushkina ga/ ga/ mo tani uni c̱wanyki jisa ’kulga/ gom aha/ mo jin miga/ biṯi cine/ mo,
’kwani kun ’konuki dosh shoka ’cesh gom gwoŋḵan pini jin c̱inu mo.
86 Aris gwoŋḵan pini kun ’kwarkunu mo tani uni shurkin mo.
Uni ṯo’cki aha/ bwa ki gwo ma ṯor mo. Woṯẖi/ aha/ mo ma.
87 Uni ’dishi ’twa/ mo mmo’baar aha/ ’peni mony’cesh yan mo
hili aha/ dinaki ŋa gwoŋḵan gi ’twam pini mo.
88 E mo/en pini jin ṯelu sho’k mo tani ’tashi mondiki/em pem ’twa/ mo
ki aha/ mina dhu gwonyc̱im pini gi ’twam pini mo.
89 Gom ki sule/ sule/ mo tani, ayy Tap̱a, gwom pini
a’di irwa’ckunu mo mmothosonkunu uni mo e momis mo.
90 Mii ma isiŋ ganam pini i’dimki ’kup̱ ki sule/ sule/ eya risa nyaḵum yil gi ’kwani mo.
/E ṯelki mony’cesh sho’k mo dhali a’di doshki’d ki sho’k piti mo.
91 Ki miim pini kun dhukina /e uni ’pen ka pije/ mo tani uni doshkin shwane/ mo.
Haali/ aris to ’baar mo tani uni ta c̱iŋkinam pini mo.
92 Waḵki/ gwoŋḵan pini jin c̱inu midi ’taki diki ta jim pem jin ’kunyka/ bwa mo tani,
aha/ minu ’taki ’ce’d sho’k e tom pem jin ṯocaa/ bwa mo.
93 Aha/ mina mol ŋa gwoŋḵan gi ’twam pini ki sule/ sule/ mo,
haali/ ki uni mo tani /e c̱iki aha/ mondiki/e mo.
94 Aha/ tana jim pini mo. Tayi aha/ is ki me’d mo
haali/ aha/ ŋap̱kina gwoŋḵan gi ’twam pini mo.
95 Imanmii tonthus ishkin mo dhali c̱ora/ c̱or mmo’ce’d aha/ sho’k mo,
hili aha/ hila isi gwonyc̱im pini i e mo.
96 Aha/ hilkina gwayu/ gom a’di jin ha me’d ki isi haŋ gana/ ’baar mo,
hili gwoŋḵan pini jin ’kwarkunu mo tani a’di ibeeyabee kagahara mo.
97 Ayy, gwoŋḵan pini jin c̱inu mo tani enka/ kata mo sa/.
A’di ta gwom pem jin kulumka/ ibwa isa yempa/ mo.
98 Gwoŋḵan pini jin ’kwarkunu mo ikar aha/ mmoyuḵayuḵ kagahara mmobol ’kwani kun ta ’kup̱ ki aha/ e mo,
haali/ a’di di’d nyaḵki aha/ isa yempa/ mo be.
99 Aha/ misha gwo ’ban kagahara mmobola ris uni kun ṯorki aha/ gwo e mo,
haali/ gwonyc̱im pini a’di ta jim pem jin kulumka/ ibwa mo.
100 Aha/ mishkina gwo ’ban mo mmobol ’kwani kun cakin e mo,
haali/ aha/ dhukina gwoŋḵan gi ’twam pini mo.
101 Aha/ woṯẖa sho’k pem ’ba/ mo ’pena ris bway thus mo,
gom mii gi wakan mo tani mmodhu gwom pini mo be.
102 Aha/ dinaki ṯu’k mo ’peni gwoŋḵan pini kun onu mo,
haali/ /e ṯorki aha/ gwo mo be.
103 Gwom pini wana ’kuny kata si’da/ mmonyoḵka/ a’di mo.
A’di c̱a’bki dhel dhel mmobola dham e e ’twam pem mo.
104 E gwoŋḵan gi ’twam pini mo tani a’di ibu’thkika/ mo jin mishu gwo ’ban mo.
A’di ishi/kika/ aris bway thusi e wakan mo.
105 Gwom pini a’di ta’da lamba/ gom sho’k pem mo
dhali moŋkush gom bway tur pem mo.
106 Aha/ thulkina gwo me’da p̱o/ mo dhali o gwo is mo dhali rwa’c a’di mo
mmomii gwoŋḵan pini kun onu mo kun tana ḵar/e mo be.
107 Aha/ wo’ckunu is she/ mo mmobur is ki wap̱ wap̱ mo.
C̱iyi aha/ mondiki/e mo, ayy Tap̱a, isi ki gwom pini mo.
108 Budhi tom pem jin c̱ika/ ki me’d ki momaŋ mo, ayy Tap̱a,
dhali ṯori aha/ gwo gom gwoŋḵan pini kun onu mo.
109 Aha/ butha mondiki/em pem e me’d pem ki sule/ sule/ mo,
hili aha/ dinaki ŋa gwoŋḵan pini jin c̱inu mo.
110 ’Kwani kun ta thus ki thus mo tani uni ’thikina gume/ gom aha/ mo.
hili aha/ dinaki per mo ’peni gwoŋḵan gi ’twam pini mo.
111 Gwonyc̱im pini uni ta mal pem ki sule/ sule/ mo.
Nye, uni ita mom’bor bwa goma dum pem mo.
112 Aha/ ḵa’dkina dum pem mo mmothim gwoŋḵan pini kun bahu
ki sule/ sule/ mo ntagi ’pemen gi mony’cesh mo.
113 Aha/ shi/kina ’kwani kun ’kona bwa ka susu/ i e mo,
hili aha/ enkina gwoŋḵan pini jin c̱inu mo.
114 /E ta mo jin bagka/ mo dhali agoŋgorom pem mo.
Aha/ takina ga ’teŋ kap̱e/ e gwom pini mo.
115 Iiku/ mo ’peni aha/ mo um kun mii to kun ta thus ki thus mo,
ki aha/ mina ’taki dhu gwoŋḵan ma Arumgimis pem kun ’kwarkunu mo.
116 Budhi aha/ mo isi ki gwom pini jin ona /e is mo ki aha/ mina di ki e mo,
dhali dhalku/ ki dhal aha/ bway mo ki aha/ minu kar ki mo ma ’the is mo gom mom pem jin taka/ ga ’teŋ kap̱e/ mo.
117 ’Deki aha/ ki mis mo ki aha/ mina ’taki di ki ’dantar mo
dhali mii gwoŋḵan pini kun bahu ki sule/ sule/ mo.
118 /E waḵkina ris uni kun perkin mo ’peni gwoŋḵan pini kun bahu mo,
nye, mo jin laṯa/ uniya laṯ e mo tani a’di di bwa ’te/ mo.
119 Aris imanmii tonthus gi mony’cesh mo tani /e ki deŋ uni e me’d wushulan to mo.
Wakan aha/ ena gwonyc̱im pini mo.
120 Buŋgwar is dee’d ki bir bir gom moŋḵo/ is jin ḵo/ka/ /e mo,
dhali aha/ ḵo/kina is kagahara gom gwon dwall pini kun toru gwon dwall ’twa/a ’cesh mo.
121 Aha/ miikina a’di jin ta’da ḵar/e mo dhali jin ’boro’d mo.
Dhali dhalku/ ki dhal aha/ bway mo jin mina uni gwansan kun siri’c aha/ ap̱o/ ki sho’k mo ’koki siri’c aha/ ap̱o/ ki sho’k mo.
122 Tayi ki bwa ma ’dantar gom c̱iŋkinam pini mo, gom mom’bor piti mo.
Dhalku/ ki dhal ’kwani kun molina gayiin ga/ bway mo mmosiri’c aha/ ap̱o/ ki sho’k mo.
123 Em pem ushki me’d mo mmotim bway mowoṯẖ pini mo,
dhali gom gwom pini jin minu thim jin ona /e is ki o ma ḵar/e mo.
124 Ṯu/uli nyaḵki c̱iŋkinam pini mo isi ki gwo gi mo/en pini jin ṯelu sho’k mo,
dhali ṯori aha/ gwo gom gwoŋḵan pini kun bahu mo.
125 Aha/ tana c̱iŋkinam pini mo. C̱iyi aha/ mo jin mishu gwo ’ban mo
ki aha/ mina ’taki mish gwonyc̱im pini mo.
126 A’di ta’da tee gi Tap̱a jin mina a’di ḵal mii mo,
haali/ gwoŋḵan pini jin c̱inu mo tani a’di ’ce’dkunu bwa mo.
127 Wakan aha/ enkina gwoŋḵan pini kun ’kwarkunu mo
mmobol ’dolkon e mo, dhali ’dolkon gana/ jin tashu e ki o’d ki tash gana/ mo.
128 Wakan aha/ c̱u’thkina bway pem ’twa/ ’kup̱ ka ris gwoŋḵan gi ’twam pini mo,
dhali aha/ shi/kina ris bway thusi e mo.
129 Gwonyc̱im pini uni ita jaro/ ki jaro/ mo.
Wakan aḵashiram pem idhuki uni mo be.
130 Gwom pini kun ’ceenu mo tani uni c̱iki moŋkush mo.
A’di c̱iki mo jin mishu gwo ’ban ki ’kwani kun tekela/ tekel mo.
131 Ki ’twa/ jin ḵa’du/ mo tani aha/ miikina shir shir mo,
haali/ aha/ ’koshkina ṯe/ gom gwoŋḵan pini kun ’kwarkunu mo.
132 Ṯuki /e ’kup̱ki aha/ mo dhali miiyi mii ka ’the gom aha/ mo,
me’d jin boṯa /e ki miim pini ’kup̱ ki uni gwansan kun enki gway pini mo be.
133 Dhuyi sho’k pem dhali ŋaṯgin pem mmodosh ki seele/ mo isi ki gwom pini jin ona /e is mo,
dhali dhalku/ ki dhal toŋ kamu/ jin ’coḵa’coḵ bway mo mmota tap̱a ap̱o/ aha/ mo.
134 Wani aha/ ’ba/ mo ’peni mo jin sirica ’kwani aha/ ap̱o/ ki sho’k mo,
ki aha/ mina ’taki dhu gwoŋḵan gi ’twam pini mo.
135 Kari bwam/em pini mmokush mo mo ap̱o/ c̱iŋkinam pini mo,
dhali ṯori aha/ gwo gom gwoŋḵan pini kun bahu mo.
136 Em pem yuki jabu’th ki haw haw mo
haali/ ’kwani ’koki dhu gwoŋḵan pini jin c̱inu mo be.
137 Aḵar/e itana /e mo, ayy Tap̱a,
dhali /e tana ḵar/e ki gwon dwall pini jin toru gwon dwall ’twa/a ’cesh mo.
138 /E dhuki gwonyc̱im pini ’pen ka pije/ mo e mii ma ḵar/e mo
dhali eya ris mii ma isiŋ ganam pini mo.
139 Anyor pem shwaki aha/ mo
haali/ uni kun ta ’kup̱ ki aha/ mo tani uni ŋaki gwom pini mo.
140 Gwom pini jin ona /e is mo tani a’di nyo/u ki nyo/ gana/ mo,
dhali c̱iŋkinam pini enki a’di mo be.
141 Aha/ gwa’da ki gwa’d mo dhali waḵkunu mo,
hili aha/ dinaki ŋa gwoŋḵan gi ’twam pini mo.
142 Mii ma ḵar/em pini uni itana ḵar/e ki sule/ sule/ mo,
dhali gwoŋḵan pini jin c̱inu mo tani a’di ita jiŋ gana/ mo.
143 Monṯo’c bwa dhali mo jin ’pe’du/ she/ mo uni p̱u’dkina p̱o/ aha/ mo,
hili gwoŋḵan pini kun ’kwarkunu mo tani uni ita kum pem kun ’kunyka/ bwa mo.
144 Gwonyc̱im pini uni tana ḵar/e ki sule/ sule/ mo.
C̱iyi aha/ mo jin mishu gwo ’ban mo ki aha/ mina di ki e mo.
145 Ka dum pemi ’baar mo tani aha/ gwokina mo. Thoḵi aha/ ’twa/ mo ma, ayy Tap̱a mo.
Aha/ mina dhu gwoŋḵan pini kun bahu mo.
146 Aha/ gwona ’twa/ i /e mo. Tayi aha/ is ki me’d mo
ki aha/ mina ’taki mii gwonyc̱im pini mo.
147 Aha/ cukina mis mmosul mon’twash/e bway mo dhali ko gom mowoṯẖ mo.
Aha/ tana gi mo ma ’teŋ kap̱e/ e gwom pini mo.
148 Em pem di’d ki e ki wal wal mo mmotim mo gi mon’thiny ki mombwam/e mo
ki aha/ mina ’taki kulum gwo ibwa gom gwom pini jin ona /e is mo.
149 Ciḵi ’twa/ pem mo e mo/en pini jin ṯelu sho’k mo,
ayy Tap̱a, e mii ma ḵar/em pini mo tani ’tashi mondiki/em pem ’twa/ mo.
150 Uni pamki mo ki is ki ’dish ’dish mo uni gun ṯo’cki aha/ bwa mo ki to kun ta thus ki thus ’te/ ka kar ’kup̱ mo.
Uni si’dasi’d ’peni gwoŋḵan pini jin c̱inu mo.
151 Hili /e a’di i’disha’dish mo, ayy Tap̱a,
dhali aris gwoŋḵan pini ’baar kun ’kwarkunu mo tani uni ta kuŋ gana/ mo be.
152 ’Peni kadhamoonnii mo tani aha/ mishkina gwonyc̱im pini mo
ki /e ḵa’bki uni ki sule/ sule/ mo.
153 Hili monṯo’c bwam pem mo dhali ’cuḵ aha/ mo
haali/ aha/ dinaki ŋa gwoŋḵan pini jin c̱inu mo.
154 Woṯẖi/ gwo is gom tom pem jin raḵaa/ mo dhali wani aha/ ’ba/ mo.
C̱iyi aha/ mondiki/e isi ki gwom pini jin ona /e is mo.
155 Bway gi mowoṯẖ a’di si’dasi’d ’peni a’di jin ta thus ki thus mo be
haali/ uni ’koki simm gwoŋḵan pini kun bahu e mo.
156 Dhan momiimiim pini a’di caaca mo, ayy Tap̱a.
C̱iyi aha/ mondiki/e isi ki gwo gi mii ma ḵar/em pini mo.
157 ’Kwani tana ris ka ris kun ta imanṯo’c aha/ bwa mo dhali ta imanta ’kup̱ ki aha/ mo,
hili aha/ dinaki gu is mo ’peni gwonyc̱im pini mo.
158 Aha/ hila mo ki hil ap̱o/ uni kun dar gi gwo jin gamu is mo dhali o gwo waḵ mo,
haali/ uni ’koki dhu gwoŋḵan pini jin ḵana /eya ḵan mo.
159 Hili isi gwo i e mo ma. Gwoŋḵan gi ’twam pini si’da/ enka/ kata mo.
’Tashi mondiki/em pem ’twa/ mo isi ki gwo gi mo/en pini jin ṯelu sho’k mo.
160 Gumm gwom pini a’di ita gwoŋ gana/ mo
dhali aris gwoŋḵan pini kun onu ’baar ka ’deṯe/ ’deṯe/ mo tani uni ita kuŋ ḵar/e mo dhali uni ’dimki ’kup̱ ki sule/ sule/ mo.
161 Iya/ ma maliḵ uni ṯo’cki aha/ bwa ka wuny is kan mo,
hili adum pem doshki’d ki moŋḵo/ is gom gwom pini mo.
162 Aha/ ’kunykina bwa e gwom pini mo
mmowa e ki jan ’de/ jin gamki dhan to jin caaca jin dilu mo.
163 Aha/ shina shi/ i e mo dhali ’te bwa ki gwon thus mo,
hili aha/ ena gwoŋḵan pini jin c̱inu mo.
164 Me’di pesu/ ka tee mo tani aha/ maŋkina /e mo
goma ḵar/em pini jin tana /e gom gwoŋḵan pini kun onu mo.
165 Dhan moŋḵu’th is jin caaca tana uni gwansan kun enki gwoŋḵan pini jin c̱inu mo.
To p̱iyi’d jin midi kol uni mo.
166 Aha/ tana gi mo ma ’teŋ kap̱e/ gom bway gi mowoṯẖ pini mo, ayy Tap̱a,
dhali aha/ miina gwoŋḵan pini kun ’kwarkunu mo.
167 Aḵashiram pem dhu gwonyc̱im pini mo.
Aha/ ena uni ki en jin shi/ashi/ mo.
168 Aha/ dhuna gwoŋḵan gi ’twam pini mo dhali gwonyc̱im pini mo,
haali/ aris bway pemi ’baar mo tani uni ’koni bwambori /e mo be.
169 Dhalki gwom pem p̱u’dki’di bwambori /e mo, ayy Tap̱a.
C̱iyi aha/ mo jin mishu gwo ’ban isi ki gwom pini mo.
170 Dhalki tom pem jin ’thoka/ ka di’b is p̱u’dki’di bwambori /e mo.
’Cuḵi aha/ mo isi ki gwom pini mo.
171 ’Twa/ pem midi wol mo jin maŋuwa maŋ mo
ki /e ṯorki aha/ gwoŋḵan pini kun baha /e mo.
172 Ale’d pem midi yuḵ gway gom gwom pini mo
haali/ aris gwoŋḵan pini ’baar kun ’kwarkunu mo tani uni ta kuŋ gana/ mo.
173 Dhalki me’d pini thoson is mo mmowoṯẖ aha/ mo
haali/ aha/ kwanykina gwoŋḵan gi ’twam pini mo.
174 Aha/ ’koshkina ṯe/ gom bway gi mowoṯẖ pini mo, ayy Tap̱a,
dhali gwoŋḵan pini jin c̱inu mo tani a’di ta jim pem jin ’kunyka/ bwa mo.
175 Dhalki aha/ dina ki e mo ki aha/ mina maŋ /e mo
dhali dhalki gwoŋḵan pini kun onu woṯẖ aha/ mo.
176 Aha/ yakina per mo me’d ḵa’bal jin thiski e mo. Simmi c̱iŋkinam pini e mo,
haali/ aha/ dinaki ŋa gwoŋḵan pini kun ’kwarkunu mo.