64
Eya manyuḵ gway mo. Gway ma Dawuu’d.
1 Ciḵi ’twa/ pem ma, ayy Arumgimis, goma ’thup̱in ’twam pem mo.
’Tashi mondiki/em pem ’twa/ mo ’peni mo jin kar aha/ ki mo ma ḵo/ is gom uni kun ta ’kup̱ gi aha/ mo.
2 Bagi aha/ mo ’peni ’kwanin thus kun miina wu’th ka ḵwal is mo,
’peni mo jin ’konu gwo ibwa mo mmomii to jin ta thus ki thus mo.
3 Uni gun cilkina le’d buni me’d gandal kun kaaka mo,
kun ṯurki gwo kun kaaka me’da thop̱a/ kun ṯuru/ to mo,
4 mmo’kosha ’kosh ’peni mo jin isha uni ki jim bag ap̱o/ wathi/ jin dar gi mii ’ba/ mo,
mmo’kosh a’di ki jahanne/ mo dhali dar gi moŋḵo/ is mo.
5 Uni buthi tonthus buni me’d mo,
dhali uni ṯorkina ṯor goma gume/ kun ’thina uniya ’cesh ka ḵwal is mo
mmokulum gwo ibwa mo mmo/o ki: Kaja mini p̱ar ana e mo?
6 Dhali kaja a’di imidi ŋap̱ ana ki bur bur gom miim bana kun ’ko ana i’ba/ mo?
Ana kulumkina gwo ibwa ki e kun korakor mo mmobwaa wu’th mo.
Haali/ isi bwaman bwa wathi/ mo dhali adu mo tani a’di ’kula’kul mo.
7 Hili Arumgimis a’di midi shinka thop̱a/ ka luŋgu’b e uni imun mo,
uni mini ta jama/ ki jahanne/ mo.
8 Haali/ goma le’d buni mo tani a’di midi ’doyi uni e mo jin kup̱u/ mo.
Aris ’kwani kun mini p̱ar uni e mo tani mini bir ’kup̱ buni mo be.
9 Dhali yan’ko’d aris ’kwani ’baar mo mini ḵo/ is mo
dhali uni mini ṯor to jin wagaskin ma Arumgimis mo,
dhali kulum gwo ibwa mo gom to kun miikina a’di mo.
10 Dhalki a’di jin mii miiŋḵar/e ’kunya bwa mo e Tap̱a mo
dhali bu’th mo jin huru jwa e a’di mo.
Dhalki uni gwansan kun dhelel ma du mo tani can mo.