☰ Ayup 22
22
Elifaz yǝnǝ sɵz ⱪilidu: — •••• Hata pǝrǝzlǝr — Ayupⱪa ⱪaritilƣan ⱨujumlar
1 Andin Temanliⱪ Elifaz mundaⱪ dedi: —
2 Adǝm Hudaƣa ⱪandaⱪmu payda kǝltürǝlisun?
Dana adǝmlǝrmu Uningƣa nemǝ payda kǝltürǝlisun?
3 Sǝn ⱨǝⱪⱪaniy bolsangmu, Ⱨǝmmigǝ Ⱪadirƣa nemǝ bǝⱨrǝ berǝlǝytting?
Yolliring ǝyibsiz bolƣan tǝⱪdirdimu, sǝn Uningƣa nemǝ ƣǝniymǝtlǝrni elip kelǝlǝysǝn?□
4 Uning seni ǝyiblǝydiƣanliⱪi,
Wǝ Uning sanga xikayǝtlǝr yǝtküzidiƣini sening ihlasmǝn bolƣining üqünmu-ya?
5 Sening rǝzilliking zor ǝmǝsmu?
Sening gunaⱨliring ⱨesabsiz ǝmǝsmu?
6 Sǝn ⱪerindaxliringdin sǝwǝbsiz kepillik alƣansǝn;
Sǝn yalangtüxlǝrni kiyim-keqǝkliridin mǝⱨrum ⱪiliwǝtkǝnsǝn.■
7 Ⱨalsizlanƣanlarƣa su bǝrmiding,
Aq ⱪalƣanlarƣa axnimu ayap bǝrmiding,
8 Gǝrqǝ sǝn yǝr-zeminlik bolƣan ⱪoli uzun adǝm bolsangmu,
Yǝr-zemin tutup ⱨɵrmǝtlinip kǝlgǝn adǝm bolsangmu,
9 Sǝn tul hotunlarnimu ⱪuruⱪ ⱪol yandurƣansǝn,
Yetim-yesirlarning ⱪolinimu yanjitiwǝtkǝnsǝn.□
10  Mana xu sǝwǝbtin ǝtrapingda tuzaⱪlar yatidu,
Uxtumtut pǝyda bolƣan wǝⱨimimu seni basidu.
11  Xu sǝwǝbtinmu seni ⱪarangƣuluⱪ besip kɵrǝlmǝs ⱪildi,
Bir kǝlkün kelip seni ƣǝrⱪ ⱪildi.
12  Tǝngri ǝrxalaning qoⱪⱪisida turidu ǝmǝsmu?
Əng egiz yultuzlarning nǝⱪǝdǝr aliy ikǝnlikigǝ ⱪarap baⱪ!
13  Biraⱪ sǝn: «Tǝngri nemini bilidu?
U rast xunqǝ zulmǝt ⱪarangƣuluⱪta birnemini pǝrⱪ etǝlǝmdu?!» dǝwatisǝn.
14  Yǝnǝ: «Ⱪoyuⱪ bulutlar uni tosiwalidu,
Xunga U pǝlǝk üstidǝ aylinip mangƣinida bizni kɵrmǝydu!» — dǝysǝn.
15  Yaman adǝmlǝr mangƣan kona yolni sǝnmu tutiwerǝmsǝn?
16  Ular waⱪti toxmay turupla elip ketilgǝn,
Ularning ulliri kǝlkün tǝripidin eⱪitilip ketilgǝn.□
17  Ular Tǝngrigǝ: «Bizdin neri bol!»
Ⱨǝmmigǝ Ⱪadir bizni nemǝ ⱪilalisun?» — dǝytti.■
18  Biraⱪ ularning ɵylirini esil nǝrsilǝr bilǝn toldurƣan dǝl Uning Ɵzidur,
Mǝn bolsam yamanlarning nǝsiⱨitidin yiraⱪlaxⱪanmǝn!□  ■
19  Ⱨǝⱪⱪaniylar ularning bǝrbat bolƣanliⱪini kɵrüp xadlinidu;
Bigunaⱨlar ularni mazaⱪ ⱪilip: — ■
20  «Bizgǝ ⱪarxi qiⱪⱪuqilar xübⱨisiz wǝyran bolidu,
Ot ularning bayliⱪlirini yutuwǝtmǝmdu?» — dǝydu.
21  Xunga Hudaƣa boysunup Uni tonusang,
Xu qaƣdila sǝn aman bolisǝn;
Xuning bilǝn sanga amǝt kelidu.
22  Uning aƣzidin kǝlgǝn nǝsiⱨǝtnimu ⱪobul ⱪil,
Uning sɵzlirini kɵnglünggǝ püküp ⱪoy.□
23  Sǝn Ⱨǝmmigǝ Ⱪadirning yeniƣa ⱪaytip kǝlsǝng, muⱪǝrrǝrki,
Ⱪaytidin ⱪurulup qiⱪalaysǝn;
Əgǝr sǝn ⱪǝbiⱨlikni qedirliringdin yiraⱪlaxtursang,■
24  Əgǝr sǝn altunungni topa-qang üstigǝ taxliyalisang,
Ofirdiki altunungni xiddǝtlik eⱪinning taxliriƣa ⱪoxuwǝtsǝng,□
25  Undaⱪta Ⱨǝmmigǝ Ⱪadirning Ɵzi sanga altun bolidu.
Sening üqün sǝrhil kümüxmu bolidu.
26  U qaƣda sǝn Ⱨǝmmigǝ Ⱪadirdin sɵyünisǝn,
Yüzüngni Tǝngrigǝ ⱪarap kɵtürǝlǝysǝn.
27  Sǝn Uningƣa dua ⱪilsang, U ⱪulaⱪ salidu,
Xundaⱪla sǝnmu iqkǝn ⱪǝsǝmliringgǝ ǝmǝl ⱪilisǝn.
28  Sǝn ⱪarar ⱪilƣan ix ǝmǝlgǝ axidu,
Yolliring üstigǝ nur qüxidu.
29  Adǝmlǝr pǝs ⱪilinƣanda, sǝn ularƣa: «Ornunglardin turunglar!» dǝysǝn,
Xuning bilǝn Huda qirayi sunƣanlarni ⱪutⱪuzidu.■
30  U ⱨǝtta gunaⱨi bar adǝmnimu ⱪutⱪuzidu,
U ⱪolungdiki ⱨalalliⱪtin ⱪutⱪuzulidu. □
 
 
□ 22:3 «... Yolliring ǝyibsiz bolƣan tǝⱪdirdimu, sǝn uningƣa nemǝ ƣǝniymǝtlǝrni elip kelǝlǝysǝn?» — 1-bab, 8-ayǝttǝ, Hudaning Ayuptin alƣan raziliⱪi, hursǝnliki naⱨayiti roxǝn bayan ⱪilinidu. Yǝnǝ kelip, Tǝwratning «Yaritilix» degǝn ⱪismida biz Hudaning insanlarning gunaⱨlliri tüpǝylidin bolƣan intayin azablinidiƣanliⱪi toƣrisida hǝwǝrdar bolimiz. Xunga Elifazning 2-ayǝt wǝ 3-ayǝttiki bu sɵzlirining tolimu hata ikǝnlikini biliximiz lazim. ■ 22:6 Mis. 22:26, 27; Ⱪan. 24:6, 10-13 □ 22:9 «Sǝn ... yetim-yesirlarning ⱪolinimu yanjitiwǝtkǝnsǝn» — xuni qongⱪur qüxiniximiz kerǝkki, Elifazning bu xikayǝtliri pütünlǝy asassizdur. □ 22:16 «Ular waⱪti toxmay turupla ..., ularning ulliri kǝlkün tǝripidin eⱪitilip ketilgǝn» — bu yǝrdǝ Nuⱨ pǝyƣǝmbǝrning dǝwridǝ topan eⱪitip kǝtkǝn rǝzil adǝmlǝr kɵrstilgǝn boluxi mumkin. ■ 22:17 Ayup 21:14 □ 22:18 «Ularning ɵylirini esil nǝrsilǝr bilǝn toldurƣan dǝl uning ɵzidur» — Elifaz muxu yǝrdǝ Ayupning «Yamanlar bǝzidǝ beyip awatlixidu» degǝn pikrining toƣriliⱪini azraⱪ ⱪobul ⱪilƣandǝk ⱪilƣini bilǝn yǝnila: «Yamanlar tez bǝrbat bolidu» dǝydu. ■ 22:18 Ayup 21:16 ■ 22:19 Zǝb. 107:42 □ 22:22 « Hudaning aƣzidin kǝlgǝn nǝsiⱨǝtnimu ⱪobul ⱪil,...» — Elifaz ɵzining baya degǝn gǝplirini «Hudaning aƣzidin kǝlgǝn nǝsiⱨǝt» dǝp ⱪarisa kerǝk. ■ 22:23 Ayup 8:5, 6 □ 22:24 «Əgǝr sǝn ... Ofirdiki altunungni xiddǝtlik eⱪinning taxliriƣa ⱪoxuwǝtsǝng» — Elifaz bǝlkim Ayupni altunlarƣa intayin aq kɵz adǝm dǝp ⱪaraydu. Uning bu sɵzlirining nurƣun adǝmlǝrgǝ payda yǝtküzǝlǝydiƣini bilǝn, Ayup aq kɵz adǝm bolmiƣaqⱪa, uningƣa ⱨeq yardǝm bǝrmǝydu. Bu ayǝttǝ deyilgǝn «Ofirdiki altun» naⱨayiti esil bir hil altunni kɵrsitidu. ■ 22:29 Pǝnd. 29:23 □ 22:30 «U ⱨǝtta gunaⱨi bar adǝmnimu ⱪutⱪuzidu, u ⱪolungdiki ⱨalalliⱪtin ⱪutⱪuzulidu» — ⱪiziⱪ ix xuki, Elifazning ɵzi ahirda Ayupning duasi arⱪiliⱪ ⱪutⱪuzulidu (42-bab).
☰