10
Iwaḵa, adum pem oyaa/ dhali a’thom pem eya Arumgimis mo gom ’Kwani ma Israyiil ki uni minu ’taki ta is ki me’d mo be. Aha/ ḵalkina gwo o gom uni mo, ki uni shwakina nyor goma Arumgimis mo, hili a’di mishkina uni ’ban mo yisa. Haali/ mmo’kona uni ki ji mol mo gom mo ma ḵar/e yan jin p̱u’dki’d mo ’peni Arumgimis mo dhali mmosimma uni mii e mo mmoṯel mo ma ḵar/em buni sho’k mo tani uni ’koki dhu is buni ’ko’di me’d mo ma ḵar/e ma Arumgimis mo be. Haala Ḵrisṯẖos a’di ta jiŋ ’ko’d gi gwoŋḵan jin c̱inu mo, ka ris ’kwani ka ’deṯe/ ’deṯe/ kun tan gi moŋgam gwo is mo minu dhu ki mo ma ḵar/e mo be.
AMusa ’kwarki gwo mo ki, wathi/ jin boṯo’d ki mo ma ḵar/e jin ’dap̱a’d ki gwoŋḵan jin c̱inu mo tani midi c̱a’b e a’di mo be. Dhali hili, mo ma ḵar/e jin ’dap̱a’d ki gwo jin gamu is mo tani a’di o gwo mo ki: Dhalku/ ki o gwo eya dum pini mo ki: Kaja a’di jin midi se momis mo? (ki a’di midi thula Ḵrisṯẖos ka ’cesh mo) walla, Kaja a’di jin midi thul jis jwa mo? (ki a’di midi guya Ḵrisṯẖos ka pije/ ’peni mowu mo.) Hili gwo wakata okunu mo? Gwo ’dishki /e is mo, eya le’d pini mo dhali eya dum pini mo (a’di jin ta gwo gi moŋgam is jin c̱ikina aman mo be). Haali/ waḵki/ /e mini pi gwo ki ’twam pini ka Yesus ta Tap̱a mo dhali gam gwo is ka dum pini ka Arumgimis ’de’kki a’di ’peni mowu mo tani /e minu woṯẖ mo be. 10 Haali/ wathi/ jin gam gwo is ka dum piti mo tani wakan a’di karu ki mo ma ḵar/e mo be. Dhali a’di jin piki gwo ki ’twam piti mo tani dhali kan, a’di woṯẖkunu mo be. 11 Gwo ma Arumgimis jin ’kwarkunu o gwo mo ki: Wathiŋ kamu/ ’de/ jin gamki a’di gwo is mo tani yisa minu kar ki mo ma ’the is yisa. 12 Haali/ mo ma gwar ’de/ diki di e bwaman Wathi/ Yahuuda/ mo dhali Wathiŋ Griḵi mo. Tapa a’di ta Tap̱an ’de/ goma ris ’kwani ’baar mo dhali ta a’di jin c̱i mom piti jin tanu pa mo ap̱owa aris uni kun yuḵ a’di mo be. 13 Haali/ aris ’kwani ka ’deṯe/ ’deṯe/ kun mini yer gway gi Tap̱a mo tani uni iminu ta is ki me’d mo be.
14 Hili ’kwani mini yuḵ a’di kata mo, uni kun ’koki gam a’di gwo is mo? Dhali uni mini gam a’di gwo is kata mo, uni gun ’koki ciḵ gwo ki sule/ sule/ mo? Dhali uni mini ciḵ gwo kata ki dar ga manc̱i gwo mo? 15 Dhali ’kwani mini mish gwo c̱i kata mo? hili isi ciki/ uni minu ’taki mii hash mo ba/. Me’d gwo kun ’kwarkunu mo ki: Sho’k gi uni gwansan kun c̱iki gwom ’borga/ mo tani wani jarowa? 16 Hili uni ’baar ’koki c̱i is ki gwom ’borga/ yan mo. Haali/ a/Ishaya o gwo mo ki: Tapa gamkin maja gwo is jin ciḵa a’di ’peni aman mo? 17 Wakan moŋgam gwo is p̱u’dki’d ’peni a’di jin ciḵkunu mo dhali a’di jin ciḵkunu mo tani p̱u’dki’d ’peni gwo jin c̱ikunu mo goma Ḵrisṯẖos mo be.
18 Dhali hili aha/ doṯkina gwo mo ki: A/ki ’kona uni ki ciḵa? Ka jiŋ gana/ uni ciḵkin mo be. Haali/
’Twam buni yaki’d ki lala’th isi mony’ceshi ’baar mo.
Dhali gwom buni taki’d ki ’pemen gi mony’cesh mo be.
19 Doḵ/e aha/ doṯa gwo mo ki: A/ki ’Kwani ma Israyiil ’koki mish gwo ’bana? Nṯwa/a/ Musa o gwo mo ki:
Aha/ mina kar /e mmoṯa’c bwa gom uni gun ’koki ta kal mo.
E kal jin ta p̱us mo tani aha/ mina kar /e mmoshwaa nyor mo.
20 Dhala Ishaya o gwo wakan ka daran du mo ki:
Aha/ gamkunu ki uni gwansan kun ’koki ŋap̱ aha/ mo.
Aha/ ṯorkina is pem eya tente/ gom uni gwansan gun ’koki doṯ aha/ mo be.
21 Hili gom ’Kwani ma Israyiil mo tani a’di ki o gwo mo ki: Ka tee ’peni mon’thamo/ aha/ he’thkina me’d pem e ’kwani kun tana iman/ush gwo ha e mo dhali kun ta ’kwani kun ta c̱a’ckon ki c̱a’ckon mo be.