☰ Ayup 16
16
Ayup yǝnǝ jawab beridu — Ərxtǝ turidiƣan Guwaⱨqi
1 Andin Ayup jawabǝn mundaⱪ dedi: —
2 Mǝn muxundaⱪ gǝplǝrni kɵp angliƣanmǝn;
Silǝr ⱨǝmminglar azab yǝtküzidiƣan ajayib tǝsǝlli bǝrgüqi ikǝnsilǝr-ⱨǝ!■
3 Mundaⱪ watildap ⱪilƣan gǝpliringlarning qeki barmu?
Silǝrgǝ mundaⱪ jawab berixkǝ zadi nemǝ ⱪutratⱪuluⱪ ⱪildi?
4 Halisamla ɵzüm silǝrgǝ ohxax sɵz ⱪilalayttim;
Silǝr mening ornumda bolidiƣan bolsanglar,
Mǝnmu sɵzlǝrni baƣlaxturup eytip, silǝrgǝ zǝrbǝ ⱪilalaytim,
Beximnimu silǝrgǝ ⱪaritip qayⱪiyalayttim!
5 Ⱨalbuki, mǝn ǝksiqǝ aƣzim bilǝn silǝrni riƣbǝtlǝndürǝttim,
Lǝwlirimning tǝsǝllisi silǝrgǝ dora-dǝrman bolatti.
6 Lekin mening sɵzlixim bilǝn azabim azaymaydu;
Yaki gepimni iqimgǝ yutuwalisammu, manga nemǝ aramqiliⱪ bolsun?
7 Biraⱪ U meni ⱨalsizlandürüwǝtti;
Xundaⱪ, Sǝn pütkül ailǝmni wǝyran ⱪiliwǝtting!□
8 Sǝn meni ⱪamalliding!
Xuning bilǝn ǝⱨwalim manga guwaⱨliⱪ ⱪilmaⱪta;
Mening oruⱪ-ⱪaⱪxal bǝdinim ornidin turup ɵzümni ǝyiblǝp guwaⱨliⱪ ⱪilidu!□
9 Uning ƣǝzipi meni titma ⱪilip,
Meni ow oljisi ⱪilidu;
U manga ⱪarap qixini ƣuqurlitidu;
Mening düxminimdǝk kɵzini alayitip manga tikidu.□  ■
10  Adǝmlǝr manga ⱪarap mazaⱪ ⱪilixip aƣzini aqidu;
Ular nǝprǝt bilǝn mǝngzimgǝ kaqatlaydu;
Manga ⱨujum ⱪilay dǝp sǝp tüzidu.
11  Huda meni ǝskilǝrgǝ tapxurƣan;
Meni rǝzillǝrning ⱪoliƣa taxliwǝtkǝnikǝn.
12  Əslidǝ mǝn tinq-amanliⱪta turattim, biraⱪ u meni paqaⱪlidi;
U boynumdin silkip bitqit ⱪiliwǝtti,
Meni Ɵz nixani ⱪilƣanikǝn.■
13  Uning oⱪyaqiliri meni ⱪapsiwaldi;
Ⱨeq ayimay U üqǝy-baƣrimni yirtip,
Ɵtümni yǝrgǝ tɵküwǝtti.
14  U u yǝr-bu yerimgǝ üsti-üstilǝp zǝhim ⱪilip bɵsüp kiridu;
U palwandǝk manga ⱪarap etilidu.
15  Terǝmning üstigǝ bɵz rǝht tikip ⱪoydum;
Ɵz izzǝt-ⱨɵrmitimni topa-qangƣa selip ⱪoydum.□
  ■
16-17 Gǝrqǝ ⱪolumda ⱨeqⱪandaⱪ zorawanliⱪ bolmisimu,
Duayim qin dilimdin bolƣan bolsimu,
Yüzüm yiƣa-zaridin ⱪizirip kǝtti;
Ⱪapaⱪlirimni ɵlüm sayisi basti.□
18  Aⱨ, yǝr-zemin, ⱪenimni yapmiƣin!
Nalǝ-pǝryadim tohtaydiƣanƣa jay bolmiƣay!□
19  Biraⱪ mana, asmanlarda ⱨazirmu manga xaⱨit Bolƣuqi bar!
Ərxlǝrdǝ manga kapalǝt Bolƣuqi bar!
20  Ɵz dostlirim meni mazaⱪ ⱪilƣini bilǝn,
Biraⱪ kɵzüm tehiqǝ Tǝngrigǝ yax tɵkmǝktǝ.□
21  Aⱨ, insan balisi dosti üqün kelixtürgüqi bolƣandǝk,
Tǝngri bilǝn adǝm otturisidimu kelixtürgüqi bolsidi!■
22  Qünki yǝnǝ birnǝqqǝ yil ɵtüxi bilǝnla,
Mǝn barsa ⱪaytmas yolda mengip ⱪalimǝn.□
 
 
■ 16:2 Ayup 13:4 □ 16:7 «Biraⱪ U meni ⱨalsizlandürüwǝtti; xundaⱪ, Sǝn pütkül ailǝmni wǝyran ⱪiliwǝtting! — 8 wǝ 9-ayǝttiki «U» wǝ «Sǝn» Hudani kɵrsitidu. □ 16:8 «Sǝn meni ⱪamalliding!» — yaki: «Sǝn meni ⱪurutuwǝtting!». «Xuning bilǝn ǝⱨwalim manga guwaⱨliⱪ ⱪilmaⱪta!» — Ayupning xu biqarǝ ǝⱨwali: «Sǝn qoⱪum eƣir bir gunaⱨ ⱪilƣansǝn, bolmisa bu külpǝt bexingƣa qüxmigǝn bolatti» dǝp ɵzigǝ guwaⱨliⱪ ⱪilƣandǝk ⱪilidu. □ 16:9 «Uning ƣǝzipi meni titma ⱪilip,...» — yaki «U tumxuⱪi bilǝn meni titma ⱪilip,...». Muxu yǝrdǝ Ayup Hudani ɵzigǝ yirtⱪuq ⱨaywandǝk zǝrbǝ ⱪiliwatidu, dǝp eytmaⱪqi. ■ 16:9 Ayup 10:16,17; 13:24 ■ 16:12 Ayup 7:20; Yiƣ. 3:12 □ 16:15 «Terǝmning üstigǝ bɵz rǝht tikip ⱪoydum; ɵz izzǝt-ⱨɵrmitimni topa-qangƣa selip ⱪoydum» — bu ayǝttiki «bɵz rǝht» ⱪǝdimki zamanlarda adǝmning ⱪattiⱪ matǝm tutux, puxayman ⱪilix yaki towa ⱪilixinimu ipadilǝytti. Muxu yǝrdǝ, xübⱨisizki, «matǝm tutux»ni bildürmǝkqi. «Ɵz izzǝt-ⱨɵrmitimni topa-qangƣa selip ⱪoydum» degini ibraniy tilida «Münggüzümni topa-qangƣa selip ⱪoydum» degǝnliktur. Kalining yaki buⱪining münggüzi adǝmning küq-ⱪudriti ⱨǝm abruyining simwoli bolidu. ■ 16:15 Ayup 30:19 □ 16:16-17 «Ⱪapaⱪlirimni ɵlüm sayisi basti» — yaki «Zulmǝtlik ⱪarangƣuluⱪ sayisi basti». □ 16:18 «Nalǝ-pǝryadim tohtaydiƣanƣa jay bolmiƣay!» — demǝk, «Ijabǝt bolmiƣuqǝ pǝryadim ⱨǝrdaim ⱨǝm Hudaƣa ⱨǝm adǝmlǝrgǝ awariqilik bolsun». □ 16:20 «Ɵz dostlirim meni mazaⱪ ⱪilƣini bilǝn...» — ayǝtning birinqi ⱪismining yǝnǝ birhil tǝrjimisi, «Manga wakalǝt bolƣuqi mening dostum ikǝn». ■ 16:21 Ayup 31:35; Top. 6:10; Yǝx. 45:9; Rim. 9:20 □ 16:22 «Yǝnǝ birnǝqqǝ yil ɵtüxi bilǝnla, mǝn barsa ⱪaytmas yolda mengip ⱪalimǝn» — Ayup bǝzidǝ «bu dunyadin pat arida ketimǝn» dǝp, bǝzidǝ «birnǝqqǝ yil azablar meni kütidu» dǝp oylaydu. U birinqi imkaniyǝtni nisbǝtǝn yahxi dǝp ⱪaraydu, ǝlwǝttǝ.
☰