2
Mo jin Dwall ma Arumgimis Gwo ka Ḵar/e mo
1 Haali/ a’di gi wakan mo tani /e dar gi gwo mmoc̱i ’ko’d mo, ayy ki /e wathi/ ki /e jana dwalli ci gwo mo. Haali/ ki /e dwalli gwo ap̱o/ a’di mo tani /e waḵki is pini mo haali/ /e jin tana mandwall gwo mo tani /e miiki isi to kun nyaḵkin mo be.
2 Ana misha ki gwon dwall ma Arumgimis p̱u’dki’d ki shem’bor mo ap̱o/ uni gun miiki to gwansan mo be.
3 /Aki ṯosha /e, /e wathi/ ki gwo jin dwalla /e ap̱o/ uni gun miiki to gwansan mo dhali /e bala mii uni ki is pini mo tani a/e mini ye mo ’peni mondwall gwo ma Arumgimis ’taa?
4 A/e boloc̱kina ris mii kun ta kum pa ma Arumgimis gi mo/en gun ishin ka enthus ki bwa mo ’taa? Dhali mmoguna a’di bwa a’kany’cesh mo dhali mmo’kuc̱a a’di bwa ki ’kari’th mowa? ’Kona um ki misha ki momiin ma Arumgimis ki mo/en mo tani ta ’pemen mmosus um mmorica du is mowa?
5 Hili adum bum kun ’bi’thkin mo dhali kun tana ushiŋ gwo mo tani um tulkina nyor is is mo gom is bum mo ka cim ma nyor mo ki gwon dwall ma Arumgimis jin ta jiŋ ḵar/e minu ṯor eya tente/ mo be.
6 Haali/ a’di midi c̱iya ris ’kwani to ka ’deṯe/ ’deṯe/ isi ki mii gun miikina uni mo be.
7 A’di midi c̱i moŋ’koki/e ki sule/ ya ye ’ba/ mo ki uni gwansan kun miiki mii gun ’boron ki bwa gun ’kuc̱u mo ki ’kari’th mmosimm monyca e mo dhali montaḵ mo dhali mo gi molu wu mo be.
8 Hili anyor midi di mo dhali mo jin ḵa/aḵa/ si’da/ mo gom uni gwansan kun ta ibiriŋ gwo mo dhali kun ush gwoŋ gana/ ha e mo mmomii mo hili uni ha gwon ton thus e mo mmomii mo be.
9 Monṯo’c bwa midi di mo dhali wukura/ si’da/ goma ris ’kwaniny’cesh ’baar mo ki ’beles kun miiki miinthus mo. ’Kwani Yahuuda/ nṯwa/a/ mo dhali ’Kwaniŋ Griḵi si’da/ mo be.
10 Hili monyca dhali montaḵ dhali moŋḵu’th is goma ris uni gun mii miiŋ gana/ mo, ’Kwani Yahuuda/ nṯwa/a/ mo dhali ’Kwaniŋ Griḵi si’da/ mo be.
11 Haali/ Arumgimis diki mii mii ka gwar ’de/ mo be.
12 Aris uni gun miiki miinthus ki dar gi gwoŋḵan jin c̱inu mo tani minu ’ce’d sho’k si’da/ ki dar gi gwoŋḵan jin c̱inu mo be. Dhali aris uni gun miiki miinthus ’ko’di gwoŋḵan jin c̱inu mo tani uni minu dwall gwo ki gwoŋḵan jin c̱inu mo be.
13 Haali/ uni gwansan gun shirki gwoŋḵan jin c̱inu ki ’ce mo tani uni yisa nta uniŋ ḵar/e ibwambor ma Arumgimis yisa. Hili uni gwansan gun miiki a’di mo tani uni idhunu ki mo ma ḵar/e mo be.
14 Dhali ki ’kwani kun ’koki ta ’Kwani Yahuuda/ kun dar gi gwoŋḵan jin c̱inu mo mii ki buyem pa ki is buni a’di jin ḵana gwoŋḵan jin c̱inu mo tani uni ta gwoŋḵan ki is buni mo be. Hili ba uni idaran gi gwoŋḵan jin c̱inu mo.
15 I/uni iṯori a’di mo ki a’di jin ḵana gwoŋḵan jin c̱inu mo tani a’di ’kwarkunu eya dum buni mo. Dhali kan si’da/ ’twa/ ma dum buni ta’da man/o gwo mo dhali gwo kun kuluma uni i bwa ki ji wushur mo tani yer uni is ki gway mo walla tor gwo ’twa/ mo sayii
16 ka tee gwansan ka Arumgimis midi dwall ’kwani gwo kun kuma uni e bwa mo isi ki gwom ’borgam pem ka Ḵrisṯẖos jin ta’da Yesus mo be.
’Kwani Yahuuda/ dhali Gwoŋḵan jin C̱inu mo
17 Hili waḵki/ /e yuḵki is pini ki Wathi/ Yahuuda/ mo dhali c̱a’b ’ko’d e gwoŋḵan jin c̱inu mo tani dhali kar ’bam pini ki ca mo ki /e ta jim pa goma Arumgimis mo tani
18 dhali mish bwam piti mo dhali ṯes a’di jin ta isa ’borgaŋ gana/ mo haali/ /e ye’thkunu sho’k mo e gwoŋḵan jin c̱inu mo be tani
19 dhali waḵki/ /e mishkin ka jiŋ gana/ ki /e tana manshu ’kwani kun tana ja’da/ bway mo tani dhali ki /e ta moŋkush gom uni gun ’kon mo e mondhurumi’d mo tani
20 dhali /e tana manṯo’k gom ’kwani kun ta p̱us mo dhali amanṯor ’kwanim ’pereny gwo mo tani mmotana /e gi gwoŋḵan jin c̱inu mo tani arisa yuḵ gun p̱e’dkunu mo mmomish to mo,
21 dhali /e si’da/ jin wakan si’da/ mo tani /e jin ṯori ci gwo mo tani mina /e diki ṯor is pini gwo mo ’taa? Dhali ki /e din mo mmoṯor gwo ap̱o/ mo gi ḵwalu to mo tani /e si’da/ ḵwalki to mo ’taa?
22 /E jin o gwo ki jaŋ kamu/ midi mii dhalku/ c̱al ki mii mii mo tani /e si’da/ din mo ’taa? mmomii miinyc̱al mo. /E jin shi/i tomp̱inyconi e mo tani /e si’da/ ḵwalki to mo ’peni gu’b jin luŋu to mo ’taa?
23 /E jin kar ’bam pini ki ca mo gom gwoŋḵan jin c̱inu mo tani /e ushkina Arumgimis taḵ mo ’taa? mmo’ce’d gwoŋḵan jin c̱inu mo.
24 Haali/ me’d gwo jin ’kwarkunu mo ki: Gway ma Arumgimis walu gwo sora p̱o/ mo e bwaŋ ’kwani kun ’koki ta ’Kwani Yahuuda/ mo gom /e mo be.
25 Haali/ ka jiŋ gana/ mo tani mo jin ’ciṯẖuwa munyjal yis ta jim ’borga/ mo waḵki/ /e ha gwoŋḵan e mo mmomii mo, hili waḵki/ /e ’ce’dki gwoŋḵan mo tani mo ma munyjal yis pini jin ’ciṯẖu/ mo tani a’di warki’d ka munyjal yis jin dinuki ’ciṯẖ mo be.
26 Dhali wakan si’da/ waḵki/ wathi/ jin di’d ka munyjal yis i e mo dhuki gwoŋḵan jin c̱inu mo ka ḵar/e mo tani mina mo ma munyjal yis piti jin dina a’di ki ’ciṯẖ mo tani kar a’di ka munyjal yis jin ’ciṯẖu/ mo ’taa?
27 Dhali wakan si’da/ ’kwani kun ’kon ka munyjal yis i e kankan mo tani hili i/uni idhuki gwoŋḵan jin c̱inu mo tani uni ka jiŋ gana/ mini waḵ /e jin ta gi gwoŋḵan jin ’kwarkunu mo dhali mo ma munyjal yis jin ’ciṯẖu/ kan mo tani hili /e i’ce’d gwoŋḵan jin c̱inu mo be.
28 Haali/ a’di diki ta Wathi/ Yahuudaŋ gana/ jin ta’da p̱or ma pije/ mo be. Dhali mo ma munyjal yis jin ’ciṯẖuŋ gana/ mo diki ta jim p̱or ma pije/ mo dhali jim buŋgwar is mo be.
29 A’di ta Wathi/ Yahuuda/ jin ta jim bwaman mo dhali mo ma munyjal yis jin ’ciṯẖuŋ gana/ mo tani a’di ta jim ma du mo be, jin ta to gi shi/in mo, yisa jin ’kwarkunu ’te/ mo. Montaḵ piti diki di ’peni ’kwani mo tani hili a’di ’peni Arumgimis mo be.