Muqeddes Kalam (latin yéziq) Mikah 6

Bésharetler 3-qatar •••• Xudaning dewasi

1 Perwerdigarning néme dewatqinini hazir anglanglar: —

«Ornungdin tur, taghlar aldida dewayingni bayan qil,

Égizliklerge awazingni anglatqin».□

2 «I taghlar,

We siler, yer-zéminning özgermes ulliri,

Perwerdigarning dewasini anglanglar;

Chünki Perwerdigarning Öz xelqi bilen bir dewasi bar,

U Israil bilen munaziliship eyibini körsetmekchi;■

3 I xelqim, Men sanga zadi néme qildim?

Séni néme ishta bizar qiliptimen?

Méning xataliqim toghruluq guwahliq bérishkin!

4 Chünki Men séni Misir zéminidin élip chiqardim,

Séni qulluq makanidin hörlükke qutquzdum;

Aldingda yétekleshke Musa, Harun we Meryemlerni ewettim.■

5 I xelqim, Perwerdigarning heqqaniyliqlirini bilip yétishinglar üchün,

Moab padishahi Balakning qandaq niyitining barliqini,

Béorning oghli Balaamning uninggha qandaq jawab bergenlikini,

Shittimdin Gilgalghiche néme ishlar bolghanliqini hazir ésinglargha keltürünglar.□ ■

6 — Men emdi némini kötürüp Perwerdigar aldigha kélimen?

Némem bilen Hemmidin Aliy Bolghuchi Xudaning aldida égilimen?

Uning aldigha köydürme qurbanliqlarni,

Bir yilliq mozaylarni élip kélemdim?

7 Perwerdigar minglighan qochqarlardin,

Tümenligen zeytun méyi deryaliridin huzur alamdu?

Itaetsizlikim üchün tunji balamni,

Ténimning pushtini jénimning gunahigha atamdimen!?□

8 I insan, U sanga néme ishning yaxshi ikenlikini körsetti,

Berheq, Perwerdigar sendin néme telep qilghanliqini körsetti —

Adaletni yürgüzüsh,

Méhribanliqni söyüsh,

Séning Xudaying bilen bille kemterlik bilen méngishtin bashqa yene néme ishing bolsun?■

Dewaning dawami, höküm chiqirish

9 Perwerdigarning awazi sheherge xitab qilip chaqiridu;

(Pem-danaliq bolsa naminggha hörmet bilen qaraydu!)

Emdi höküm paliqini we uni Békitkinini anglanglar: —□

10 Rezil ademning öyide rezilliktin alghan bayliqlar yene barmidu?

Kem ölcheydighan yirginchlik ölchem yene barmidu?□

11 Biadil taraza bilen,

Bir xalta saxta taraza tashliri bilen pak bolalamdim?□ ■

12 Chünki sheherning bayliri zorawanliq bilen tolghan,

Uning ahalisi yalghan gep qilidu,

Ularning aghzidiki tili aldamchidur. ■

13 Shunga Men séni urup késel qilimen,

Gunahliring tüpeylidin séni xarabe qilimen.

14 Yeysen, biraq toyunmaysen,

Otturangda ach-boshluq qalidu,

Sen mülküngni élip yötkimekchi bolisen,

Biraq saqliyalmaysen;

Saqlap qaldurghining bolsimu, uni qilichqa tapshurimen.□ ■

15 Tériysen, biraq hosul almaysen;

Zeytunlarni cheyleysen, biraq özüngni méyini sürtüp mesih qilalmaysen,

Yéngi sharabni cheylep chiqirisen,

Biraq sharab ichelmeysen.■

16 Chünki «Omrining belgilimiliri»ni,

«Ahabning jemetidikiler qilghanliri»ni tutisen;

Sen ularning nesihetliride mangisen,

Shuning bilen Men séni xarabe,

Sende turuwatqanlarning hemmisi isqirtish obyékti qilimen;

Sen xelqimdiki shermendichilikni kötürisen.□ ■

□ 6:1 «Ornungdin tur, taghlar aldida dewayingni bayan qil, égizliklerge awazingni anglatqin» — bu sözler Mikahning özige (Israillar anglisun dep) éytilghan. Qedimki taghlar we döng-égizlikler mushu dewada Xudaning wediliride turghanliqigha guwahliq béridu («Qan.» 4:26, «Yesh.» 1:2ni körüng). ■ 6:2 Hosh. 4:1 ■ 6:4 Mis. 12:51; 14:30; 20:2 □ 6:5 «I xelqim... Moab padishahi Balakning qandaq niyitining barliqini, Béorning oghli Balaamning uninggha qandaq jawab bergenlikini, Shittimdin Gilgalghiche néme ishlar bolghanliqini hazir ésinglargha keltürünglar» — Xuda Shittimde Israillarning butpereslikini jazalighan, andin ularni kechürüm qilghan; U Gilgalda möjize yaritip, ularni Iordan deryasidin ötközgen. Emdi hazir oxshash ishlar bolmamdu — ular xalisila, butperesliktin towa qilip, Xudaning nijatini körüdighan bolidu. Tilgha élin’ghan weqeler «Chöl.» 24-, 25-bab, we «Yeshua» 1-5-bablarda xatirilen’gen. ■ 6:5 Chöl. 22:5; 23:7; 25; Ye. 5 □ 6:7 «Ténimning pushtini jénimning gunahigha atamdimen!?» — ibraniy tilida «ténimning méwisini jénimning gunahigha atamdimen!?». ■ 6:8 Qan. 10:12 □ 6:9 «Emdi höküm paliqini we uni békitkinini anglanglar!» — bashqa birxil terjimisi: «Emdi i qebile we sheher jamaiti, anglanglar!». □ 6:10 «Rezil ademning öyide rezilliktin alghan bayliqlar yene barmidu? Kem ölcheydighan yirginchlik ölchem yene barmidu?...» — 10-15-ayetlerde xatirilen’gen Israilning qilmishliri yuqiriqi 8-ayettiki sözning eksi bolidu (adaletni yürgüzüsh, méhribanliqni söyüsh, kemterlerche Xuda bilen bille méngish). Mushu ayettiki «ölchem» ibraniy tilida «efah» bolidu. □ 6:11 «Biadil taraza bilen, bir xalta saxta taraza tashliri bilen pak bolalamdim?» — bashqa birxil terjimisi: «Biadil tarazini, bir xalta saxta taraza tashlirini tutup turghan ademlerni pak hésabliyalamdim?». ■ 6:11 Hosh. 12:8 ■ 6:12 Yer. 9:7 □ 6:14 «Yeysen, biraq toyunmaysen, otturangda ach-boshluq qalidu» — bezi alimlar bu ibare tolghaq késili «dizéntériye»ni körsitidu, dep qaraydu. «Sen mülküngni élip yötkimekchi bolisen, biraq saqliyalmaysen; saqlap qaldurghining bolsimu, uni qilichqa tapshurimen» — bashqa birxil terjimisi: «sen tolghaqqa kélisen, biraq balini tughmaysen; tughsangmu, balangni qilichqa tapshurimen». ■ 6:14 Hosh. 4:10 ■ 6:15 Qan. 28:38; Hag. 1:6 □ 6:16 «Chünki «Omrining belgilimiliri»ni, «Ahabning jemetidikiler qilghanliri»ni tutisen» — Omri Israilning intayin rezil padishahi bolup, nurghunlighan butlarni yasap, Israilni bulargha choqunushqa buyrughan. Ahab uningdin téximu rezillikke ötüp, butpereslikke pahishiwazliq, «insan qurbanliqi», puqralarni bulang-talang qilish we qatilliqni qoshqanidi. («1Pad.» 16-22-bablarni körüng). «Sende turuwatqanlarning hemmisi isqirtish obyékti qilimen» — mushu yerde «isqirtish» mazaq qilishni bildüridu. ■ 6:16 1Pad. 16:25, 26, 30-34