85
Eya manyuḵ gway mo. Gway gom iya/ ma Guurah mo.
1 Tap̱a, /e miiki isi mii gi bwa goma ’cesh pini mo.
/E ki waru/ shamaneṯṯan ma Yakuub is mo.
2 /E ki gwamki miinthus gi ’kwanim pini mo.
/E ki dhal ka ris miinthus buni ’pen mo.
Doshi ma dhali ’cunycuri yan mo.
3 /E doḵkina nyor pini bway bwa ’baar mo.
/E ṯu’kkin mo ’pena nyor pini jin ’batha’ba’th mo.
4 Waru/ aman is ka nyaŋ’ko’d mo doḵ/e ayy Arumgimis jin ta bway mowoṯẖ bam mo
dhali dhu ka nyor pini gunn ’pen ka pije/ kun deḵkina /e ap̱o/ aman mo.
5 A/e mini miiya nyor ap̱o/ aman ki sule/ sule/ kan mo?
A/e mini dhala nyor pini mmoya ki tur ap̱o/ ma risa nyaḵum yil gi ’kwani kana?
6 Mina /e bunya/ diki tash am e mo doḵ/e?
ki ’kwanim pini mina bwa ’kuny mo e /e?
7 Ṯori aman mo/en pini jin ṯelu sho’k mo ma, ayy Tap̱a,
dhali dhalki aman bway gi mowoṯẖ pini me’d mo.
8 Dhalki aha/ ciḵa gwo mo ma, gwo jin min ma Arumgimis jin ta Tap̱a o mo,
haali/ a’di midi o gwo gom moŋḵu’th is ki ’kwanim piti mo,
dhali unim piti gwansan kun dhunu mo ki she/ ki dhelel dhelel mo, dhali uni gwansan kun ṯu’kkun e a’di mo eya dum buni mo.
9 Ka jiŋ gana/ bway mowoṯẖ piti a’di diki’d e me’d mo gom uni gwansan kun ḵo/ki a’di mo
ki monyca midi di e bampam bana mo.
10 Mo/en jin ṯelu sho’k mo dhali mii jin ta ji ma isiŋ gana/ mo tani uni mini sho ki me’d mo.
Mii ma ḵar/e dhali moŋḵu’th is uni mini p̱i ’twa/ ka rem ’kup̱ mo.
11 Mo ma isiŋ gana/ midi kash e me’d yi’de/ ’peni mony’cesh mo,
dhali mii ma ḵar/e midi hil ka luŋgu’b ’peni momis mo.
12 Nye, Tap̱a a’di midi c̱i a’di jin ’boro’d mo,
dhali bampam bana a’di midi gwono’d a’di jin midi mara mar is mo.
13 Mii ma ḵar/e midi ya ibwambori a’di mo
dhali kar ŋaṯgin piti mmota bway mo be.