25
Hudani mǝdⱨiyilǝydiƣan, ahirⱪi zamandiki nahxa
1 Pǝrwǝrdigar, Sǝn mening Hudayim;
Mǝn Seni üstün dǝp mǝdⱨiyilǝymǝn,
Mǝn Sening namingni mubarǝklǝymǝn,
Qünki Sǝn karamǝt ixlarni,
Sadiⱪliⱪ wǝ ⱨǝⱪiⱪǝt iqidǝ ⱪǝdimdin buyan ⱪǝlbinggǝ pükkǝnliringni bǝja kǝltürgǝnsǝn.
2 Qünki Sǝn xǝⱨǝrni harabilik,
Ⱪǝl’ǝ-ⱪorƣanliⱪ yurtni harab,
Yatlarning ordisini xǝⱨǝr bolalmas ⱪilƣansǝn,
U ikkinqi ⱨǝrgiz ⱪurulmaydu.
3 Xunga ⱨeliⱪi küqlük hǝlⱪ Seni uluƣlaydu,
Əxǝddiy ǝllǝrning ⱨeliⱪi xǝⱨiri Sǝndin ⱪorⱪidu;
4-5 Qünki Sǝn miskinlǝrgǝ ⱪorƣan,
Yoⱪsullarning dǝrdi-ⱨajitigǝ ⱪorƣan,
Boranƣa dalda,
Issiⱪⱪa sayǝ bolƣansǝn;
Qünki ǝxǝddiylǝrning zǝrbǝ dolⱪuni tamƣa urulƣan borandǝk,
Ⱪaƣjiraⱪ yǝrni basⱪan issiⱪ ⱨawadǝk boldi.
Biraⱪ issiⱪ ⱨawa bulut sayisi bilǝn tosulƣandǝk,
Sǝn yatlarning quⱪan-sürǝnlirini pǝsǝytisǝn;
Əxǝddiylǝrning ƣǝlibǝ nahxisi pǝs ⱪilinidu.
6 Wǝ muxu taƣda samawi ⱪoxunlarning Sǝrdari bolƣan Pǝrwǝrdigar barliⱪ ⱪowmlar üqün ziyapǝt ⱪilidu —
Mayliⱪ yemǝkliklǝr,
Süzdürülgǝn kona xarablar,
Yiliki toⱪ mayliⱪ yemǝkliklǝr,
Süzdürülgǝn, yahxi saⱪlanƣan kona xarablardin bolƣan ziyapǝt bolidu;
7 Wǝ U muxu taƣda ⱨǝmmǝ ⱪowmlarni yapidiƣan qümpǝrdini,
Barliⱪ ǝllǝrni yapidiƣan yapⱪuqni yoⱪitidu;
8 U ɵlümni mǝnggügǝ yutup yoⱪitidu!
Rǝb Pǝrwǝrdigar ⱨǝrbir yüzdiki yaxlarni sürtiwetidu;
Pütkül yǝr-zemin aldida Ɵz hǝlⱪining xǝrmǝndilikini elip taxlaydu;
Qünki Pǝrwǝrdigar xundaⱪ eytⱪan.
9 Wǝ xu künidǝ deyiliduki: —
«Mana, Hudayimiz muxu, biz Uningƣa tǝlmürüp kǝlgǝn,
U bizni ⱪutⱪuzidu;
Mana, muxu Pǝrwǝrdigardur, biz Uningƣa tǝlmürüp kǝlgǝn,
Biz xadlinip Uning nijat-ⱪutulduruxidin hursǝn bolimiz».
10 Qünki muxu taƣⱪa Pǝrwǝrdigarning ⱪoli ⱪonup turidu;
Wǝ saman azgalda tezǝk bilǝn qǝylǝngǝndǝk, Moab Uning putliri astida qǝylinidu;
11 Moab axu tezǝklik azgaldin üzüp qiⱪix üqün ⱪolini keridu,
Biraⱪ uning ⱪoli qewǝr bolƣini bilǝn, Rǝb uning tǝkǝbburluⱪini pǝs ⱪilidu.
12 U sepilliringning egiz mudapiǝlik ⱪorƣanlirini ƣulitip,
Yǝr bilǝn yǝksan ⱪilip,
Topa-qangƣa aylanduridu.