3
Ṯikiri Miim ’Borga/ mo kun Miinu mo
1 Rogomi uni ki gwo mo mmo’dap̱ ’twa/ mo e uni kun ta itap̱a mo dhali uni kun ta gi moshirr mo, mmota imanha gwo e mo, dhali mmota uni kun mini thoson is mo gom ma gom miiŋ gana/ mo,
2 mmo’koki o gwon thusa p̱o/ wathin ’deŋ kamu/ mo, mmotheṯẖ mo ’peni ’kwani kun walana le’d ki ṯas ṯas mo, mmota uni gun min ma du ’thup̱ mo dhali mmoṯora dum paŋ gana/ mo e miin taḵ goma ris ’kwani ’baar mo.
3 Haali/ ana ki is bana ’thissa/ nṯwa/a/ mooniin tani takina p̱us mo mmo/ush gwo ha e mo dhali ana suskunu per mo dhali ana takina c̱iŋkina/ ka ris mii kun dhukunu e ki ’thir ’thir mo, haali/ ana ’kona ’ce ki ’kol mo, mmo’baara teem bana mo jin dup̱uwa dup̱ i e mo dhali ki miin dhap̱an mo, dhali ana shinu i e ki ’kwani mo dhali ana shina shi/ i e ka rem ’kup̱ mo.
4 Hili ki miim ’borga/ mo dhali mii kun miinu ki mo/en ki bwaŋkush mo jin ta ji ma Arumgimis mo, a’di jin ta’da Amanwoṯẖ bana mo, piyin mo tani
5 a’di taki ana is ki me’d mo, yisa gom miim ’boro’da kamu/ jin miikina ana ki mii ma ḵar/e mowa, hili ki momiimiim pitiŋ gana/ jin ha me’d mo, ki mii jin lamkunu mo ka dho’th jin dhodhu doḵ/e mo dhali ki mii jin tanu this e Shi/in Dheleladhelel mo tani
6 a’di jin wolkina a’di ap̱o/ ana mo ki ehe/ ka Yesus Ḵrisṯẖos jin ta’da Amanwoṯẖ bana mo be.
7 Wakan ki ana minu ’taki dhu ki mo ma ḵar/e mo ka ’them piti mo dhali ta imanbu’th mal e mo ma ’teŋ kape/ gi moŋ’koki/e ki sule/ sule/ ya ye ’ba/ mo be.
8 Gwo jin onu mo be ta isi gwoŋ gana/ be.
Aha/ ona bwa ki /e mini ṯirrish gwo mo gom to gwansan mo ba/. Wakan ki uni gwansan kun gamki gwo is eya Arumgimis mo tani mini mii mii ka serec̱ mo mmoc̱i is buni mo ki miiŋ gana/ mo. Mii gwansan uni kun ta kum ’borgaŋ gana/ mo dhali ta ku kun mini ha me’d mo gom ’kwani mo be.
9 Hili theṯẖi/ mo ’peni mo jin doṯu/ gwowa doṯ mo kun ta gwom p̱us mo, dhali mo jin beledhu gwo mo, dhali mo jin biruwa bir mo dhali mo jin tanuwa le’d ki ṯas ṯas mo ap̱o/ gwoŋḵan jin c̱inu mo, haali/ uni dar gi shi/ miim ’boro’d mo dhali kun ta kum p̱e’th mo.
10 Haali/ gom wathi/ jin ḵali gwon thus jin ta’da he’k e mo tani ’ko’di a’di rumkunu ki gwo mo me’d ’de/ mo walla me’di su/ mo tani dhalku/ miiŋ kamu/ ki ’dish is mo nyaḵki a’di mo
11 mmomisha /e ki wathi/ gi wakan a’di wuṯulkunu mo dhali ta’da manmii miinthus mo. A’di waḵkunu ki is piti mo be.
Gwo jin Yedhuwa Ye’th Sho’k mo gom ’Kwani ka ’Deṯe/ ’Deṯe/ mo
12 Me’d jin miga/ hashka Artimas mo walla Tiḵikus mo e /e mo tani miiyi ki is pini ki dher mo mmoyayu/ i aha/ mo e Pa Nikubulis mo, haali/ aha/ dikina gwo ibwa mo mmo’baar mondiṯ imun mo be.
13 Miiyi ki miim pini ki dher mo mmoṯora Sinas gwo mo, a’di jin ta’da manmisha jo’d gwoŋḵan mo, dhala Abulluus mo mmo/iiyu/ e bway buni ki jahanne/ mo. Hili uni i e ki ’bore/ mo ki uni mina toŋ kamu/ diki har mo.
14 Dhali dhalki ’kwanim bana da/ar mii mo si’da/ mmoc̱i is buni ki miim ’boro’d mo, wakan ki uni mini woṯẖ miin tiya ’twa/ mo kun mini mii ta gi to mo dhali yisa mmomol maman gana/ dho’th mo.
Mom’bor Mii jin Dhalu Me’da P̱o/ ’Kwani mo
15 Aris uni ’baar mo kun nyaḵki ’ko ki aha/ mo tani hashki /e monthe me’d mo. Theki uni gwansan me’d mo kun enki aman mo e moŋgam gwo is mo be.
A’the midi di e umi ’baar mo.