Muqeddes Kalam (latin yéziq) Ayup 21

Ayup yene söz qilidu — Xudaning jahanni idare qilishi

1 Ayup jawaben mundaq dédi: —

2 «Geplirimge qulaq sélinglar,

Bu silerning manga bergen «teselliliringlar»ning ornida bolsun!

3 Söz qilishimgha yol qoysanglar;

Söz qilghinimdin kéyin, yene mazaq qiliwéringlar!

4 Méning shikayitim bolsa, insan’gha qaritiliwatamdu?

Rohim qandaqmu bitaqet bolmisun?

5 Manga obdan qaranglarchu? Siler choqum heyran qalisiler,

Qolunglar bilen aghzinglarni étiwalisiler.

6 Men bu ishlar üstide oylansamla, wehimige chömimen,

Pütün etlirimni titrek basidu.□

7 Némishqa yamanlar yashiwéridu,

Uzun ömür köridu,

Hetta zor küch-hoquqluq bolidu?■

8 Ularning nesli öz aldida,

Perzentliri köz aldida mezmut ösidu,□

9 Ularning öyliri wehimidin aman turidu,

Tengrining tayiqi ularning üstige tegmeydu.

10 Ularning kaliliri jüplense uruqlimay qalmaydu,

Iniki mozaylaydu,

Moziyinimu tashlimaydu.

11 Reziller kichik balilirini qoy padisidek talagha chiqiriwéridu,

Ularning perzentliri taqlap-sekrep ussul oynap yüridu.

12 Ular dap hem chiltargha tengkesh qilidu,

Ular neyning awazidin shadlinidu.

13 Ular künlirini awatchiliq ichide ötküzidu,

Andin közni yumup achquchila tehtisaragha chüshüp kétidu.□

14 Hem ular Tengrige: «Bizdin néri bol,

Bizning yolliring bilen tonushqimiz yoqtur!» — deydu,■

15 — «Hemmige Qadirning xizmitide bolushning erzigüdek neri bardu?

Uninggha dua qilsaq bizge néme payda bolsun?!».■

16 Qaranglar, ularning bexti öz qolida emesmu?

Biraq yamanlarning nesihiti mendin néri bolsun!□ ■

17 Yamanlarning chirighi qanche qétim öchidu?

Ularni özlirige layiq külpet basamdu?

Xuda ghezipidin ulargha derdlerni bölüp béremdu?■

18 Ular shamal aldidiki éngizgha oxshash,

Qara quyun uchurup kétidighan paxalgha oxshashla yoqamdu?

19 Tengri uning qebihlikini balilirigha chüshürüshke qalduramdu?

Xuda bu jazani uning özige bersun, uning özi buni tétisun!

20 Özining halakitini öz közi bilen körsun;

Özi Hemmige Qadirning qehrini tétisun!□

21 Chünki uning békitilgen yil-ayliri tügigendin kéyin,

U qandaqmu yene öz öydikiliridin huzur-halawet alalisun?

22 Tengri kattilarning üstidinmu höküm qilghandin kéyin,

Uninggha bilim ögiteleydighan adem barmidur?!□ ■

23 Birsi saq-salamet, pütünley ghem-endishsiz, azadilikte yilliri toshqanda ölidu;

24 Béqinliri süt bilen sémiz bolidu,

Ustixanlirining yiliki xéli nem turidu.

25 Yene birsi bolsa achchiq armanda tügep kétidu;

U héchqandaq rahet-paraghet körmigen.

26 Ular bilen bille topa-changda teng yatidu,

Qurutlar ulargha chaplishidu.■

27 — Mana, silerning némini oylawatqanliqinglarni,

Méni qarilash niyetliringlarni bilimen.□

28 Chünki siler mendin: «Ésilzadining öyi nege ketken?

Rezillerning turghan chédirliri nedidur?» dep sorawatisiler.□

29 Siler yoluchilardin shuni sorimidinglarmu?

Ularning shu bayanlirigha köngül qoymidinglarmu?□

30 Démek, «Yaman adem palaket künidin saqlinip qalidu,

Ular ghezep künidin qutulup qalidu!» — deydu.■

31 Kim rezilning tutqan yolini yüz turane eyibleydu?

Kim uninggha öz qilmishi üchün tégishlik jazasini yégüzidu?

32 Eksiche, u heywet bilen yerlikige kötürüp méngilidu,

Uning qebrisi közet astida turidu.

33 Jilghining chalmiliri uninggha tatliq bilinidu;

Uning aldidimu sansiz ademler ketkendek,

Uning keynidinmu barliq ademler egiship baridu.

34 Siler némishqa manga quruq gep bilen teselli bermekchi?

Silerning jawabliringlarda peqet saxtiliqla tépilidu! □

□ 21:6 «Men bu ishlar üstide oylansamla, wehimige chömimen, pütün etlirimni titrek basidu» — Ayupning bundaq qorqup kétishi uning töwendiki sözliri bilen chüshendürülidu. Ayup taki özini palaket basqan’gha qeder Xudani Hemmige Qadir, pütünley adil hem pütünley méhriban dep ishinip kelgenidi. Biraq u emdilikte bashqa bir qorqunchluq éhtimalliqqa yüzlinishke mejbur boluwatatti. Xuda rasttinla adaletlik, rasttinla yaxshimu? Jahandiki bezi ehwallar buninggha tetür guwahliq bériwatqandek qilatti. Yaman ademler béyip kitiwatidu, durus ademler éziliwatidu. Xuda bu ishlargha pisent qilmamdu? U eslide tesewwur qilmighan bu éhtimalliqlar uni hazir intayin qorqitiwatatti. ■ 21:7 Zeb. 17:9-12; 73:12; Yer. 12:1; Hab. 1:16 □ 21:8 «Ularning , yeni yamanlarning nesli öz aldida, perzentliri köz aldida mezmut ösidu» — Ayup Zofarning baya qilghan sözlirini xulase qilip, ulargha reddiye béridu; yamanlar yoqalmaydu, ularning perzentliri «Öz bayliqlirini miskinlerge qayturidu» emes, belki ular öz aldigha rawaj tapidu. □ 21:13 «Ular künlirini awatchiliq ichide ötküzidu, andin közni yumup achquchila tehtisaragha chüshüp kétidu» — Ayup bundaq yamanlar ömürwayet azadilikte yashighandin kéyin héch azablanmay, héch jazalanmay dunyadin kétidu, dewatidu. «Andin közni yumup achquchila tehtisaragha chüshüp kétidu» dégenning bashqa birxil terjimisi: «Ular xatirjemlikte tehtisaragha chüshidu». ■ 21:14 Ayup 22:17 ■ 21:15 Mis. 5:2; Mal. 3:14 □ 21:16 «Qaranglar, ularning bexti öz qolida emesmu?» — bashqa bir xil terjimisi: «Qaranglar, ularning awatliqi öz qoli bilen kelmes» (awatliqi Xudadin kelgen, démekchi). ■ 21:16 Ayup 22:18 ■ 21:17 Ayup 20:29; Zeb. 11:5-6 □ 21:20 «Hemmige Qadirning qehrini tétisun!» — ibraniy tilida «Hemmige Qadirning qehrini ichsun!». □ 21:22 «kattilar» — ibraniy tilida «aliylar». Belkim mushu yerde perishtilerni körsitishi mumkin. «Uninggha bilim ögiteleydighan adem barmidur?!» — Ayup ularning «Yamanlar tézla jazalinidu» dégenlirining natoghriliqini ispatlighanidi. Biraq u hazir: «Silerning bu sözliringlarda ching turiwélishinglar «Xuda bizning pikrimizni anglap andin bu ishlarni shundaq orunlashturushi kérek» dégenlikke barawer» démekchi. ■ 21:22 Yesh. 40:13; Rim. 11:34; 1Kor. 2:16 ■ 21:26 Ayup 17:14 □ 21:27 «... silerning némini oylawatqanliqinglarni, méni qarilash niyetliringlarni bilimen» — dostlirining sözlirining köpinchisi daritma gep; biraq, xéli roshenki, bu yerde Ayupqa qaritip hujum qilinidu. □ 21:28 «Siler mendin: «Ésilzadining öyi nege ketken?» dep sorawatisiler» — ularning mushu «ésilzade» dégini, shübhisizki, Ayupni körsitidu. «Siler mendin: «... Rezillerning turghan chédirliri nedidur?» dep sorawatisiler» — Ayup yene mushu yerde: Silerning bu soalliringlar méni daritip körsitidighanliqini bilimen, dewatidu. □ 21:29 «Siler yoluchilardin shuni sorimidinglarmu?» — Zofar: «Iplaslarning xushalliqi birdemliktur», shundaqla bu ish «yer yüzide Adem’atimiz apiride bolghandin béri» hemme ademge ayan — dégen. Biraq Ayup yiraq yurtlargha bérip kelgenlerning bayanliri bashqiche, deydu. ■ 21:30 Pend. 16:4 □ 21:34 «Siler némishqa manga quruq gep bilen teselli bermekchi? Siler yoluchilardin shuni sorimidinglarmu?» — oqurmenler bayqisunki, Ayupning üch dosti awwal sel éghir-bésiqraq söz qilidu, andin gep qilghanséri achchiq hem telwelik bilen sözleydu; Ayup bolsa awwal intayin telwilerche we jiddiyliqta söz qilghan bolsimu, lékin uning sözliri barghanséri temkin bolidu.