27
Gway ma Dawuu’d.
1 Tap̱a a’di ta moŋkush pem mo dhali bway gi mowoṯẖ pem mo,
kaja a’di imiga/ ḵo/ mo?
Tap̱a a’di ta’da cur jin ṯelu gwo sho’k mo gom mondiki/em pem mo,
dhali kaja a’di imiga/ ḵo/ is mo?
2 Ki imanmii tonthus tiḵki aha/ e mo tani
uni thu’thkina thu’th ’pen kagahara ap̱o/ aha/ mo,
uni gun ta ’kup̱ ki aha/ mo dhali kun ’kwarkina ’kwar ka gwap̱i/ mo tani
uni mini ḵal ’bar mo dhali ṯa’k mo be.
3 Ba aris uni kun ’kamkina ’kam ap̱o/ aha/ mo tani
adum pem yisa ḵo/ is yisa.
Ba ki mo ma mee cuu’da p̱o/ aha/ mo tani
hili aha/ mina wu is ka ’cesh mo.
4 Ton ṯal ’de/ doṯkika/ ’peni Tap̱a mo,
a’di jin miga/ simm e mo mmobaṯẖi ’ko’d mo,
ki aha/ mina c̱a’b e gu’b gi Tap̱a mo
ka risa cim pemi ’baar mo ki mondiki/em pem mo,
mmohil monyjaro/ gi Tap̱a mo,
dhali mmohil isi gwo i e mo gom gu’b gi mondheleladhelel piti mo be.
5 Haali/ a’di midi bag aha/ eya darha’dam piti mo
ka tee jin ṯocu aha/ bwa mo.
A’di midi bag aha/ e bwaŋ’kwariny gi gu’b burrinyem piti mo.
Dhali a’di midi kar aha/ i’kuwosh jin turatur mo.
6 Dhali shwane/ ’kup̱ pem minu ’de’k ki mis mo ap̱owa ris uni gun ta ’kup̱ ki aha/ mo kun ’kamki aha/ is mo be.
Dhali aha/ mina c̱i to jin ’ciṯẖu/ ’kus mmomiiya bas e gu’b burrinyem piti mo ki cuuwa/ gi moŋ’kuny bwa mo.
Dhali aha/ mina yuḵ gway mo dhali mii ko gom Tap̱a mo.
7 Ciḵi ko mo ma, ayy Tap̱a, ki aha/ ’thera cuuwa/ kagahara mo.
Miiyi mii ka ’the gom aha/ mo dhali thoḵi aha/ ’twa/ mo.
8 /E oki gwo mo ki: Simmi um bwam/em pem e mo.
Adum pem o gwo gom /e mo ki:
Bwam/em pini Tap̱a, a’di isimmkika/ e mo be.
9 Dhalku/ ki bag bwam/em pini ’peni aha/ mo.
Dhalku/ ki ṯu’k c̱iŋkinam pini jin mii /e to ka nyor mo,
/e jin tana manwoṯẖ pem ’thissa/ mo.
Dhalku/ ki biṯ aha/ asho mo, dhali dhalku/ ki dhal aha/ ’pen mo,
ayy Arumgimis gi mowoṯẖ pem mo.
10 Haala babam pem dhali ata’dam pem uni dhalki aha/ ’pen mo,
hili Tap̱a a’di imidi hil aha/ i e mo.
11 Ṯori aha/ bway pini mo ma, ayy Tap̱a,
dhali susi aha/ e bway tur jin ba’da/ ba’d mo
haali/ goma ris uni kun ta ’kup̱ ki aha/ mo.
12 Dhalku/ ki c̱i aha/ ki bwa gi uni kun ta ’kup̱ ki aha/ mo,
goma ris iman/o gwonthus cukina p̱o/ aha/ mo
dhali uni wukina shure/ gom mombujur mo.
13 Aha/ gama gwo is ki aha/ mina p̱ar miim ’boro’d gi Tap̱a e mo
e mo jin ’kona ’kwani ki e mo.
14 C̱ori Tap̱a mo ma,
dhali ’bithi is mo dhali dhalka dum pini bu’th mo jin roc̱u sho’k mo.
Nye, c̱ori Tap̱a mo ma.