Gwo jiŋ ’Ko’d jin ’Kwar ma Buulus goma ṮIMUṮH̱AWUUS mo
1
Monthe Me’d mo
1 ABuulus, a’di jin karu ki she/ mo goma Ḵrisṯẖos jin ta’da Yesus mo ki bwa ma Arumgimis mo isi ki gwo jin onu is mo gom mondiki/e jin di’d eya Ḵrisṯẖos jin ta’da Yesus mo be.
2 Eya Ṯimuṯẖawuus jin ta ya/m pem jin enka/ mo.
A’the dhali momiimii dhali moŋḵu’th is ’peni Arumgimis jin ta’da Baba mo dhala Ḵrisṯẖos jin ta’da Yesus mo jin ta Tap̱am bana mo.
Dhalku/ Is ki ’The mo
3 Aha/ ’bora Arumgimis bwa i is mo, a’di jin miiga/ to mo ki ’twa/ ma dum pem jin dheleladhelel mo, me’d mii jin miikina ibabam pem mo, ki aha/ kakina /e e ki ṯikir ṯikir mo e mon’thom pem mo.
4 Me’d jin kakika/ jabu’th pini e mo tani aha/ ’koshkina ṯe/ /e ki mon’thiny ilu/ mo dhali montee ilu/ mo mmop̱ar /e e mo, ki aha/ minu ’taki ’tu’d mo ki moŋ’kuny bwa mo be.
5 Aha/ rogomkunu ki gwo mo gom moŋgam gwo is pini mo jin dar ki washila/ mo, moŋgam gwo is yan jin c̱a’bki’di ṯwa/a/ mo eya ṯiŋkwan pini jin ta’da Lo/iis mo dhali ata’dam pini jin ta’da Ap̱niiki mo, dhali shwane/ aha/ misha ki isa duŋ gana/ mo ki a’di c̱a’bki’d e /e mo.
6 Me’d jin rogomkika/ /e ki gwo mo mmoṯi’k to jin c̱in ma Arumgimis ki me’d mo, a’di jin di’d e /e mo ki mo jin thulka/ /e me’d pema p̱o/ mo.
7 Haali/ Arumgimis diki c̱i ana shi/in ma shi/iny jwa mo, hili a’di ki c̱i ana shi/in gi mom’bi’th mo dhali mo/en mo dhali mmomisha du ’tim mo.
8 Dhalku/ ki mii ’the is mo mmoc̱i gwo mo gom Tap̱am bana mo, walla gom aha/ mmotaka/ habuus mo, hili budhi isa nyor pini jin pwaḵu /e mo gom gwom ’borga/ mo e mom’bi’th ma Arumgimis mo,
9 a’di jin woṯẖki ana mo dhali yuḵ ana mo ka yuḵ jin ḵogu mo, yisa gom miim bana jin ha me’d mo, hili ki miim piti kun ha me’d mo e ’kup̱ miim pitiŋ gana/ yan mo dhali a’the jin c̱ikina a’di ana mo tani eya Ḵrisṯẖos jin ta’da Yesus mo ki yil ka risi ṯwa/a/ mo,
10 dhali shwane/ a’di ṯoru eya tente/ mo gom is jin piyin ma Manwoṯẖ bana ka pije/ mo a’di jin ta’da Ḵrisṯẖos jin ta’da Yesus mo, a’di jin p̱uuki wu mo dhali ḵalu mondiki/e mo dhali mo jin molu wu mo e moŋkush mo ki gwom ’borga/ mo be.
11 Haali/ gom gwom ’borga/ yansan mo tani aha/ karkunu ’pen ka pije/ mo mmota amanc̱i gwo mo dhali ta a’di jin karu ki she/ mo dhali ta a’di jin ta’da manṯor gwo mo.
12 Dhali wakan aha/ ’koshkina is ka nyor mo me’d jin ’kosha is aha/ ka nyor mo. Hili aha/ dina is ki ’the mo haali/ aha/ misha a’di jin gamka/ gwo is mo dhali aha/ misha ki isa duŋ gana/ ki a’di mishi ji ki ’bore/ ntaga Tee c̱aan mo a’di jin c̱ikika/ a’di mmodhu mo be.
13 Baṯẖi bway pem mo gom gwoŋ ganam pem kun ṯorka/ mo, uni kun ciḵkina /e ’peni aha/ mo e moŋgam gwo is mo dhali e mo/en mo, uni gun ’kon eya Ḵrisṯẖos jin ta’da Yesus mo.
14 Jiyi gwoŋ gana/ mo a’di jin c̱ikunu /e mo mmodhu mo ki Shi/in Dheleladhelel mo a’di jin c̱a’bki’d e bwaman ana mo.
15 /E mishki gwo hila/ mo ka ris uni gwansan kun ’kokin mo e Pa Asiyya mo tani ṯu’kkin mo ’peni aha/ mo dhali e bwam uni gwansan mo tani ta iPijallus mo dhala Harmujanis mo, uni ’kokin mo.
16 Dhalki Tap̱a a’di c̱i momiimii gom kuŋ gu’b ma Unisip̱urus mo haali/ a’di me’d ka ris yeki aha/ ’ba/ mo. A’di yisa ’thena is mo gom mondeḵ pem jin deḵu aha/ ka jindhiir mo,
17 hili ki a’di merki’d mo e Pa Ruumiya mo tani a’di ŋap̱ki’da ŋap̱ mo gom aha/ ki bur bur ka daran du mo dhali a’di gamki aha/ mo be. –
18 Dhalki Tap̱a c̱i a’di mo jin mina a’di gam momiimii mo ’peni Tap̱a mo ’pena Tee c̱aan mo – dhali /e mishkin ki ’bore/ mo aris to kun ḵalkina a’di ki mii mo e Pan Ep̱asus mo be.