3
Gwo jin Hashu goma Ḵaniisa gi Pan Sardis mo
Dhali eya man’doyu gwo ma ḵaniisa gi Pan Sardis mo tani ’kwari gwo mo ki: Gwo gi a’di jin ta’d gi shi/in ma Arumgimis kun ’koni pesu/ mo dhali acul kun ’koni pesu/ mo be, mmo/o gwo mo ki:
Aha/ misha miin tom pini mo. /E takin gi gway gi a’di jin di ki e mo dhali /e ki is pini a’di iwuni. Meri e mo, dhali ’bithi is mo, a’di jin boc̱ki’d e /e mo dhali a’di jin ’dishkina ’twa/ mmowu mo, haali/ aha/ dinaki gam miiŋ kamu/ jin ’boro’d e miim pini jin ’boro’d jin ha me’d mo ibwambori jis/e ma Arumgimis pem mo. Kayi gwo e mo ma, a’di jin bu’thkina /e mo dhali a’di jin ciḵkina /e mo. Kari a’di jan ma dhali rici /e adu is mo ma. Waḵki/ /e mini diki mer e mo tani aha/ mina yaku/ me’d wathin ’di/ mo dhali /e mini mol mo mo, mo jin miga/ p̱u’dku/ ap̱o/ /e mo be. /E takin ush’ceenne/ naskina/ mo kun ta ’kwani gi Pan Sardis mo, uni kun ’koki nyo/ burrinyem buni mo. Dhali uni mini nyaḵ ii ki aha/ e burrinyeŋ kush mo haali/ uni ha me’d mo be. A’di jin p̱iki mii e mo tani a’di minu shum isi kan ki burrinyeŋ kush mo, dhali aha/ mina diki ’kosh gway piti mo ’pena warka/ gi mondiki/e mo. Aha/ mina pi gway piti ibwambor ma Babam pem mo dhali ibwambori iman’doyu gwom piti mo. A’diyin jin ta’d gi gu’ban’ce mo tani dhalki a’di ciḵ gwo jin ona Shi/in goma ḵaniisa gwansan mo.
Gwo jin Hashu goma Ḵaniisa gi Pam P̱iladalp̱iya mo
Dhali eya man’doyu gwo ma ḵaniisa gi Pam P̱iladalp̱iya mo tani ’kwari gwo mo ki: Gwo gi a’din ’de/ jin ḵogu mo, a’din ’de/ jin ta jiŋ gana/ mo, dhali a’di jin ta’d ga mup̱tha/ ma Dawuu’d mo, a’di jin midi ḵa’d ’twaŋkal mo dhali jan ṯal ’deŋ kamu/ p̱iyi’d jin midi mu’th a’di mo, a’di jin mu’thki a’di mo tani dhali jan ṯal ’deŋ kamu/ mol a’di ḵa’d mo be, mmo/o gwo mo ki:
Aha/ misha miin tom pini mo. Hili mo mo ma, aha/ karkina acampur ki ḵany ibwambori /e mo, a’di jin mola jan ṯal ’deŋ kamu/ mu’th mo. Aha/ misha ki /e tan gi jasi ari mom’bi’th jin gwa’dagwa’d mo dhali /e dini mmodhu gwom pem naskina/ mo dhali /e diki waṯ gway pem mo be. Hili mo mo ma, aha/ mina dhu uni gwansan kun ta ku gi montul is ma Seṯaan mo, uni gun oki uni ta ku gi ’Kwani Yahuuda/ mo dhali uni ta uni yisa, hili uni tana ṯor mo – hili mo mo ma, aha/ mina dhu uni mmop̱u’dku/ mo dhali luŋ ki jiŋ ’kup̱a’dup̱uni bwambori sho’k pini mo, dhali da/ar gwo mo ki aha/ enkina /e mo be. 10 Haali/ /e dhuki gwom pem mo ki bwa jin ’kuc̱a /e ki ’kari’th mo ki mon’dim ’kup̱ mo tani aha/ mina non /e ’peni mompal mo, a’di jin midi p̱u’du/ ap̱o/ mony’ceshi ’baar mo, mmopal uni gwansan kun ’kokin mo e mony’cesh mo be. 11 Aha/ mina p̱u’dku/ ki ’dishe/ mo. Ṯeli sho’k mo e a’di jin tana /e mo, wakan ki jan ṯal ’deŋ kamu/ midi ’taki diki bu’th toŋ ’kup̱ pini mo be. 12 A’di jin p̱iki mii e mo tani aha/ mina kar a’di mmota akaḵ gi gu’b gi mondheleladhelel ma Arumgimis pem mo. A’di midi mol ya ka pije/ ki sule/ sule/ ’peni a’di mo, dhali aha/ mina ’kwar gwo ap̱o/ a’di jin ta gway ma Arumgimis pem mo, dhali gway gi ’peŋkuman Bampa/ ma Arumgimis pem mo, a’di jin ta Pa Urushaliim jin ta jin this mo jin midi p̱u’dku/ ka ’cesh mo ’peni Arumgimis pem mo ’peni momis mo, dhali gway this pem gana/ mo be. 13 A’diyin jin ta’d gi gu’ban’ce mo tani dhalki a’di ciḵ gwo jin ona Shi/in mo goma ḵaniisa gwansan mo.
Gwo jin Hashu goma Ḵaniisa gi Pa Lawudikiyya mo
14 Dhali eya man’doyu gwo ma ḵaniisa gi Pa Lawudikiyya mo tani ’kwari gwo mo ki: Gwo gi a’di ma Amen mo, a’di jin ta isiŋ gana/ mo dhali jin ta’da man/o gwo jin ta jiŋ gana/ mo, jin ta mo ma muŋ’kup̱ me’d jin uḵkin ma Arumgimis aris to mo be, mmo/o gwo mo ki:
15 Aha/ misha miin tom pini mo. /E ŋala/ wani ’thup̱a walla moŋkamu/ ŋala/ ’batha /eya. Ki /e ḵara ba/ imini ’taki ’thup̱a’thup̱ mo walla ’batha’ba’th moyi. 16 Wakan, haali/ /e maŋgalamaŋgal mo dhali /e ŋala/ wani ’thup̱a walla moŋkamu/ ’batha /eya, aha/ mina ya/ /e ka pije/ ’peni ’twam pem mo be. 17 Haali/ /e o gwo ki, aha/ tana pa ki pa mo dhali aha/ wara ki pa mo dhali aha/ mina mii ta gi toŋ kamu/ yisa, mmomola /e mo mo ki /e ṯocu ’kus mo dhali ḵoju e i is mo dhali hatha’ko’d ki ha’th mo dhali ta ja’da/ mo dhali di is ’te/ mo. 18 Wakan aha/ malaskina /e mo mmoyol ’dolkon gana/ ’peni aha/ mo, a’di jin minu tash e ki o’d mo, ki /e mini ’taki ta pa ki pa mo dhali ta gi burrinyeŋ kush mo mmohi’th /e i is mo dhali ’taki kar /e ’peni mo ma ’the is pini jin yana /e is ’te/ mo, ’peni mo jin mishu /e mo dhali /e mini ’taki ta gi ḵwalany mmogwa’c em pini mo, ki /e mini ’taki mish mo mo. 19 Uni gwansan kun enka/ mo tani aha/ ṯo’kkina uni mo dhali aha/ dorkina uni mo. Wakan shwayi miiya nyor mo ki thiṯẖ mo dhali rici /e adu is mo. 20 Hili mo mo ma, aha/ doshkina ishan’tamo/ mo dhali nagkana campura p̱o/ ki me’d mo. Waḵki/ jan ṯal ’deŋ kamu/ midi ciḵ ’twam pem mo dhali ḵa’dki aha/ acampur mo tani aha/ mina seku/ ibwamani a’di mo dhali nyaḵ to shwa ki a’di mo dhali a’di nyaḵki aha/ mo be. 21 A’di jin midi p̱i mii e mo tani aha/ mina c̱i a’di ’ban mo jin mina a’di c̱a’b nyaḵki aha/ ka ḵursi ma maliḵ pem mo, me’d aha/ ki is pem mo mmop̱ikika/ mii e mo dhali aha/ c̱a’bkina nyaḵka Babam pem eya ḵursim piti mo be. 22 A’diyin jin ta’d gi gu’ban’ce mo tani dhalki a’di ciḵ gwo jin ona Shi/in goma ḵaniisa gwansan mo.