☰ Ayup 37
37
Elihuning tɵtinqi bayanining dawami — Hudaning karamǝt ǝmǝllirini kɵrsǝtkǝnlirini ayan ⱪilix •••• Ⱪara ⱪuyunning yeⱪinlixixi
1 Xundaⱪ, yürikimmu buni anglap tǝwrinip ketiwatidu,
Yürikim ⱪepidin qiⱪip ketǝy, dedi.
2 Mana angliƣina! Uning ⱨɵrkirigǝn awazini,
Uning aƣzidin qiⱪiwatⱪan güldürmama awazini angla!□  ■
3 U awazini asman astidiki pütkül yǝrgǝ,
Qaⱪmiⱪini yǝrning ⱪǝrigiqǝ yǝtküzidu.
4 Qaⱪmaⱪtin keyin bir awaz ⱨɵrkirǝydu;
Ɵz ⱨǝywitining awazi bilǝn u güldürlǝydu,
Awazi anglinixi bilǝnla ⱨeq ayanmay qaⱪmaⱪlirinimu ⱪoyuwetidu.
5 Tǝngri awazi bilǝn karamǝt güldürlǝydu,
Biz qüxinǝlmǝydiƣan nurƣun ⱪaltis ixlarni ⱪilidu.■
6 Qünki u ⱪarƣa: «Yǝrgǝ yaƣ!»,
Ⱨǝm ⱨɵl-yeƣinƣa: «Küqlük yamƣur bol!» dǝydu.■
7 U barliⱪ insanni ɵzining yaratⱪanliⱪini bilsun dǝp,
Ⱨǝmmǝ adǝmning ⱪolini bular bilǝn tosup ⱪoyidu;□
8 Yawayi ⱨaywanlar ɵz uwisiƣa kirip ketidu,
Ɵz ⱪonalƣusida turƣuzulidu.
9 Boran-qapⱪun koⱨiⱪaptin kelidu,
Ⱨǝm soƣuⱪ-zimistan taratⱪuqi xamallardin kelidu.□
10 Tǝngrining nǝpisi bilǝn muz ⱨasil bolidu;
Bipayan sular ⱪetip ⱪalidu.■
11 U yǝnǝ ⱪoyuⱪ bulutlarƣa mol nǝmlik yüklǝydu,
U qaⱪmaⱪ kɵtüridiƣan bulutni kǝng yeyip ⱪoyidu.
12 Ular pütkül yǝr-zemin yüzidǝ U buyruƣan ixni ijra ⱪilix üqün,
Uning yolyoruⱪliri bilǝn ⱨǝryaⱪⱪa burulidu.
13 Yaki tǝrbiyǝ tayiⱪi boluxi üqün,
Yaki Ɵz dunyasi üqün,
Yaki Ɵz rǝⱨimdillikini kɵrsitix üqün U bulutlirini kǝltüridu.□  ■
14 I Ayup, buni anglap ⱪoy,
Tǝngrining karamǝt ǝmǝllirini tonup yetip xük tur.□
15 Tǝngrining bulutlarni ⱪandaⱪ sǝptǝ turƣuzƣanliⱪini bilǝmsǝn?
Uning bulutining qaⱪmiⱪini ⱪandaⱪ qaⱪturidiƣanliⱪinimu bilǝmsǝn?
16 Bulutlarning ⱪandaⱪ ⱪilip boxluⱪta muǝllǝⱪ turidiƣanliⱪini,
Bilimi mukǝmmǝl Bolƣuqining karamǝtlirini bilǝmsǝn?
17 Ⱨǝy, Uning ⱪandaⱪ ⱪilip yǝr-zeminni jǝnubdiki xamal bilǝn tinqlandurup,
Seni kiyim-keqikingning ottǝk issitⱪinini bilǝmsǝn?
18 Sǝn Uningƣa ⱨǝmraⱨ bolup asmanni huddi ⱪuyup qiⱪarƣan ǝynǝktǝk,
Mustǝⱨkǝm ⱪilip yayƣanmiding?!■
19 Uningƣa nemini deyiximiz kerǝklikini bizgǝ ɵgitip ⱪoyƣin!
Ⱪarangƣuluⱪimiz tüpǝylidin biz dǝwayimizni jayida sǝpkǝ ⱪoyalmaymiz.
20 Uningƣa «Mening Sanga gepim bar» deyix yahximu?
Undaⱪ degüqi adǝm yutulmay ⱪalmaydu!
21-23 Əmdi xamallar kelip bulutlarni tarⱪitiwetidu,
Biraⱪ bulutlar arisidiki ⱪuyax nuriƣa adǝmlǝr biwasitǝ ⱪarap turalmaydu.
Ⱪuyaxning altun rǝnggi ximal tǝrǝptinmu pǝyda bolidu;
Tǝngrining ⱨuzurida dǝⱨxǝtlik ⱨǝywǝt bardur.
Ⱨǝmmigǝ Ⱪadirni bolsa, biz Uni mɵlqǝrliyǝlmǝymiz;
Ⱪudriti ⱪaltistur, Uning adaliti uluƣ, ⱨǝⱪⱪaniyliⱪi qongⱪur,
Xunga U adǝmlǝrgǝ zulum ⱪilmaydu.□  ■
24  Xunga adǝmlǝr Uningdin ⱪorⱪidu;
Kɵnglidǝ ɵzini dana qaƣlaydiƣanlarƣa U ⱨeq etibar ⱪilmaydu».□
 
 
□ 37:2 «Uning aƣzidin qiⱪiwatⱪan güldürmama awazi» — ibraniy tilida «Uning aƣzidin qiⱪiwatⱪan ƣurⱪiraxliri» yaki «Uning aƣzidin qiⱪiwatⱪan gürgirǝxliri». ■ 37:2 Zǝb. 29:3-4 ■ 37:5 Ayup 5:9; 9:10; 36:26 ■ 37:6 Zǝb. 147:16 □ 37:7 «U ⱨǝmmǝ adǝmning ⱪolini bular bilǝn tosup ⱪoyidu» — ⱪar yaki ⱪattiⱪ yamƣur yaƣsa, adǝmlǝr hizmǝt ⱪilixⱪa sirtⱪa qiⱪalmaydu, yawayi ⱨaywanlarmu qiⱪalmaydu. Biz bu addiy ixtin sawaⱪ eliximiz kerǝk. Biz «Ⱨǝmmigǝ Ⱪadir» ǝmǝsmiz, ⱪolimiz ⱨǝm bilimimiz qǝklik, Hudaning zor küq-ⱪudriti aldida kǝmtǝrlǝxkinimiz tüzük. □ 37:9 «taratⱪuqi xamallar...» — bu sɵz bǝlkim mǝlum bir xamalning mǝhsus atalƣusi boluxi kerǝk. Baxⱪa bir hil tǝrjimisi «Soƣuⱪ-zimistan ximaldin kelidu». ■ 37:10 Ayup 38:29, 30; Zǝb. 147:17, 18 □ 37:13 «Yaki tǝrbiyǝ tayiⱪi boluxi üqün, yaki Ɵz dunyasi üqün, yaki Ɵz rǝⱨimdillikini kɵrsitix üqün u bulutlirini kǝltüridu» — Elihuning «yaki Ɵz dunyasi üqün» degǝn bu ibarisi sǝl sirliⱪ. Yaƣidiƣan yamƣurning «tǝrbiyǝ tayiⱪi boluxi üqün» yaki «Ɵz rǝⱨimdilliⱪini kɵrsitix üqün» degǝnning mǝniliri eniⱪ, biraⱪ «Ɵz dunyasi üqün» nemini kɵrisitdu? Hudaning mǝⱪsǝtliri awwalⱪi birinqisi ⱨǝm ikkinqisidǝ insanlarƣa mǝrkǝzlǝxkǝn bolup, Hudaning «Ɵz dunyasi üqün» degǝn mǝⱪsitini uning Ɵz dunyasidin ⱨuzur elixi üqün desǝk bolamdu-bolmamdu? Hudaning ⱨǝrbir ⱪilidiƣan Ixi insanlar üqünla boluxi kerǝkmu? — keyinki bablarda Hudaning insanlar bilǝn biwasitǝ munasiwiti yoⱪ birⱪanqǝ ixliri tilƣa elinidu. Mundaⱪ ixlarning alaⱨidiliki toƣruluⱪ «ⱪoxumqǝ sɵz»imizdǝ azraⱪ sɵzlǝymiz. ■ 37:13 Mis. 9:18,23; 1Sam. 12:18,19; Əzra 10:9; Ayup 36:31 □ 37:14 «I Ayup, buni anglap ⱪoy, Tǝngrining karamǝt ǝmǝllirini tonup yetip xük tur» — bǝlkim u Ayupni ularning üstidiki boran-qapⱪunning karamǝtlirini bayⱪaxⱪa ündǝydu. ■ 37:18 Yar. 1:6 □ 37:21-23 «Əmdi xamallar kelip bulutlarni tarⱪitiwetidu, biraⱪ bulutlar arisidiki ⱪuyax nuriƣa adǝmlǝr biwasitǝ ⱪarap turalmaydu» — Elihuning bu sɵzimu sirliⱪ. Tǝrjimǝ ⱪilix tǝs bolƣini bilǝn, xǝrⱨimizqǝ u Ayupning ǝⱨwalini ⱨazirⱪi bu bulutluⱪ, tutuⱪ (boran-qapⱪunluⱪ) küngǝ ohxatmaⱪqi bolsa kerǝk. Huda bulutlarni tarⱪitip tuyuⱪsiz kɵrünsǝ, Ayup ⱪuyaxⱪa biwasitǝ ⱪariyalmiƣanƣa ohxax uningƣimu ⱪariyalmaytti, demǝkqi. Biraⱪ Hudaning ⱨǝywiti, kɵrkǝmliki ⱨǝmmǝ tǝrǝptin, ⱨǝtta ximal tǝripidin pǝyda bolidu, dǝydu. Elihuning bayanining baxⱪa hil mǝnilirimu bar boluxi mumkin. ■ 37:21-23 Ayup 9:4; 12:13, 16; 36:5; Zǝb. 93:1; 99:4 □ 37:24 «Xunga adǝmlǝr Uningdin ⱪorⱪidu; kɵnglidǝ ɵzini dana qaƣlaydiƣanlarƣa U ⱨeq etibar ⱪilmaydu» — baxⱪa ikki hil tǝrjimisimu bar: — «Xunga adǝmlǝr Uningdin ⱪorⱪidu; U kɵnglidǝ danaliⱪ barlarƣa etiwar ⱪilamdu?» wǝ yaki «Xunga, adǝmlǝr, Uningdin ⱪorⱪunglar! Xübⱨisizki, kɵnglidǝ danaliⱪ barlar Uningdin ǝyminidu!».
☰