68
Eya manyuḵ gway mo. Gway ma Dawuu’d. Gway jin yuḵu mo.
1 Dhalka Arumgimis cu mis mo dhali dhalki uni kun ta ’kup̱ ki a’di c̱ekerkunu bwa mo.
Dhalki uni gwansan kun shi/ a’di i e mo tani son mo ’peni bwambori a’di mo.
2 Dhalki uni wana e ka ku’d kun borkunu mo, wakan borki uni mo.
Dhali me’d mamana dham jin ṯo’dki’d ibwambori o’d mo tani
dhalki a’di jin ta thus ’ce’du/ sho’k mo si’da/ e bwambor ma Arumgimis mo.
3 Hili dhalki a’di jin ta’da ḵar/e ’kunya bwa mo.
Dhalki uni yuḵ gway ki moŋ’kuny bwa mo ibwambor ma Arumgimis mo.
Dhalki uni tashu ki moŋ’kuny bwa mo.
4 Yuḵi gway eya Arumgimis mo. Yuḵi gway jin maŋu gway piti mo.
’Deki gway isi mis ap̱o/ a’di jin merki’da p̱owa raḵ mo.
Gway piti ta Tap̱a mo. Yuḵi gway ki moŋ’kuny bwa mo ibwambori a’di mo.
5 Ababa gi uni kun daran ki icom mo, dhali amanhil up̱ gun wuna ikaṯẖ mo tani,
a’di ta’da Arumgimis jin di’d e mom piti jin ḵogu mo.
6 Arumgimis ki c̱i uni kun dar gi gu’b mo mo mmo’ko icine/ mo.
A’di ki sus ’kwani gun dhunu eya sijin e mo jin rusa/ rus mo,
hili uni gun pish is ka le’d mo tani uni ’kokin e mo jin ta’da burṯa/ o’d ka burṯa/ o’d mo.
7 Ayy Arumgimis, me’d jin yana /e ka pije/ nyaḵki ’kwanim pini mo tani
dhali me’d jin yana /eya ye’th ye’th nyaḵki ’kwanim pini mo e mombwaasho mo tani,
Doshi ma dhali ’cunycuri yan mo.
8 mony’cesh yiḵinki is mo dhali momis wolki’da shoka ’cesh ’peni icine/ mo,
e buŋ’kus ma Arumgimis mo.
Wosh Sinaa/ c̱aan mo tani a’di yiḵinki is mo e buŋ’kus ma Arumgimis mo,
a’di jin ta’da Arumgimis ma Israyiil mo.
9 Ayy Arumgimis, /e dhalkina sho’k mmohe’th kagahara mo,
/e jin wari mal pini is ka nyaŋ’ko’d mo me’d jin wuyina is a’di e mo.
10 Ama’diny ḵa’bal pini uni gamki mo jin ’konu icine/ mo.
E mo mii miiŋ ganam pini mo tani, ayy Arumgimis, /e ki thoson mii gom ’kwani kun dar gi to mo.
11 Tap̱a ḵanki gwo mo.
Uni gwansan tana ris kagahara kun ḵalki gwom ’borga/ yan mo.
12 Imaliḵ gi ’kwani ma mee mo tani uni son mo, hili uni sokin mo.
Up̱ kun ’koni pa mo tani uni ḵwa/ki to jin dilu bwa mo,
13 ba uni nyaḵ ’ko ki ḵa’bal e bwam ma goŋ mo,
dhala biŋ gurko/ uni ’koshkunu is ki ’dolkon kush mo
dhali jeshem piti c̱a’b ki go’d go’d me’d ’dolkona go’d go’d mo.
14 Ki a’di jin ta gi Mom’bi’th ma Dem Dem c̱ekerki imaliḵ bwa mo tani
awasa/ p̱u’dki’d ap̱o/ Wosha Salmuun mo.
15 Ayy, wosh jin turatur jin c̱a’bki dem dem mo, jin ta wosha turga/ gi Pam Bashan mo.
Ayy wosha turga/ jin ’kana ’kup̱ ki bidhi/ bidhi/ ka ris mo, jin ta wosha turga/ gi Pam Bashan mo.
16 Ata hila /e mo ki en dhap̱an kan mo, ayy, wosha turga/ jin ’kana ’kup̱ ki bidhi/ bidhi/ ka ris mo,
e ’kuwosh jin on ma Arumgimis bwa mo mmota mom piti mmoc̱a’bi cine/ mo?
Nye, mo jin mina Tap̱a c̱a’b ki sule/ sule/ mo.
17 Ki mom’bi’th ma ris shumarum kun tana dem dem mo kun ta iss ’kwanimpa ka iss ’de/ ka alip̱ mo,
dhala alaap̱a p̱owa alaap̱ mo,
Tap̱a pu’dki’d ’peni ’kuwosha Sinaa/ e mo jin ḵogu mo.
18 /E ki poḵ wosh jin turatur mo,
dhali /e ki shu uni bway uni gun bu’thkunu mo e bway pini jin yana /e mo,
dhali bu’th to kun c̱inu ki me’d e bwaŋ ’kwani mo,
isi kan e bwaŋ ’kwani kun pishi is ka le’d mo, wakan ki Tap̱a Arumgimis midi di e mo yan mo be.
19 Mom’bor mii midi di gom Tap̱a mo,
a’di jin ’de’kki ana abor ki mis isa yempa/ mo.
Arumgimis a’di ta bway gi mowoṯẖ bana mo.
Doshi ma dhali ’cunycuri yan mo.
20 Arumgimis bana a’di ta’da Arumgimis gi bway gi mowoṯẖ mo.
Dhali eya Arumgimis mo tani, a’di ta Tap̱a jin cila mo jin yenu ’peni mowu mo.
21 Hili Arumgimis midi pwaṯẖ ’kup̱ gi uni kun ta ’kup̱ ki a’di mo,
dhali ayinyjwa gi ’kup̱ gi a’di jin ya’d e bway piti jin dina mii a’di i’ba/ mo.
22 Tap̱a o gwo mo ki:
Aha/ mina doḵ uni ka nyaŋ’ko’d ’peni Pam Bashan mo,
dhali aha/ mina doḵ uni ka nyaŋ’ko’d ’peni ḵumma/ yi’de/ jin ’kula’kul mo
23 ki um mini lam sho’k bum ka bas mo,
dhali ka le’d ma ’kam bum mo tani uni mini ta gi tonṯe/ ’peni ’kwani gi ’kup̱ bum mo.
24 Yam pini kun ḵogu kun yana /e mo tani mishu mo, ayy Arumgimis,
a’di jin ta ya ma Arumgimis pem mo, a’di jin ta’da Maliḵ pem mo, e mo jin ḵogu mo,
25 imanyuḵ gway kun iina bori a’di mo, dhali uni kun buḵina dheŋdhenye/ iini ’ko’d mo
dhali bwaman uni mo tani nyara/ p̱ina dheŋdhenyem buni ki me’d mo.
26 ’Bori Arumgimis mii e dhana tul ’kup̱ gi ’kwani mo,
Tap̱a, ayy um ’kwani kun ta uc̱i ma Israyiil kun kasha e mo.
27 ’Pena waḵ ma Benyamiin, a’di jin p̱iski’d e bwaman uni, jin shu’da shu/um bway mo,
e bwaman gi iya/ gi ’Kwani Yahuuda/ eya waambuhany buni mo,
dhali e iya/ gi ’Kwani gi Pan Sabulun mo, dhali e iya/ gi ’Kwani gi Pa Nap̱taali mo.
28 Tilu mom’bi’th ma dem dem pini is mo, ayy Arumgimis.
Ṯori mom’bi’th pini mo, ayy Arumgimis, /e jin wagaski a’di gom am mo.
29 Gom gu’b gi mondheleladhelel pini jin di’d e Pa Urushaliim mo tani
imaliḵ ḵalki to kun c̱inu ki me’d mmoc̱i /e mo.
30 Ḵucuri to/e gwansan kun ’kon e bwaman ma pil mo,
dhali e bwaman ma ma’diny gwaṯẖim bip̱ nyaḵki ushi bip̱ gi ’kwani mo.
Yap̱ uni ki sho’k uni gwansan kun ’dap̱kina e goma thulp̱a/ mo,
dhali c̱ekerki ’kwani bwa mo uni gun ’kunyi bwa e mo ma mee mo.
31 Dhalka koroḵ ḵalu ’peni Pam Masir mo.
Dhalki ’Kwaniŋ Gale/ soyin ki jahanne/ mo dhali he’th me’d buni goma Arumgimis mo.
32 Yuḵi gway eya Arumgimis mo, ayy aris ’peŋkuman bampa/ gi mony’cesh mo.
Yuḵi gway mmomaŋ Tap̱a mo.
Doshi ma dhali ’cunycuri yan mo.
33 E a’di jin merki’d eya p̱owa ris momis mo, a’di jin ta gi momisa dhamo/ mo.
Hili mo mo ma, a’di hashki ’twam piti ’peni mun mo, ’twam piti jin c̱a’bki dem dem mo.
34 C̱ika Arumgimis mom’bi’th mo,
mom’bi’th piti jin miikina a’di miin tap̱a ap̱o/ ’kwani ma Israyiil mo,
dhali mom’bi’th piti a’di diki’d e bwaman momis mo.
35 Arumgimis a’di ḵa/aḵa/ e mom piti jin ḵogu mo,
a’di jin ta’da Arumgimis gi ’Kwani ma Israyiil mo,
a’di ki c̱i mom’bi’th mo dhali ’bi’th ’kwanim piti is mo.
Mom’bor mii midi di goma Arumgimis mo.