Muⱪeddes Kalam (yǝngi yeziⱪ) Yǝxaya 15

Moab toƣruluⱪ bir bexarǝt

1 Moab toƣrisida yüklǝngǝn wǝⱨiy;

Ⱨalakǝtlik bir kǝqtila, Moabtiki Ar xǝⱨiri wǝyran ⱪilinidu;

Ⱨalakǝtlik bir kǝqtila, Moabtiki Kir xǝⱨiri yoⱪ ⱪilinidu;■

2 Yiƣa-zarlar kɵtürüx üqün,

Mana u buthanisiƣa, Dibonƣa, xundaⱪla barliⱪ egizliklirigǝ qiⱪti;

Moab Nebo wǝ Mǝdǝba xǝⱨǝrliri üqün pǝryad kɵtüridu;

Ⱨǝmmǝ baxlar taⱪir kɵrünidu,

Jimiki saⱪallar kesilip qüxürüldi.□ ■

3 Koqilarda ular bɵz kiyidu;

Ɵgziliridǝ, mǝydanlirida, ⱨǝrbir adǝm kɵz yaxlirini yaƣdurup pǝryad kɵtüridu.

4 Ⱨǝxbonƣa, Elealaⱨ xǝⱨǝrlirigǝ yiƣa olixidu,

Awazliri Yaⱨaz xǝⱨirigimu yetip baridu.

Xunga Moabning ǝskǝrlirimu nida ⱪilidu;

Uning wujud-baƣrini titrǝk basidu.

5 Mening ⱪǝlbimmu Moab üqün yiƣa-zar kɵtüridu;

Ularning ⱪaqⱪunliri Zoarƣa ⱨǝm Əglat-Xeli-Xijaƣa bǝdǝr ⱪaqidu;

Mana ular toplixip, yiƣliƣan peti Luⱨitⱪa qiⱪidiƣan dawan yoli bilǝn yuⱪiriƣa mangidu,

Ⱨoronaimƣa qüxidiƣan yolda turup ⱨalakǝttin nalǝ-zar kɵtüridu.

6 Qünki Nimrimdiki sular ⱪurup ketidu,

Ot-qɵplǝr solixip,

Gül-giyaⱨ tügǝp ketidu;

Ⱨeq yap-yexilliⱪ ⱪalmaydu.□

7 Xunga ular bayliⱪliri, tapⱪan-tǝrginini yiƣip «Tǝrǝk wadisi»din ɵtmǝkqi bolidu;

8 Ularning kɵtürgǝn yiƣisi Moabning qegrasiƣa,

Aⱨu-zarliri ǝglaimƣa,

Piƣanliri Bǝǝr-elimƣa yetidu.

9 Dimonning suliri ⱪanƣa tolup ketidu,

Qünki Dimonning üstigǝ tehimu kɵp balayi’apǝtni toplaymǝn;

Qünki Moabning ⱪaqⱪunliri ⱨǝm zeminida ⱪalƣanliriningmu üstigǝ bir xirni ǝwǝtimǝn.□

■ 15:1 Yǝr. 48:1; Əz. 25:9; Am. 2:1 □ 15:2 «Mana u buthanisiƣa, Dibonƣa... qiⱪti» — baxⱪa birhil tǝrjimisi: — «Mana u Bajit, Dibon degǝn jaylarƣa, ... qiⱪti». Muxu ayǝttǝ Yǝxaya Moabiylarning buthanilirida wǝ butⱪa qoⱪunidiƣan «egizlik»liridǝ dua ⱪilixlirining bikar bolidiƣanliⱪini kɵrsitidu. «ⱨǝmmǝ baxlar taⱪir kɵrünidu, jimiki saⱪallar kesilip qüxürüldi» — qaq qüxürüx wǝ saⱪal yulux ⱪattiⱪ ⱨǝsrǝt, puxayman ⱪilixni yaki matǝm tutuxnimu bildürǝtti. ■ 15:2 Yǝr. 48:37; Əz. 7:18 □ 15:6 «Ularning ⱪaqⱪunliri Zoarƣa ⱨǝm ǝglat-xeli-xijaƣa bǝdǝr ⱪaqidu (5-ayǝt) ...qünki Nimrimdiki sular ⱪurup ketidu...» — biliximizqǝ 5- wǝ 6-ayǝttiki xǝⱨǝrlǝr (Zoar, Nimrim ⱪatarliⱪlar) Moabning jǝnubiy tǝripidǝ. Ar, kir, Nebo, Mǝdǝba bolsa ximaliy tǝripidǝ. Ⱪariƣanda bolidiƣan ⱨujum ximal tǝrǝptin kǝlgǝqkǝ, ular jǝnubiy tǝrǝpkǝ ⱪaqidu. Asuriyǝ Moabƣa ikki ⱪetim ⱨujum ⱪildi, miladiyǝdin ilgiriki 715- wǝ -711-yilida. □ 15:9 «Dimon» — bǝlkim «Dibon» (1-ayǝt) bilǝn ohxax boluxi mumkin, yǝrliklǝr Dibonni bǝlkim «Dimon» dǝp atixi mumkin. «xir» — kǝlgüsidǝ Moabⱪa tajawuz ⱪilidiƣan (1) Asuriyǝ padixaⱨini yaki (2) Babil padixaⱨini kɵrsitidu.