Gwo jin Ṯwa/a/ jin ’Kwar ma Buulus goma ṮIMUṮH̱AWUUS mo
1
Monthe Me’d mo
1 ABuulus a’di jin karu ki she/ mo goma Ḵrisṯẖos jin ta’da Yesus mo ki gwoŋḵan ma Arumgimis mo jin ta’da Manwoṯẖ bana mo dhala Ḵrisṯẖos jin ta’da Yesus jin ta mo ma ’teŋ kap̱em bana mo be.
2 Eya Ṯimuṯẖawuus mo, a’di jin ta’da ’cim pem gana/ e moŋgam gwo is mo.
A’the dhali momiimii dhali moŋḵu’th is ’peni Arumgimis jin ta’da Baba mo dhala Ḵrisṯẖos jin ta’da Yesus Tap̱am bana mo be.
Arum jin Rumuwa P̱o/ Gwon Thus jin Ṯoru mo
3 Me’d jin ṯirrishkika/ /e ki gwo mo me’d jin yakika/ ya mo e Pam Makiduniyya mo mmoc̱a’b mo e Pan Ep̱asus mo ki /e mini ’taki ḵan ’kwanin tiya gwo mo mmo’koki ṯor gwonṯora kamu/ jin diki she/ mo
4 walla si’da/ mmo’koki c̱iya hirdhe/ ki is buni mo gom gwo lolop̱ jin ta ja maḵ buni mo dhali mo jin beledhu gwo mo jin dar ki ’pemen mo, a’di jin shushki’da du mo mmodoṯ gwo mo ’te/ mmodhal mii e i is mo gom gwo jin yedhu sho’k jin piyi’d ’peni Arumgimis mo, a’di jin ta gwo e moŋgam gwo is mo.
5 Hili tom bam jin ’dona am ki e mo mmoḵankina aman gwo mo tani ta mo/en be, a’di jin piyi’d ’pena du jin dheleli’d mo dhali ’peni ’twa/ ma dum ’borga/ mo dhali ’peni moŋgam gwo is jin dar ki washila/ mo.
6 ’Kwanin tiya mmogaskina uni mo ’peni to gwansan mo tani uni wanykin ki wanya/ wanya/ mo e gwo kun ’ko bwa ’te/ mo kun ’kokina uni mmoṯora ṯor mo,
7 mmo’kona uni gwo ibwa mo mmota uni kun ta imanṯor gwo mo gom gwoŋḵan jin c̱inu mo. Uni dar ki mo jin mishu gwo ’ban mo gom gwo kun ona uni mo walla gom to kun ona uni gwo mo ki gwo jin gwona uni ’kus mo be.
8 Dhali ana misha mo mo ki gwoŋḵan jin c̱inu mo, a’di ’boro’d mo, waḵki/ wathin ’deŋ kamu/ midi mii a’di mo me’d jin dhala gwoŋḵan a’di bway mo mmomii mo.
9 A’di midi mii mish gwo yansan ’ban mo, ki gwoŋḵan jin c̱inu mo yisa ’thikunuwa ’cesh mo gom uni kun ta kuŋ ḵar/e mo, hili gom iman/ush gwoŋḵan mii mo dhali iman/ush gwo ha e mo, dhali gom ku gi ushuna ush goma Arumgimis mo dhali imanmii miinthus mo, dhali gom ku gi ’koki dhelel mo dhali gom ku gi ’koki dhu mii kun ḵogu mo dhali gom iman’kosha mee mo ki icom mo dhali iman’kosha mee mo ki ikum mo dhali iman’kosha mee mo ki ’kwani mo,
10 dhali ’kwani kun mii miinyc̱al mo dhali imanha’k ’pen c̱eŋ gwas mo dhali imanḵwal ’kwani mo dhali imanta ṯor mo dhali imanthul me’da po/ gwo ka maḵ mo dhali ma to gunn kun miinu ki c̱a’ckon mo e gwoŋ gana/ jin ṯoru mo,
11 isi ki gwo gi monyca gi gwom ’borga/ mo jin ta ji ma Arumgimis jin ’boru mii mo, a’di jin c̱ikunu aha/ mo mmodhu mo be.
Mii ma Buulus jin ’Bora A’di A’bor Bwa i Is mo gom Mo jin Miinuwa Mii mo
12 Aha/ ’borkina a’di bwa i is mo a’di jin c̱iki aha/ mom’bi’th mo gom a’di yan mo, a’di jin ta’da Ḵrisṯẖos jin ta’da Yesus mo jin ta Tap̱am bana mo, haali/ a’di mishki aha/ mo ki aha/ tana ji isiŋ gana/ mo mmokarkina a’di aha/ ’pen ka pije/ mo mmomii to mo gom a’di mo,
13 ba aha/ ’thissa/ walkina gwo sor mo dhali aha/ ’koshkina ’kwani mo dhali aha/ sorkina a’di mo. Hili aha/ bu’thkina momiimii mo haali/ aha/ miikina miim p̱us mo mmodika/ e mo jin daru ki gwo jin gamu is mo.
14 Dhali a’the gi Tap̱am bana guski’d ki sho’k piti gom aha/ mo nyaḵki moŋgam gwo is mo dhali mo/en mo kun ’kon eya Ḵrisṯẖos jin ta’da Yesus mo be.
15 Gwo yan jin onu mo ta gwoŋ gana/ mo dhali a’di ha me’d ki haŋ gana/ mo mmobu’th a’di ’baar mo ka Ḵrisṯẖos jin ta’da Yesus p̱u’dki’d mo e mony’cesh yan mo mmowoṯẖ uni kun miiki miinthus mo. Dhali aha/ tana ’kaŋ’kup̱ jin ta’da manmii miinthus mo.
16 Hili aha/ bu’thkina momiimii mo gom ’kup̱ mii yan mo, ki, e aha/ mo tani me’d jin taka/ ’kaŋ’kup̱ mo tani Yesus Ḵrisṯẖos midi ’taki ṯor eya tente/ bwa ma dum pitiŋ gana/ mo jin ’kuc̱a a’di ki ’kari’th mo mmota she/mm mo gom uni gwansan kun mini ’ko mo mmogam gwo is mo e a’di mo gom moŋ’koki/e ki sule/ sule/ ya ye ’ba/ mo.
17 Eya Maliḵ jin di’d ki she/ yil mo, jin midi mol wu mo, dhali jin molu mish ki e ga ’cesh mo, a’di jin ta’da Arumgimis mo jin di’d ’deŋ gana/ mo, a’di minu taḵ mo dhali kar ki ca mo goma sule/ mo dhali ki sule/ ya ye ’ba/ mo. Amen.
18 Gwoŋḵan yansan ḵankika/ /e mo, Ṯimuṯẖawuus, /e jin ta ya/m pem mo, isi ki gwo kun onu is mo kun bagu mo, uni kun ṯorkunu mo gom /e mo, ki /e mmoshi/irrkunu ki uni mo tani mini ’taki asa asa ’borga/ mo
19 mmoṯel moŋgam gwo is sho’k mo dhali ’twa/ ma duŋ gana/ mo. Mmo/ush gwo ’peni ’twa/ ma du mo tani ’kwanin tiya pwaṯẖki moŋgam gwo is buni mo.
20 E bwaman uni gwan mo tani ta iHiminayus mo dhala Iskandar mo, uni ’kon mo, uni kun c̱ikika/ ka Seṯaan mo ki uni mini da/ar mii mo mmo’koki wal gwo sor mo be.