83
83-küy •••• Düshmenlerning suyiqestliri heqqide dua
1 Asafning küy-naxshisi: —
I Xuda, ün chiqarmay turuwalma,
Jim turuwalma, süküt qilip turuwalma, i Tengrim!
2 Chünki mana, Séning düshmenliring dawrang qilmaqta,
Sanga öchmenler bash kötürmekte.
3 Ular quwluq bilen Séning xelqingge suyiqest qilidu,
Séning himaye qilip qedirligenliring bilen qarshilishishni meslihetlishidu.
4 Ular: — «Yürünglar, ularni millet qataridin yoq qilayli!
Israilning nami ikkinchi tilgha élinmisun!» — démekte.
5 Ular hemnepes, hemdil meslihetleshti;
Ular Sanga qarshi ittipaq tüzdi.
6 Mana, Édom we Ismaillarning chédirliri,
Moab hem Hagriylar;
7 Gebal, Ammon, we Amalek;
Filistiye hemde Tur ahaliliri,
8 Asuriyemu ulargha qoshuldi;
Ular Lut oghullirigha yar-yölek bolup kelgen.
Sélah.
9 Sen Kishon deryasida Midiyaniylargha,
Siséragha we Yabin’gha qandaq taqabil turghan bolsang,
Ularghimu shundaq qilghaysen;
10 Bular En-Dor yézisida qirilghanidi,
Yer üchün tizek-oghutqa aylan’ghanidi.
11 Ularning emirlirini Oreb we Zéebke,
Ularning dahiylirini Zebah hem Zalmunnagha oxshash qilghaysen;
12 Chünki ular: «Xudaning chimen-yaylaqlirini özimizge mülük qiliwalayli!» — dep éytqan.
13 I Xudayim, ularni domilinidighan qamghaqtek,
Shamalda uchurulghan saman kebi soruwetkeysen.
14 Ot ormanliqqa tutashqan’gha oxshash,
Yalqun taghlarni köydürgen’ge oxshash,
15 Sen yene ularni borining bilen qoghlighaysen,
Qara quyuning bilen wehimige salghaysen;
16 Ularning Séning namingni izdishi üchün,
Ularning yüzlirini sherm-haya bilen chömdürgeysen, i Perwerdigar!
17 Ular nomustin ebediy shermende bolsun,
Jahan’gha reswa bolup yoqitilsun.
18 Ular bilsunki,
Naming Perwerdigar bolghan Senla pütkül jahandiki Eng Aliy Bolghuchidursen.