77
Eya manyuḵ gway, isi ki gwo gi a’di jin ’cemki gway jin yuḵu ka Yaduṯẖuun mo. Gway ma Asap̱.
1 Aha/ gwokina ’twa/ Arumgimis ki nyanye/ mo,
mmoko ’twa/ Arumgimis ki nyanye/ ki a’di midi ciḵ aha/ ’twa/ mo.
2 Ka tee jin ṯocu aha/ bwa mo tani aha/ simmkina Tap̱a e mo,
e mon’thiny me’d pem a’di he’thki’d mo ki dar gi mo jin wuna is a’di e mo.
Aḵashiram pem a’di ushki’d mo ki a’di minu malas mo.
3 Aha/ kulumkina gwo ibwa goma Arumgimis mo, dhali aha/ gwokina mo mmo/anan is mo.
Dhali aha/ kulumkina gwo ibwa mo dhali shi/in pem ’thikina buye/ mo.
Doshi ma dhali ’cunycuri yan mo.
4 /E ki bu’th ’ko’d em pem me’d mo ’peni mo jin ’kamutha a’di e mo.
Aha/ ṯocu bwa kagahara mo dhali aha/ mola gwo o mo.
5 Aha/ hila isi gwo i e goma teen dhamo/ gunn mo,
dhali aha/ kakina yil gunn e kadhamo/ mo.
6 Aha/ ṯorkina ṯor eya dum pem mon’thiny ka ḵar/e mo.
Dhali aha/ kulumkina gwo ibwa mo dhali aha/ ŋap̱kina shi/in pem mo.
7 Mina Tap̱a usha ush ki sule/ mo
dhali diki mii mii ma ’the doḵ/e ’taa?
8 Mo/en piti jin ṯelu sho’k daḵki’d mo ’taa?
Dhali aris gwom piti kun onu is ’kokin ntagi ’pemen ma risa tee ’baar mo ’taa?
9 Arumgimis thiski mii ma ’them piti e mo ’taa?
Dhala nyor piti jin shwakina a’di mo tani a’di daḵki’da hil hil ki e ma ’thime/ ki mo/en mo ’taa?
Doshi ma dhali ’cunycuri yan mo.
10 Dhali aha/ ona gwo mo ki: A’di ta aha/ jin jwakaṯkunuwa du mo
ki me’d gi a’di jin Caa e ki Ca aḵki mii e mo.
11 Aha/ mina ka mii gi Tap̱a e mo.
Nye, aha/ mina ka momer piti e ’peni kun dhamo/ mo.
12 Aha/ mina kulum gwo ibwa goma ris miin tom pini mo
dhali ṯikir gwo kulum ibwa gom mii ma dem dem pini mo.
13 Bway pini, ayy Arumgimis, a’di ḵogu mo.
Ka rum jana caaca me’da Arumgimis banaŋ gana/ mo?
14 /E tana Arumgimis jin miiki momer mo,
/e jin piki mo ma dem dem pini ibwaman ’kwani mo.
15 /E ki me’da bim pini mo tani /e ki wan ’kwanim pini ’ba/ mo,
uni gun ta iya/ ma Yakuub mo dhali ku ma Yuusup̱ mo.
Doshi ma dhali ’cunycuri yan mo.
16 Ka ris yi’de/ p̱arki /e e mo tani ayy Arumgimis,
ka ris yi’de/ p̱arki /e e mo tani uni ḵo/kina ḵo/ is mo,
nye, uni gun ’kula’kul mo tani deekina is ki bir bir gom moŋḵo/ is mo.
17 Dhali araḵ kun ’kani mis wolki yi’de/ mo,
dhali momis si’da/ dhalki mondor ma sho’k me’d mo.
Dhali athop̱am pini a’di dhwa/a’dki’d ki dhwa/a’d dhwa/a’d mo eya ris ’twaŋkal kuku/ mo.
18 Dhali mom pini jin ’twaḵa mondor ma sho’k mo tani a’di diki’d e ’tham kun ’theḵkin mo.
Awara sho’k pini a’di kushki mony’cesh mo,
dhali mony’cesh deeki’d ki bir bir mo dhali yiḵin is mo.
19 Bway pini diki’d e bwam ḵumma/ yi’de/ mo
dhali bway tur pini diki’d eya dhan yi’de/ mo.
Dhala dum bwam sho’k pini jin yana /e mo tani mishuwa?
20 /E ki sus ’kwanim pini me’da ma’diny ḵa’bal mo,
ki me’d ma Musa mo dhala Haruun mo.