55
Eya manyuḵ gway mo ka shu/ kun buḵu mo. Gway ma Dawuu’d jin yetha a’diya ye’th sho’k mo.
C̱iyi ’cem pini ki mon’thom pem, ayy Arumgimis.
Dhali dhalki is pini ki ba’k mo ’peni tom pem jin doṯka/ ka di’b is mo.
Ḵuthi is gom aha/ mo, dhali thoḵi aha/ gwo mo.
Aha/ kumu ’twa/a ’cesh ki monṯo’c bwam pem mo.
Dhali aha/ guskina du mo gom cuuwa/ gi ’kwani kun ta ’kup̱ mo,
haali/ ’kwani kun ta thus ki thus mo tani uni siri’ckina siri’c ki sho’k mo.
Haali/ uni ḵali mo jin ṯoju bwa ap̱o/ aha/ mo
dhali ka nyor mo tani uni ki thip̱ mo ma dup̱e/ ap̱o/ aha/ mo.
 
Dhali adum pem ’pe’di she/ e bwaman is pem mo,
dhala pure/ gom mowu biṯki’da p̱o/ aha/ mo.
Moŋḵo/ is dhali mondee is p̱u’dkina p̱o/ aha/ mo,
dhali to jin ḵo/ki aha/ is mo tani uni kumki aha/ ’twa/a ’cesh mo.
Dhali aha/ ona gwo mo ki: Ayy waḵki/ aha/ mina ’taki ta ga bi me’d gurko/ mo tani
aha/ mina ’taki p̱e mo dhali si/ is mo be.
Nye, aha/ mina ya si’dasi’d moyi
Aha/ mina ya c̱a’b e mombwaasho moyi.
Doshi ma dhali ’cunycuri yan mo.
 
Aha/ mina lala ki jahanneyi dhali gama darha’dam pem
’peni mo ma bumburush ’tham mo dhali ’thama p̱unthar mo.
’Ce’di tom buni jin thosona uni sho’k sho’k mo ma, ayy Tap̱a. C̱umbulki uni ale’d buni mo,
haali/ aha/ hilkina mo jin bujura bujur mo dhali mo jin biruwa bir e ’peŋkuman bampa/ mo.
10 Montee dhali mon’thiny uni iikin ka kul is e yana gaŋgaram piti mo,
dhali mo jin tanuwa pibi dhali mo jin ṯoju bwa mo tani ’kon e uni mo.
11 Mo jin doru sho’k ka pupush mo tani a’di di’d e bwaman a’di mo,
dhali mo jin sirijuwa siri’c ki sho’k mo dhali mo jin hekuwa he’k e mo tani
uni ’koki ii mo ’peni mo ma suug piti mo.
 
12 A’di diki ta a’di jin ta ’kup̱ ki aha/ jin ’bakaa e mo –
ki aha/ mina ’taki mish a’di ḵal mo.
A’di diki ta a’di jin ta ’kup̱ ki aha/ jin ṯu/ul mo jin gora bwa ki gor ap̱o/ aha/ mo,
ki aha/ mina ’taki bag ’peni a’di mo.
13 Hili /e be, jin wa e ki aha/ ki is pem mo,
/e jin nyaḵ ya ki aha/ mo, dhali /e jin tana waḵ pem mo.
14 Me’dyin mo ana nyaḵa ṯor ṯori monṯal ’de/ mo jin ’kunya’kuny mo.
E gu’b ma Arumgimis mo tani ana iina mmonyaḵ to mii mo.
15 Dhalki mowu p̱u’du’d ap̱o/ uni mo.
Dhali dhalki uni ’donu ki e eya Haawiya mo.
Dhali dhalki uni iin e bwaya pure/ gi moŋ’kup̱ajem buni mo.
16 Hili aha/ yuḵkina Arumgimis mo.
Dhali Tap̱a midi ta aha/ is is ki me’d mo.
17 Mom’pimpili/ dhali mon’thamo/ dhali montee mo tani
aha/ bahkina gwo ma ’thup̱in ’twam pem mo dhali ko mo,
dhali a’di midi ciḵ ’twam pem mo.
18 A’di midi ’cuḵa ḵashiram pem ki ’dantar mo
’peni mo ma mee jin miga/ ’taki as mo,
haali/ ’kwani tana ris miina bumburusha p̱o/ aha/ mo.
19 Arumgimis midi c̱i ’cem piti mo dhali dhu uni ki gwa’d mo,
a’di jin diki’d eya ḵursi ma maliḵ kadhamo/ mo.
Haali/ uni ’koki dhu gwoŋḵan jin c̱inu mo
dhali uni ’koki ḵo/ Arumgimis mo.
Doshi ma dhali ’cunycuri yan mo.
 
20 Amannyaḵ yam pem a’di he’thki’da bim piti mo ap̱owa mugum piti mo,
a’di ’ce’dki gwom piti jin gama a’di me’d mo.
21 Gwom piti jin ona a’di mo tani a’di na’bulana’bul mmobola yina ko e mo,
hili anyor di’d eya dum piti mo.
Dhali gwom piti ’capuṯa/ ’capuṯ mmobola yin e mo,
hili uni wana e ki gandal kun ’de’kkunu she ki mis mo.
 
22 Ṯaki to jin diṯi’d pini ap̱o/ Tap̱a mo
dhali a’di midi ḵal gom /e mo.
A’di midi diki dhal jaŋ kamu/ jin ta’da ḵar/e mmojoc̱ mo.
 
23 Hili /e ayy Arumgimis mini ṯa’k uni ka luŋgu’b mo
e jis jin ’kula’kul mo.
’Kwani kun wol tiya bas mo dhali kun wa’thkina wathi/ e mo tani
uni mini ’koki ’ko ki e mo ka teem bunin ’de/ i’tu’d mo.
Hili aha/ mina gam gwo is e /e mo be.