3
Monthum jin Thumkunu mo gom Jwahaŋ ’Kwaniŋ Ḵaniisa mo
1 A’di ta gwo jin ta isiŋ gana/ be jin onu ki: Waḵki/ wathin ’deŋ kamu/ dina gwo ibwa mo mmomiiya ṯu’c jin miina jwahaŋ ’kwani mo tani a’di ona bwa ka ṯuca ’borga/ mo be.
2 Wathi/ gwanyjaḵa/ midi mii diki mii ta gi mii ’ba/ mo, dhali a’di midi mii ta ga ’bom jasi ’de/ mo, dhali a’di midi mii ta wathi/ jin min ma du ’tim mo, dhali a’di midi mii ḵu’th is ki ’cese/ ’cese/ mo dhali a’di midi mii diki lo’b is piti nycine/ mo, dhali a’di minu mii ta gu’b piti ŋal mo, dhali a’di midi mii ta gwocon ki gwocon mo mmoṯor gwo mo,
3 dhali a’di midi mii diki ’dish mo ma su is mo, dhali a’di midi mii diki mii mii ki ra’b mo hili a’di mina e mii ’thup̱a’thup̱ mo, dhali a’di midi mii diki wala le’d ki ṯas ṯas mo, dhali a’di midi mii diki ta aman/ena guurush mo si’da/.
4 A’di midi mii mish kuŋ gu’b piti dhu ki ’bore/ mo, mmodhu uc̱im piti mmo’dap̱a bora ’cesh mo mmociḵ gwo mo dhali mmotaḵa taḵ mo ka ris ’twaŋkal kuku/ mo.
5 Haali/ waḵki/ wathi/ diki mish kuŋ gu’b piti dhu ki ’bore/ mo tani ba ki jin ta’da ta mmina a’di mish ’kwaniŋ ḵaniisa ma Arumgimis dhu mo?
6 A’di midi mii diki ta wathi/ jin ta jin this mo jin daḵa bu’th gwo jin gamu is mo haali/ a’di midi ’taki se ki ’pura/ ’pura/ mo ki ’ba/ jin kara a’di ki ca mo, dhali biṯ mo e mo jin waḵu tap̱a ma ruma ’cesh mo.
7 Bahili a’di minu mii maŋ mo ki ’kwani kun ’kon ka pije/ mo haali/ a’di midi ’taki biṯ mo e mo jin waḵuwa waḵ mo dhali eya gume/ gi tap̱a ma ruma ’cesh mo.
Monthum jin Thumkunu mo gom Imanhila Hil mo goma Ḵaniisa mo
8 Wakan si’da/ ’kwani kun dhunu mo mmohil to ma ḵaniisa i e mo tani uni mini mii ḵa/aḵa/ mo, mmo’koki ta gi ’twa/ jin onu gwo isu/ mo, dhali mmo’koki jima su i ’twa/ mo, dhali mmo’koki pur bwa mo goma guurush mo.
9 Uni mini mii bu’th gwo jin c̱inu ki jim bag mo jin gamu is mo ki ’twa/ ma dun dhelelgam buni mo.
10 Dhali uni si’da/ minu mii nyo/i ṯwa/a/ mo. Dhali yan’ko’d waḵki/ uni nyo/u ki is buni mo ki uni ta uni kun dar gi mii ’ba/ mo tani dhalki uni mii to mo me’d uni kun cila to hil mo goma ḵaniisa mo.
11 Wakan si’da/ up̱ mini mii ḵa/aḵa/ mo, mmo’koki thutha thu’th ’pen mo, hili uni mini ta uni kun mini ’tima du mo, mmota uni isiŋ gana/ mo eya ris to ’baar mo be.
12 Dhalki uni kun cila to hil goma ḵaniisa mo ta gi up̱ jasi ’deṯe/ ’deṯe/ mo dhali dhalki uni mish uc̱im buni dhu mo dhali kuŋ gu’b buni ki ’bore/ mo.
13 Haali/ uni gwansan kun miiki to ki ’bore/ mo me’d uni gun cila to hil mo goma ḵaniisa mo tani uni gam ’twa/ maŋ mo gom miiŋ gana/ jin gama uniya du is mo gom is buni mo dhali si’da/ adhan mo jin wunu jwa i is mo e moŋgam gwo is mo, a’di jin diki’d eya Ḵrisṯẖos jin ta’da Yesus mo be.
Gwo jin C̱inu ki jim Bag mo gom ji Luŋ Bana mo
14 Aha/ ṯosha mmop̱u’dku/ i um ki ’dishe/ mo, hili aha/ ’kwarkina um gwo gwansan mo mmoye’th um sho’k mo.
15 Wakan, waḵki/ aha/ takina diiṯe/ mo tani um mini ’taki mish mo mo ki um ḵa ba/ mini ’taki mii mii ki is bum mo me’d uni kun ta kuŋ gu’b ma Arumgimis mo, a’di jin ta’da ḵaniisa jin ta ji ma Arumgimis jin di ki e mo, a’di jin ta’da atiŋkiliŋ mo dhala cur gi gwoŋ gana/ mo be.
16 Ka jiŋ gana/ ana pikina gwo mo gom a’di yansan jin ta dhan gwo jin c̱inu ki jim bag mo jin ta jim bana jin luŋa ana aluŋ mo:
A’di jin ṯorkunu eya tente/ mo e shuman is mo,
dhali a’di jin karkunu ki mo ma ḵar/e e Shi/in mo
dhali a’di jin p̱arkina iman’doyu gwo e mo
dhali a’di jin c̱ikunu gwo mo e bwaman kal gi ’kwaniny’cesh mo
dhali a’di jin gamkina ’kwani gwo is mo e mony’cesh mo
dhali a’di jin bu’thkunu bway momis mo e monyca mo.