21
Eya manyuḵ gway mo. Gway ma Dawuu’d.
1 E mom’bi’th is pini mo tani amaliḵ a’di ’kunykina bwa mo, ayy Tap̱a,
dhali e mowoṯẖ pini mo tani adhan momaŋ mmoyuḵ gway wa’d e a’diya!
2 /E c̱iki a’di to jin gwon ma dum piti mo,
dhali /e diki non to jin ’theḵa a’di gwo ki ’twam piti mo.
Doshi ma dhali ’cunycuri yan mo.
3 Haali/ /e gamki a’di ’kup̱ ki mom’bor miim ’borga/ mo,
dhali /e ki kar a’di toŋ’kup̱ ki ’dolkon gana/ jin tashu e ki o’d i’kup̱i a’di mo.
4 A’di doṯki mondiki/e ’peni /e mo tani dhali /e c̱iki a’di a’di mo,
a’di jin ta’da luc̱ ma tee gom ki sule/ dhali ki sule/ mo.
5 Monycam piti caaca gom mowoṯẖ pini mo,
dhali mo ma ra/ ra/ mo dhali mo/eḵ mo tani karkina /e ap̱o/ a’di mo be.
6 Nye, /e karki a’di mmota a’di jin midi ’bora ’bor mii ki sule/ mo
dhali /e ki kar a’di mmota aman’bor bwa mo ki moŋ’kuny bwa gi buŋ’kus pini mo.
7 Haala maliḵ gamki gwo is e Tap̱a mo
dhali e monṯel sho’k gi mo/en gi a’di jin Caa e ki Ca mo tani a’di midi diki joc̱ sho’k mo.
8 Me’d pini a’di midi gama ris unim pini ’baar kun ta ’kup̱ ki /e mo.
Me’da bim poros pini midi gam uni gwansan gun shi/ki /e i e mo.
9 /E mini dhu uni mmota ’cepesa ’cepes me’d to kun cesuwa gwaṯa/ mo
ki /e mini pi is ka pije/ mo.
Tap̱a a’di midi los uni ki ’kolo’c ka nyor piti mo,
dhali o’d midi shwa uni ki ’ci’d’da/ mo.
10 /E mini ’ce’da ’pereny buni sho’k ’peni mony’cesh mo
dhali uc̱im buni ’peni bwaman iya/ gi ’kwani mo.
11 Waḵki/ uni thoson tonthus ap̱o/ /e mo,
dhali waḵki/ uni mini mum tonthus mmota pibi icine/ mo tani uni mini mol a’di pi ’ba/ ka pije/ mo.
12 Haali/ /e mini dhu uni mmoso mo.
Haali/ /e mini ṯur uni jis/em buni ka bwam pini mo.
13 Dhalki /e karu ki ca mo, ayy Tap̱a, e mom’bi’th is pini mo.
Aman mina yuḵ gway mo dhali maŋ mom’bi’th pini mo be.