☰ Yǝxaya 6
6
Hudaning Yǝxayani pǝyƣǝmbǝr ⱪilip qaⱪirixi
1 Uzziya padixaⱨ alǝmdin ɵtkǝn yili mǝn Rǝbni kɵrdüm;
U intayin yuⱪiri kɵtürülgǝn bir tǝhttǝ olturatti;
Uning toni muⱪǝddǝs ibadǝthaniƣa bir kǝlgǝnidi. ■
2 Uning üstidǝ saraflar pǝrwaz ⱪilip turatti;
Ⱨǝrbirining altǝ tal ⱪaniti bar idi;
Ikki ⱪaniti bilǝn u yüzini yapatti,
Ikki ⱪaniti bilǝn u putini yapatti,
Wǝ ikki ⱪaniti bilǝn u pǝrwaz ⱪilip turatti.□  ■
3 Ulardin biri baxⱪa birsigǝ: — «Samawi ⱪoxunlarning Sǝrdari bolƣan Pǝrwǝrdigar, muⱪǝddǝs, muⱪǝddǝs, muⱪǝddǝstur!
Barliⱪ yǝr yüzi uning xan-xǝripigǝ tolƣan!» — dǝp towlawatatti.□  ■
4 Towliƣuqining awazidin dǝrwazining kexǝkliri tǝwrinip kǝtti,
Ɵy is-tütǝk bilǝn ⱪaplandi.
5 Xuning bilǝn mǝn: — «Ɵzümgǝ way! Mǝn tügǝxtim! Qünki mǝn lǝwliri napak adǝmmǝn ⱨǝm napak lǝwlik hǝlⱪ bilǝn arilixip turup, ɵz kɵzüm bilǝn Padixaⱨⱪa, yǝni samawi ⱪoxunlarning Sǝrdari bolƣan Pǝrwǝrdigarƣa ⱪaridim!» — dedim.□
6 Xuning bilǝn saraflardin biri ⱪolida ⱪurbangaⱨtin bir qoƣni lahxigirƣa ⱪisip elip, yenimƣa uqup kǝldi; 7 u uni aƣzimƣa tǝgküzüp: — «Mana, bu lǝwliringgǝ tǝgdi; sening ⱪǝbiⱨliking elip taxlandi, gunaⱨing kafarǝt bilǝn kǝqürüm ⱪilindi» — dedi.□  ■
8 Andin mǝn Rǝbning: — «Mǝn kimni ǝwǝtimǝn? Kim Bizgǝ wǝkil bolup baridu?» degǝn awazini anglidim.
Xuning bilǝn mǝn: — «Mana mǝn! Meni ǝwǝtkǝysǝn» — dedim.
9 Wǝ U: «Barƣin; muxu hǝlⱪⱪǝ mundaⱪ dǝp eytⱪin: — «Silǝr anglaxni anglaysilǝr, biraⱪ qüxǝnmǝysilǝr;
Kɵrüxni kɵrüsilǝr, biraⱪ bilip yǝtmǝysilǝr. ■
10 Muxu hǝlⱪning yürikini tax ⱪilƣin;
Ularning ⱪulaⱪlirini eƣir,
Kɵzlirini kor ⱪilƣin;
Bolmisa, ular kɵzliri bilǝn kɵrǝlǝydiƣan,
Ⱪuliⱪi bilǝn angliyalaydiƣan,
Kɵngli bilǝn qüxinǝlǝydiƣan ⱪilinip,
Yolidin yandurulup saⱪaytilƣan bolatti».□  ■
11 Andin mǝn: — «Rǝb, bu ǝⱨwal ⱪaqanƣiqǝ dawamlixidu?» — dǝp soriwidim,
U jawabǝn: — «Ta xǝⱨǝrlǝr harab ⱪilinip aⱨalisiz,
Ɵylǝr adǝmzatsiz,
Zemin pütünlǝy qɵlgǝ aylinip bolƣuqǝ,□
12 Pǝrwǝrdigar adǝmlirini yiraⱪlarƣa yɵtkǝp,
Zemindiki taxliwetilgǝn yǝrlǝr kɵp bolƣuqǝ bolidu» — dedi.
13 «Ⱨalbuki, zeminda adǝmlǝrning ondin birila ⱪalidu;
Ular zeminƣa ⱪaytip kelip yǝnǝ yutuwetilidu,
Kesilgǝn bir dub yaki arar dǝrihining kɵtikidǝk bolidu;
Kɵtǝk bolsa «muⱪǝddǝs nǝsil» bolur. □
 
 
■ 6:1 2Pad. 15:7 □ 6:2 «Saraflar» — ibraniy tilidiki sɵz bolup, «kɵygüqilǝr» «kɵyiwatⱪanlar» degǝnni bildüridu. Ibraniy tilidiki muxu kɵplük isim bolsa «üq yaki üqtin kɵp»ni bildüridu. Xübⱨisizki, ular birhil pǝrixtidur. Ular az degǝndǝ üq bolidu, biraⱪ zadi ⱪanqisi barliⱪini bilmǝymiz. ■ 6:2 Wǝⱨ. 4:8 □ 6:3 «...muⱪǝddǝs, muⱪǝddǝs, muⱪǝddǝstur» — ibraniy tilida bir süpǝt ikki ⱪetim tǝkralansa, intayin yuⱪiri dǝrijidǝ bolƣanliⱪni bildüridu. Pütkül Muⱪǝddǝs Kitabta mǝlum bir süpǝtning üq ⱪetim tǝkrarlinixi pǝⱪǝt muxu yǝrdila tepilidu; Hudaning pak-muⱪǝddǝsliki, xübⱨisizki, «mukǝmmǝl, insan tǝssǝwur ⱪilƣusiz dǝrijǝ»dǝ bolƣanliⱪini bilduridu. ■ 6:3 Wǝⱨ. 4:8 □ 6:5 «Mǝn tügǝxtim!» — ibraniy tilida bir sɵz bilǝnla ipadilinidu wǝ «mǝn parqǝ-parqǝ ⱪilindim!» ⱨǝm «mǝn süküttǝ turƣuzuldum» degǝnnimu ipadilǝydu. □ 6:7 «... gunaⱨing kafarǝt bilǝn kǝqürüm ⱪilindi» — «kafarǝt» toƣruluⱪ «Mis.» 25:17 wǝ izaⱨati, xundaⱪla «Tǝbirlǝr»nimu kɵrüng. ■ 6:7 Yǝr. 1:9; Dan. 10:16 ■ 6:9 Mat. 13:14; Mar. 4:12; Luⱪa 8:10; Yⱨ. 12:40; Ros. 28:26; Rim. 11:8 □ 6:10 «Muxu hǝlⱪning yürikini tax ⱪilƣin» — «yüriki tax» degǝn sɵz, ibraniy tilida «yüriki mayliⱪ» dǝp elinƣan. «Kɵzlirini kor ⱪilƣin; bolmisa, ular kɵzliri bilǝn kɵrǝlǝydiƣan, ... yolidin yandurulup saⱪaytilƣan bolatti» — muxu ⱪorⱪunqluⱪ sɵzlǝrgǝ ⱪariƣanda, Yǝxaya mǝzkur kitabtiki bexarǝtlǝrni yǝtküzgǝndin keyin uning nǝtijisi xundaⱪ eqinixliⱪ boliduki, Israillarning kɵpinqisi ɵz gunaⱨlirida tehimu qing turup, ⱨalak bolux yolini tallaydiƣan bolidu. ■ 6:10 Yǝr. 5:21 □ 6:11 «Zemin pütünlǝy qɵlgǝ aylinip bolƣuqǝ,...» — «zemin» Israil turuwatⱪan zeminni kɵrsitidu. □ 6:13 «muⱪǝddǝs nǝsil» — Hudaƣa sadiⱪ bolƣan, yuⱪirida deyilgǝn «ⱪaldi», yǝni Hudaning mɵmin bǝndilirini, Hudaƣa sadiⱪ bolƣanlarni kɵrsitidu.
☰