139
Eya manyuḵ gway mo. Gway ma Dawuu’d.
1 Ayy Tap̱a, /e ŋap̱ki aha/ ki bur bur mo dhali mish aha/ mo.
2 /E mishkina mish mo ki aha/ c̱a’bkina ’cesh mo dhali ki aha/ cuna mis mo.
/E nyiṯẖki gwom pem kun kulumka/ ibwa ’pena dhana/ mo.
3 /E ŋap̱ki bway pem ki bur bur mo jin yaka/ ka pije/ mo dhali mom pem jin ishka/ ’ko’da ’cesh mo,
dhali miim pem mishkina /e ’baar mo.
4 Isi kan si’dayi /e mishki gwo kun ’koni ’twam pemi ṯwa/a/ mo,
hili mo mo ma, ayy Tap̱a, /e mishki uni ’baar mo imonṯal ’de/ mo.
5 /E ṯu’bki aha/ ibwamp̱o/ mo dhali ibwambor mo,
dhali /e kari me’d pini ap̱o/ aha/ mo.
6 Dhan mo jin mishu gwo ’ban a’di ita jaro/ gom aha/ mo.
A’di ḵa’dama/ ḵa’dam mo. Aha/ mola a’di gamm mo.
7 Ki mana imiga/ ya ’peni /e ki dar gi Shi/in pini mo?
Walla ki mana imiga/ gus ’peni /e ki dar gi buŋ’kus pini mo?
8 Waḵki/ aha/ shinkunu bway momis mo tani /e dikin imun mo.
Waḵki/ aha/ mina ta ga ci e mo jin ’kona ’kwani kun wun mo tani /e dikin imun mo.
9 Waḵki/ aha/ mina bu’th ya ma bi ma tente/ mon’thamo/ mo
dhali e mo gi bwaagap̱ gi ḵumma/ yi’de/ ’baar mo
10 isi kani me’d pini shuki aha/ bway mo
dhali me’da bim poros pini bu’thki aha/ mo.
11 Waḵki/ aha/ mina o gwo mo ki: Dhalki mondhurumi’d ’kam aha/ is mo
dhali dhalki moŋkush wara’d ki mon’thiny gom aha/ mo,
12 isi kan mondhurumi’d diki ta mondhurumi’d gom /e mo.
Mon’thiny a’di c̱a’bki bany bany me’d montee mo
haali/ mondhurumi’d a’di wara’d ki moŋkush gom /e mo.
13 Haali/ /e uḵkina aris to gi bwaman is pem mo,
/e shoki aha/ ki ’be’b ’be’b e bwama dho’th ma ta’dam pem mo.
14 Aha/ maŋkina /e mo haali/ /e a’di ḵogu mo dhali /e tana manmii to mer mo.
To mer uni ta miim pini mo.
/E mishki aha/ ki mish gana/ mo.
15 Ayica yir pem a’di molu bag ’peni /e mo,
ki aha/ ’konu mmo/uḵ ki kup̱ mo,
ki koṯẖ jin wagaskunu a’di e mony’cesha ’kulga/ mo.
16 Em pini mishki bul pem nṯwa/a/ gom uḵ pem ki aha/ tana ari ’dii mo.
Ka tee kun ’kawurkunu gom aha/ mo tani
a’di ’kwarkunu eya warkam pini mo, aris uni ’baar mo,
me’d jin ’kona uni ki ’ko mo naskina/ mo.
17 Gwom pini kun kuluma /e bwa gom aha/ mo wani yinthowa, ayy Arumgimis.
Ḵwashar buni ’ka’da miiya?
18 Waḵki/ aha/ mina deŋ uni e mo tani uni bolkina si’b gi bwaagap̱ e ka ris mo.
Ki aha/ merkina e mo tani aha/ dina nyaḵki /e mo naskina/.
19 Ayy /e jin mini ’taki ’kosh uni kun mii tonthus moyi, ayy Arumgimis,
dhali ki ’kwani kun wol ’kwaniya bas mo mini ’taki ḵwa/ is buni bwa ’peni aha/ mo,
20 ki ’kwani kun dup̱i /e i e mmo/ush /e gwo ki ’tash mo,
uni kun cukin ki is buni imonṯal ’de/ ap̱o/ /e gom tonthus mo.
21 Dika/ ki shi/ uni i e uni gun shi/ki /e i e mo, ayy Tap̱a?
Dhali dika/ ki ’te bwa ki uni gwansan kun cukina ap̱o/ /e mo?
22 Aha/ shi/kina uni i e ki isi shi/ ma shiŋ gana/ i e mo.
Aha/ deŋkina uni e moyi mmota ’kup̱ ki aha/ mo.
23 Ŋap̱i aha/ ki bur bur mo, ayy Arumgimis, dhali misha dum pem mo.
Nyo/i aha/ mo dhali mish gwom pem kun kulumka/ ibwa mo.
24 Dhali p̱ari mo e mo waḵki/ tonthusa kamu/ di’d e aha/ mo,
dhali shuyi aha/ bway e bway jin ’konuki/e ki sule/ sule/ mo.