19
Eya manyuḵ gway mo. Gway ma Dawuu’d.
1 Aris momis uni ṯorki monyca ma Arumgimis mo, dhala balany bahki miin tom piti ki me’d mo.
2 Ka yempa/ ka yempa/ mo a’di ki gac̱ gwonṯor piti mo,
dhali mon’thiny ka yempa/ mon’thiny mo tani a’di ki ṯor monyiṯẖ piti mo,
3 Mowal ’twa/ p̱iyi’d mo walla gwo p̱iyin mo,
dhali ’twam buni si’da/ ’konuki ciḵ mo tani
4 hili ’twam buni a’di yaki’d ka pije/ e mony’ceshi ’baar mo,
dhali gwom buni a’di yaki’d ki ’pemen gi mony’ceshi ’baar mo.
E uni mo a’di ki kar gu’ba’ku/ goma tente/ mmodi mo,
5 a’di jin sulki’d ka pije/ me’d wathinyaŋa’b jin dhalki gu’b jin isha a’di ’pen mo
dhali wa e ki wathi/ jin ’bitha’bi’th jin guski’d mmo’baar bway piti ki moŋ’kuny bwa mo.
6 Mosul piti a’di ’peni ’pemen ma ris momis mo,
dhali mo ma kul is piti a’di taki’d gi ’pemen e uni mo,
dhali toŋ kamu/ yisa di’da jin mishu bag mo ’peni mo ma wur wur piti mo.
7 Gwoŋḵan jin c̱inu gi Tap̱a mo tani a’di ’boro’d ki isi ’bor gana/ mo,
a’di jin warki’da ḵashira/ is mo,
dhali gwonyc̱i gi Tap̱a a’di doshki’d mo,
mmodhu uni gun ’ka’da mii ’ba/ ki moyuḵ mo,
8 gwoŋḵan gi ’twa/ gi Tap̱a mo tani uni yisa shiyina,
hili uni ’kunykina du mo be.
Dhali gwoŋḵan gi Tap̱a jin ’kwarkunu mo tani a’di dheleladhelel mo,
a’di jin kushki e gi ’kwani mo.
9 Moŋḵo/ jin ḵogu Tap̱a mo tani uni dheleladhelel mo,
kun minu ’dim ’kup̱ ki sule/ sule/ ya ye ’ba/ mo.
Dhali gwoŋḵan gi Tap̱a kun onu mo tani uni ta uniŋ gana/ mo
dhali tana ḵar/e mmonṯal ’de/ mo be.
10 Kun minu o bwa ki nyanye/ mmobol ’dolkon gana/ e mo
isi kan si’dayi me’d ’dolkon gana/ jin tashkunu e ki o’d mo,
dhali a’di jin c̱a’bki dhel dhel si’da/ mmobola dham e mo
dhali jin yuki’d ki haw haw me’d mamana dham mo.
11 Bahili ki uni mo tani c̱iŋkinam pini a’di rumkunu mo
dhali mmodhu uni mo tani adhan to jin ish ḵumma/ jin caaca mo tani a’di c̱ikunu mo.
12 Hili aja a’di imidi theke’th tom piti kun thama a’di mii mo?
Dheleli /e aha/ ’peni mombag gi mii kun thamka/ mii mo.
13 ’Tashi c̱iŋkinam pini ’twa/ mo ’peni miinthus kun miina a’di ka daran du mo.
Dhali dhalku/ ki dhal uni bway mo mmota tap̱a ap̱o/ aha/ mo.
Dhali yan’ko’d aha/ mina di ki dar gi mii ’ba/ mo
dhali di ka p̱o/ ’pena dhan gwon dhaŋ mo.
14 Dhalki gwo gi ’twam pem
dhali gwo kun kulum aha/ eya du mo
mishu bu’th mo e jis/em pini mo,
ayy Tap̱a jin ta wosh pem mo dhali amanwan aha/ ’ba/ mo.