89
Gway jin yedhu a/Eṯẖaan sho’k jin ta Wathi/ ma Asraah mo.
Aha/ mina yuḵ gway gom mo/en pini jin ṯelu sho’k mo, ayy Tap̱a, ki sule/ sule/ mo.
Ki ’twa/ pem mo tani aha/ mina bah gwo gom mo ma isiŋ ganam pini eya risa nyaḵum yil gi ’kwaniny’cesh mo.
Haali/ mo/en pini jin ṯelu sho’k mo tani a’di ṯelkunu ki sule/ sule/ mo.
Mo ma isiŋ ganam pini a’di rwa’ckunu mo me’d momis mo.
/E ki o gwo mo ki: Aha/ gamkina gwo me’d ki jin ’dem pem jin kwanyka/ mo.
Aha/ thulkina gwo me’da p̱o/ goma Dawuu’d jin ta c̱iŋkinam pem mo.
Aha/ mina ṯel emen pini sho’k ki sule/ sule/ mo,
dhali nyaŋa ḵursi ma maliḵ pini goma risa nyaḵum yil gi ’kwani mo.
Doshi ma dhali ’cunycuri yan mo.
Dhalki momis maŋ momer pini mo, ayy Tap̱a,
dhali mo ma isiŋ ganam pini e dhana tul ’kup̱ gi ’kwani kun ḵogu mo.
Haali/ kaja a’di jin di’d e momis gunn kun uḵu jin minu kar ka p̱ar nyaḵki Tap̱a mo?
Kaja ibwaman uni gi momis jin wakina e ki Tap̱a mo?
Arumgimis a’di jin ḵo/kunu eya dhana tul ’kup̱ gi ’kwanim piti kun ḵogu mo,
a’di jin caaca mo dhali jin ta’da pure/ mo ap̱owa ris uni ’baar mo kun ’kamki a’di is mo.
Ayy Tap̱a Arumgimis gi momis mo,
kaja a’di jin ta jima dem dem me’d /e mo? ayy Tap̱a,
nyaḵki mo ma isiŋ ganam pini jin ’kamki /e is mo.
/E jikina ji ap̱o/ yi’de/ jin birki bakal mo.
Ki lanthinem pini jin cukina a’di mis mo tani /e doshki uni mo.
10 /E siri’ckina Rahab ap̱o/ ki sho’k mo me’d buŋgwar isa goŋgoro/ mo.
/E ḵwa/ki ’kwani kun ta ’kup̱ ki /e ’twa/ mo ka bim pini jin c̱a’bki dem dem mo.
11 Momis ta kum pini mo dhali mony’cesh si’da/ ta jim pini mo.
Mony’cesh dhala ris to ’baar kun ’kon e a’di mo tani, /e ḵa’bki uni mo be.
12 Abora bim poros dhali abora biny cam /e uḵki uni mo.
Wosh ma Tabur dhali Wosh ma Harmuun uni ’kunykina bwa gom gway pini mo.
13 /E takin ga bim pini jin c̱a’bki dem dem mo.
Me’d pini ’bitha’bi’th mo, me’da bim poros pini turatur mo.
14 Mo ma ḵar/e dhali mo jin dhunuwa dhu ka p̱o/ uni ḵa’bkina ḵursi ma maliḵ pini mo
dhali mo/en jin ṯelu sho’k mo dhali mii ma isiŋ ganam pini mo uni iikini bwambori /e mo.
15 Mom’bor mii gom ’kwani kun mishi cuu mo e mo ma tul ’kup̱ jin yuḵuwa yuḵ mo,
uni gun iikin mo, ayy Tap̱a, e moŋkush gi jis/em pini mo,
16 uni gun ’de’k gway isi mis gom gway pini ka tee ’baar mo,
dhali kar mo ma ḵar/em pini ki ca mo.
17 Haali/ /e ta monyca gom mom’bi’th is buni mo.
Ki mii ma ’them pini mo tani cem bam karkunu ki ca mo.
18 Haali/ agoŋgoro/ gi me’d bana mo tani a’di ta ji gi Tap̱a mo,
amaliḵ bana mo tani a’di ta ji gi A’din ’De/ jin Ḵogu jin ta jima Israyiil mo.
 
19 Haali/ ’pena dhamo/ mo tani /e ṯorki gwo ki tonyjan mo
ki a’dim pinin ’de/ jin ta isiŋ gana/ mo dhali o a’di gwo mo ki:
Aha/ karkina toŋ’kup̱ ’dolkon ap̱o/ jan ’de/ a’di jin c̱a’bki dem dem mo,
dhali aha/ karkina a’di ki ca, a’din ṯal ’de/ yan jin kwanyu/ mo ’peni ’kwani mo.
20 Aha/ gamkina Dawuu’d mo a’di jin ta c̱iŋkinam pem mo.
Ka yin pem jin ḵogu mo tani aha/ ki ’koshki a’di mo.
21 Wakan me’d pem midi diya p̱o/ a’di ki sule/ sule/ mo.
Abim pem si’da/ midi ’bi’th a’di is mo.
22 Uni gun ta ’kup̱ ki a’di mo tani uni mini ’koki p̱i a’di e ki yuḵ mo.
Uni gun ta thus ki thus mini ’koki kar a’di mo mmokar is ki gwa’d mo.
23 Aha/ mina siri’c uni gun ta ’kup̱ ki a’di ki sho’k ibwambori a’di mo.
dhali dher uni gwahan is bwa ka ’cesh mo uni gun shi/ki a’di i e mo.
24 Mii ma isiŋ ganam pem dhali mo/en pem jin ṯelu sho’k mo tani uni mini nyaḵ ’ko ki a’di mo be,
dhali ki gway pem mo tani cem piti minu kar ki ca mo.
25 Aha/ mina kar me’d piti ap̱o/ ḵumma/ yi’de/ mo
dhali me’da bim poros piti ap̱o/ yi’de/ kun son mo.
26 A’di midi ’ther ko e aha/ mo dhali o gwo mo ki: /E tana Ababam pem mo,
jin ta’da Arumgimis pem mo, dhali Wosh jin ta bway mowoṯẖ pem mo.
27 Dhali aha/ mina kar a’di mmota abwanyara/ mo,
a’di jin eḵa/ eḵ mmobol imaliḵ gi mony’cesh e mo.
28 Mo/en pem jin ṯelu sho’k mo tani aha/ mina karki a’di gom a’di ki sule/ sule/ mo.
Dhali gwom pem jin gamka/ me’d mo midi dosh mmorwa’ckunu a’di gom a’di mo.
29 Aha/ mina ṯel jil piti sho’k ki sule/ sule/ mo
dhali aḵursi ma maliḵ piti mina e wa ka tee gi momis mo.
30 Waḵki/ uc̱im piti mini dhal gwoŋḵan pem jin c̱inu ’pen mo
dhali ’koki ii isi me’d gwoŋḵan kun onu mo tani,
31 dhali waḵki/ uni ki p̱uu gwoŋḵan pem kun bahu mo
dhali ’koki dhu gwoŋḵan pem kun ’kwarkunu mo tani
32 yan’ko’d aha/ mina c̱i uni ajisa gom gwondhaŋ buni ki cwam pem mo
dhali miinthus buni ki gulu’c jin miga/ dor uni mo.
33 Hili aha/ mina joc̱ mo/en pem jin ṯelu sho’k ’peni a’di yisa,
walla aha/ mina ta thus gom mii ma isiŋ ganam pem yisa.
34 Aha/ mina diki p̱uu gwo jin gamka/ me’d mo
walla aḵ gwo e mo jin piyi’d ’peni ’twam pem mo.
35 Me’d ’de/ ki sule/ aha/ okina gwo isi ’baar mo mmothul gwo me’da p̱o/ gom mondhelel pem mo.
Dhali aha/ mina diki ta aṯor goma Dawuu’d mo.
36 Jil piti midi ’dim ’kup̱ ki sule/ sule/ mo,
dhali aḵursi ma maliḵ piti midi di ki sule/ me’da tente/ ibwambori jis/em pem mo.
37 Me’da ppe mo tani a’di midi ṯel sho’k ki sule/ sule/ mo.
A’di midi dosh ki morwa’c is mo ki momis ’kon mmo’dim ’kup̱ mo.
Doshi ma dhali ’cunycuri yan mo.
38 Hili shwane/ /e biṯkina biṯa sho mo dhali ruḵa/ ruḵ mo.
/E ’tu’dkunu mo ka nyor ap̱o/ a’dim pini jin ’koshkunu ki monyca mo.
39 /E waṯki gwom pini jin gamu me’d mo gi c̱iŋkinam pini mo.
/E ki shi/ toŋ’kup̱ piti is e bu’da’cesh mo.
40 /E ki yu’d agoŋ piti mo.
/E ki kar mom piti jin ṯenu gwo mmokup̱ mo.
41 Aris uni gwansan kun pekin mo uni dilki a’di to mo.
A’di c̱ikunu gura/ ki imannyaḵ ’kom piti mo.
42 /E ki kar me’da bim poros gi a’di jin ta ’kup̱ ki a’di ki ca mo.
/E ki dhuwa ris uni gun ta ’kup̱ ki a’di mmo’kuny bwa mo.
43 Nye, /e ki doḵ shemen gandal piti jin kaaka ka nyaŋ’ko’d mo.
Dhali /e diki kar a’di mmodosh mo e mo ma mee mo.
44 /E ki joc̱ cwa ma maliḵ ’peni me’d piti mo
dhali /e ki biṯa ḵursi ma maliḵ piti a’cesh mo.
45 /E ki kara teem piti ki kuṯ kuṯ mo ateem piti jin tana a’di dhuru’c mo.
/E ki tash a’di is ki mo ma ’the is mo.
Doshi ma dhali ’cunycuri yan mo.
46 Ki mo gi wakata, ayy Tap̱a, imina /e bag is pini ki sule/ sule/ kan mo?
Ki mo gi wakata, imin ma nyor pini pur me’d o’d kan mo?
47 Kayi gwo e mo ma, ayy Tap̱a, mondiki/e wana bar piti kata mo?
Dina /e ki p̱ar e mom pini jin uḵa /e to di bwa ’te/ goma ris iya/ gi ’kwani mo?
48 Wathi/ jana sa/ imidi di ki e mmodiki p̱ar wu e mo?
Dhali kaja si’da/ imidi misha ḵashiram piti woṯẖ ’peni mom’bi’th ma Haawiya mo?
Doshi ma dhali ’cunycuri yan mo.
49 Tap̱a, mane mo/en pinin dhamo/ yin jin ṯelu sho’k mo,
a’di jin tana /e isiŋ gana/ a’di jin thulkina /e aDawuu’d gwo me’da p̱o/ mo?
50 Kayi gwo e mo ma, ayy Tap̱a, c̱iŋkinam pini c̱inu gura/ mo be.
Kayi gwo e mo ma, ki aha/ ḵalkina asor gi ’kwani gwansan eya bor pem mo,
51 a’di jin ṯẖunykina ’kwani kun ta ’kup̱ ki /e ’twa/ is mo, ayy Tap̱a,
a’di jin miikina uni ka maḵ mo, ŋaṯgin gi a’di jin ’koshkina /e ki monyca mo.
52 Mom’bor mii gom Tap̱a ki sule/ sule/ mo.
Amen dhali Amen.