95
1 Ayy iiyu/ mo, dhalki ana yuḵa gway gom Tap̱a mo.
Dhalki ana ’kunya bwa kagahara mmowol cuuwa/ gom wosh jin ta bway mowoṯẖ bana mo.
2 Dhalki ana iiyina mo e buŋ’kus piti mo mmoc̱i mo jin ’boruwa ’bor bwa i is mo.
Dhalki ana ’kunya bwa kagahara mmowol cuuwa/ nyaḵki gway jin maŋuwa maŋ mo.
3 Haali/ Tap̱a a’di ta’da Arumgimis jin caaca mo,
dhali a’di ita’da Maliḵ jin caaca ap̱owa risa rum p̱inycon mo.
4 E me’d piti mo tani moŋ’kulga/ gi mony’cesh ’kokin mo,
dhali mo jin ḵa’dama/ ḵa’dam kun ta wosha turga/ si’da/ uni ta kum piti mo.
5 Ḵumma/ yi’de/ uni ta kum piti mo, haali/ a’di i/uḵki uni mo,
haali/ me’d piti a’di uḵki mony’cesh jin ḵuthaḵu’th mo.
6 Ayy iiyu/ mo, dhalki ana luŋa luŋ mo, dhali ’ko ki jiŋ ’kup̱a’dup̱un mo,
dhalki ana raḵa is ka ’cesh ibwambori Tap̱a jin uḵki ana mo.
7 Haali/ a’di ta’da Arumgimis bana mo,
dhali ana tana ’kwani ma shon dhii/i’d piti mo, dhali ḵa’bal gi me’d piti mo.
Ayy ka tee yan shwane/ mo ki um mini ’taki ciḵ ’twam piti moyi.
8 Dhalka dum bum ki ’bi’th mo me’d mo jin yuḵu gway ka Mariiba mo
me’da tee yan jin ta’da tee ma Massa e bwaasho mo,
9 ki ibabam bum palki aha/ mo
dhali kar aha/ mmonyo/ mo, ba uni mishki miim pem mo be.
10 Ki yila issu/ mo tani aha/ jwakaṯkunuwa du mo gom ’kwani ma nyaḵum yil gwan mo,
dhali o gwo mo ki: Uni ’kwani gwansan uni tan ma dum buni ṯẖuthu/ ki ṯẖuthu/ mo,
dhali uni ’koki dhu gwo ki bway pem mo.
11 Wakan aha/ thulkina gwo me’da p̱o/ ka nyor pem mo
ki uni mini ’taki ’koki cic̱ mo e mo jin sinu is mo be.