37
Gway ma Dawuu’d.
1 Dhalku/ is pini ki anan mo goma manṯẖu’th to mii mo,
dhalku/ dhap̱an ki mii ta gom imanṯẖu’th to mii mo.
2 Haali/ uni mini la us ki jog me’da sho mo,
dhali ḵu’th mo me’da sho mo.
3 Gami gwo is e Tap̱a mo, dhali miiyi ki ’bore/ mo.
Wakan ki /e mini c̱a’b eya ’cesh mo, dhali ’kuny bwa mo gom mo jin mina /e c̱a’b ki ’dantar mo.
4 Budhi mo jin ’kunyu bwa e Tap̱a mo,
dhali a’di midi c̱i /e to kun gwon ma dum pini mo.
5 C̱uthi bway pini ’kup̱ ki Tap̱a mo.
Dhali gami gwo is e a’di mo, dhali a’di midi ḵal mii mo be.
6 Dhali a’di midi ḵal mom pini jin minu ye /e mo e moŋkush mo
dhali tom ’boro’d pini mina e waki montee mo.
7 Doshi naskina/ e bwambor gi Tap̱a mo dhali c̱oriya c̱or ki bwa jin ’kuc̱u/ ki ’kari’th gom a’di mo.
Dhalku/ is ki anan ap̱o/ a’di jin gam mii adu is e bway piti mo,
ap̱o/ wathi/ jin ḵali tonthus ka pije/ ki mii jin p̱ishina a’di ki ’pen mo.
8 Daḵi ’pena nyor mo dhali dhalka nyor jin shwanu ’pen mo.
Dhalku/ is pini ki anan mo, a’di jin ḵuthi is jasi gom tonthus mo.
9 Haali/ amanmii tonthus mo tani a’di minu la ’ciṯẖ mo,
hili uni gwansan kun c̱orki Tap̱a mo tani uni a’di imini gam mony’cesh mo.
10 C̱ori naskina/ ari’ceenne/ mo dhali amanmii tonthus midi di doḵ/e yisa.
Ba me’d jin hila um a’di ki a’di di’d e mom piti ki ’bore/ mo tani a’di midi di yisa.
11 Hili uni kun ’thup̱ ma du mini gam mony’cesh mo
dhali ’kuny bwa e is buni mo e mo jin isha to ka enthus ki mii jin gama uni adu is mo.
12 Amanmii tonthus a’di mii’da wu’th ap̱o/ a’diŋ ḵar/e mo
dhali ’pe’d shem piti ap̱o/ a’di mo,
13 hili Tap̱a p̱e’thki a’di jin mii tonthus mo
haali/ a’di mishki’d ka teem piti p̱u’dki’d mo be.
14 Imanmii tonthus uni buḵi gandal buni mo dhali gwana’da bwam buni mo,
mmoḵal ka ’cesh uni kun hatha’ko’d mo dhali kun mini mii ta gi to mo.
dhali ’kosh uni gwansan kun iin ki iin dhelelga/ mo.
15 Gandal buni mini cic̱a dum buniŋ gana/ mo,
dhali abwam buni minu ’ce’d bwa mo be.
16 To kun tana a’diŋ ḵar/e ush’ceenne/ mo tani a’di ’boro’d mo
mmobol to jin ishi’d ka enthus ma ris uni kun mii tonthus e mo.
17 Haala bi gi imanmii tonthus mo tani uni minu ’ce’d mo,
hili Tap̱a a’di dhuki imanmii miiŋḵar/e mo.
18 Tap̱a a’di mishki’da tee gi uni kun ’kon ki dar gi mii ’ba/ mo,
dhali mal buni c̱a’bki’d ki sule/ sule/ mo.
19 Uni minu ’koki dhu ki mo ma ’the is ka tee kun ta thus ki thus mo,
dhali ka tee jin mina ṯe/ ’kosh mo tani uni mini ta gi to jin ish ka enthus mo.
20 Hili imanmii tonthus mo tani uni ’ce’dki sho’k mo.
Aris uni kun ta ’kup̱ gi Tap̱a mo tani uni wana e ki monyca ma shon dhii/i’d mo,
uni kun la p̱uu mo – dhali uni kun wana e ka ku’d kun la p̱uu mo.
21 Amanmii tonthus barki to ḵal ’peni ’kwani mo tani, dhali mol c̱iya murem piti ka nyaŋ’ko’d mo,
hili a’diŋ ḵar/e ta’da ’the mo dhali c̱i’da c̱i mo.
22 Haali/ uni gwansan kun ’boru mii ki Tap̱a mo tani uni mini gam mony’cesh mo,
hili uni gwansan kun jeenu ki a’di mo tani uni minu ’ciṯẖ ’twa/ mo be.
23 Ŋaṯgin jin tana wathi/ mo tani a’di ’peni Tap̱a mo,
dhali a’di ṯelki a’di sho’k mo e bway jin mina bwa ’kuny a’di mo.
24 Ba ki a’di midi biṯ mo tani a’di minu ’koki biṯa sho ’kup̱ ka luŋgu’b mo,
haali/ Tap̱a a’di ta mondim gom me’d piti mo.
25 Aha/ tana dhuru’c ’thissa/ mo dhali shwane/ aha/ tana dhan mo.
Hili naskina/ aha/ dinaki p̱ar a’diŋ ḵar/e e dhalkunu ’pen mo
walla uc̱im piti mmo’tho tonṯe/ mo.
26 A’di c̱iki to ka ’ka’d me’di is mo ka yempa/ mo dhali c̱i to mo,
dhali uc̱im piti warkin ki uni kun ’bor mii mo.
27 Ḵwa/i bwa mo ’peni tonthus mo dhali miiyi ki ’bore/ mo,
wakan ki /e mini di ki sule/ sule/ mo.
28 Haali/ Tap̱a a’di enki mo jin ’konuki miiya mii ka gwar ’de/ mo.
A’di midi diki dhal unim piti kun dhunu ki she/ ki dhelel dhelel ’pen mo.
Imanmii miiŋḵar/e minu dhu ki sule/ sule/ mo.
Hili uc̱i gi imanmii tonthus mo tani uni minu ’ciṯẖ ’twa/ mo.
29 Imanmii miiŋḵar/e mini gam mony’cesh mo
dhali c̱a’ba p̱o/ a’di ki sule/ sule/ mo.
30 ’Twa/ ma manmii miiŋḵar/e mo tani a’di bahki gwo gom moyuḵ mo
dhali ale’d oki gwo ki dar gi mii ma gwar ’de/ mo.
31 Dhali gwoŋḵan ma Arumgimis piti jin c̱inu mo tani a’di di’da dum piti mo.
Dhali ŋaṯgin piti ’koki yeresa/ yeres mo.
32 Amanmii tonthus a’di timki a’diŋ ḵar/e mo
dhali simm a’di e mo mmo’kosh mo.
33 Tap̱a a’di midi diki dhal a’di ’pen e mom’bi’th piti mo,
walla dhal a’di ki a’di minu waḵ mo me’d jin minu sus a’di e mondwall gwo mo.
34 C̱ori Tap̱a mo dhali kari bway piti mo
dhali a’di midi kar /e ki ca mo mmogam mal gi mony’cesh mo.
/E mini hil mony’ce’d sho’k ma manmii tonthus mo.
35 Aha/ hilkina manmii tonthus mo mmomii mii gi ’ba/ mo,
dhali mmotura tur me’da bwanyayiis gi Pan Lubnaan mo.
36 Doḵ/e aha/ yakina ki yam pe mo dhali hili a’di diki di doḵ/e mo.
Ba aha/ ŋap̱kina a’di mo tani a’di ’konuki gam mo be.
37 ’Cunycuri wathi/ jin dar gi mii ’ba/ mo dhali hili mo mo ma a’di jin dhelel ma du mo,
haali/ emen ’kon gom wathi/ gi moŋḵu’th is mo.
38 Hili imandhaŋ gwo mo tani uni minu ’ce’d sho’k imonṯal ’de/ mo.
Dhali emen gi imanmii tonthus mo tani uni minu ’ciṯẖ mo be.
39 Bway gi mowoṯẖ gom wathiŋ ḵar/e mo tani a’di ’peni Tap̱a mo be.
A’di ita jim buni jin hura uni jwa ka tee gi monṯo’c bwa mo.
40 Tap̱a woṯẖki uni mo dhali ’cuḵki uni mo.
A’di ’cuḵki uni mo ’peni imanmii tonthus mo dhali ta uni is ki me’d mo
haali/ uni bu’thki mo jin huru jwa e a’di mo be.