32
Gway ma Dawuu’d. Gway jin yuḵu mo mmoyetha ye’th sho’k ki gwo mo.
1 Mom’bor mii gom a’di jin gwamkunu gwon dhaŋ piti mo,
a’di jin ta miinthus piti jin kumkunu ’kup̱ mo.
2 Mom’bor mii gom wathi/ jin dina Tap̱a ki yer is ki gway gom miinthusa kamu/ mo,
dhali e shi/in piti mo tani mo ma he’k e p̱iyi’d mo.
3 Ki aha/ dinaki ṯor gwo miinthus pem mo tani buŋgwar is pem a’di muṯṯi’di ’baar mo
e mo/ohon pem ka tee ’baar mo.
4 Haali/ montee dhali mon’thiny mo tani me’d pini diṯadiṯ ap̱o/ aha/ mo.
Mom’bi’th pem a’di ḵu’thki’d mo me’d mom’batha’d jin ’koshki to moyurantee mo.
Doshi ma dhali ’cunycuri yan mo.
5 Aha/ nyiṯẖkina miinthus pem e /e mo
dhali aha/ dinaki bag miinthus pem mo.
Aha/ ona gwo mo ki: Aha/ mina pi gwon dhaŋ pem ki Tap̱a mo.
Dhali yan’ko’d /e gwamki aha/ gom miinthus jin di aha/ i’ba/ mo.
Doshi ma dhali ’cunycuri yan mo.
6 Wakan dhalka ris ’kwani ’baar mo kun tana gayiin ’thon e /e mo.
Ka tee ma c̱is mo, dhali ka tente/ kun sona dhan yi’de/ mo tani uni mol a’di gam mo.
7 /E ta mombag gom aha/ mo
dhali /e ’tashki aha/ ’twa/ mo ’peni monṯo’c bwa mo.
Dhali /e ’kamki aha/ ki mony’cuḵ mo.
Doshi ma dhali ’cunycuri yan mo.
8 Aha/ mina ye’th /e sho’k mo dhali ṯor /e bway jin mina /e iya mo be.
Aha/ mina logom /e ki gwo mo ki em pem jin midi di ap̱o/ /e mo.
9 Dhalku/ ki wa e ki shumarum walla bagal kun mol ’twa/ wal mo,
uni kun minu ’kali’th is mo dhali ’kamu’th ’twa/ ka lijaam mo
isi ciki/ ki uni mini ’koki so ’peni /e mo.
10 To kun diṯ bwa gom ’kwani kun ta thus ki thus mo tani uni tana ris mo,
hili mo/en jin ṯeli sho’k mo a’di ’kam a’di is mo a’di jin gamki gwo is e Tap̱a mo.
11 ’Bori bwa e Tap̱a mo dhali ’kunyi bwa mo ayy um ’kwani kun tana ḵar/e mo,
dhali ḵumi cuuwa/ gom moŋ’kuny bwa mo, aris um kun dhelel ma du mo.