91
A’di jin c̱a’bki’d eya darha’da/ gi a’di jin Caa e ki Ca mo,
a’di jin c̱a’bki’d eya la gi a’di jin c̱a’bki dem dem mo,
midi o Tap̱a gwo mo ki: /E a’di ihurga/ jwa icine/ mo dhali /e tana cur pem jin ṯenu gwo mo,
Arumgimis pem, e /e mo tani aha/ gamkina gwo is mo.
Haali/ a’di midi ’cuḵ /e mo ’pena gume/ jin cesh ma mancesh to to mo
dhali ’peni to jin wo’cki ’kwani is she/ mmowu mo.
A’di midi kum /e ’kup̱ ki thulas piti mo,
dhali e bwaŋ’kwariny ma bim piti mo tani /e mini gam mo jin huru jwa mo.
Mii ma isiŋ ganam piti a’di ta’da goŋgoro/ mo dhali p̱a’dal mo.
/E mini diki ḵo/ is gom mon’thiny jin midi miiya pure/ mo,
walla athop̱a/ jin p̱eki’d montee mo,
walla to jin wo’cki is she/ jin parki’d mon’thiny mo,
walla mo jin ’ce’du/ sho’k jin shi/ki’da shi/ is montee mo.
Alip̱ ’kwani mini rasu/ e ’ko’d gwar pini mo,
dhali alaap̱i ’kume’d mini rasu/ ka bim poros pini mo,
hili a’di midi diki p̱u’du/ mmo’dish /e is mo.
/E mini hil ki jasi em pini mo
dhali hil mo jin minu ri’c a’di jin ta thus ki thus mo.
Haali/ /e ki kar Tap̱a mmota jim pini jin hura /e jwa mo,
a’di jin Caa e ki Ca mo jin ta mom pini jin c̱a’ba /e icine/ mo tani
10 tonthusa kamu/ midi diya mmop̱u’da p̱o/ /eya?
walla mo jin doruwa dor midi ’dish /e is e gu’b burrinyem pini jin c̱a’ba /eya?
11 Haali/ a’di midi hash iman’doyu gwom piti mo mmoḵan gwo gom /e mo
dhali mmoji /e mo eya ris bway pini ’baar mo.
12 E me’d buni mo tani uni mini ’de’k /e mo,
isi ciki/ ki /e mina sho’k pini diki ṯorosh ap̱o/ wosh mo be.
13 /E mini yap̱a dhop̱a p̱o/ ki sho’k mo dhali tasha/ jin ta ga ṯi’di cine/ mo,
dhali adhop̱ jin ta dhuru’c mo dhali tasha/ mo /e mini yap̱ uni ki sho’k mo.
 
14 Haali/ a’di koṯẖki aha/ me’d ki mo/en mo tani aha/ mina ’cuḵ a’di mo.
Dhali aha/ mina cesh a’di ka p̱o/ mo haali/ a’di mishki gway pem mo be.
15 Ki a’di midi yuḵ aha/ mo tani aha/ mina yuḵ a’di ’twa/ mo,
aha/ mina nyaḵ di ki a’di e mo jin ṯoju a’di bwa mo.
Aha/ mina ’cwam a’di mo dhali taḵ a’di mo.
16 Ki mondiki/e jin tura ’ba/ ki tur mo tani aha/ mina kap̱ a’diya du mo,
dhali ṯor a’di bway gi mowoṯẖ pem mo.