☰ Batur Ⱨakimlar 15
15
Ximxonning Filistiylǝr bilǝn ⱪarxilixixⱪa baxlixi
1 Əmma birnǝqqǝ waⱪit ɵtüp buƣday orux mǝzgili kǝlgǝndǝ xundaⱪ boldiki, Ximxon bir oƣlaⱪni elip ɵz ayalining ɵyigǝ berip: «Mǝn hotunumning ⱪexiƣa uning ⱨujrisiƣa kirimǝn» dedi. Lekin ayalining atisi uni iqkirigǝ kirixigǝ yol ⱪoymidi. 2 Ⱪeynatisi uningƣa: — Mǝn ⱨǝⱪiⱪǝtǝn sizni uningƣa mutlǝⱪ ɵq bolup kǝtti, dǝp oylidim; xunga mǝn uni sizning ⱪoldixingizƣa beriwǝtkǝnidim. Ⱨalbuki, uning kiqik singlisi uningdin tehimu qirayliⱪⱪu? Uning orniƣa xuni alƣan bolsingiz! — dedi.□
3 Əmma Ximxon ularƣa: — Əmdi mǝn bu ⱪetim Filistiylǝrgǝ ziyan yǝtküzsǝm, manga gunaⱨ bolmaydu! — dedi.
4 Xuni dǝp Ximxon berip üq yüz qilbɵrini tutup kelip, otⱪaxlarni tǝyyarlap, qilbɵrilǝrni jüplǝp ⱪuyruⱪlirini bir-birigǝ qetip, ikki ⱪuyriⱪining otturisiƣa birdin otⱪaxni asti; □ 5 otⱪaxlarƣa ot yeⱪip qilbɵrilǝrni elip berip, Filistiylǝrning etizdiki ormiƣan ziraǝtlirigǝ ⱪoyup bǝrdi. Xuning bilǝn u dɵwǝ-dɵwǝ ɵnqilǝrni, orulmiƣan ziraǝtlǝrni, xundaⱪla zǝytun baƣlirinimu kɵydürüwǝtti. □ 6 Filistiylǝr buni kɵrüp: Buni kim ⱪildi, — dǝp sorisa, hǝlⱪ jawab berip: — Timnaⱨliⱪ adǝmning küy’oƣli Ximxon ⱪildi; ⱪeynatisi uning ayalini uning ⱪoldixiƣa beriwǝtkini üqün xundaⱪ ⱪildi, — dedi. Xuning bilǝn Filistiylǝr qiⱪip, u ayal bilǝn atisini otta kɵydürüwǝtti.
7 Ximxon ularƣa: — Silǝr xundaⱪ ⱪilƣininglar üqün, mǝn silǝrdin intiⱪam almay boldi ⱪilmaymǝn, — dedi.
8 Xuning bilǝn Ximxon ularni ⱪir-qap ⱪilip ⱪǝtl ⱪiliwǝtti; andin u berip Etam ⱪoram texining ɵngkiridǝ turdi.□
9 U waⱪitta Filistiylǝr qiⱪip, Yǝⱨuda yurtida qedir tikip, Leⱨi degǝn jayda yeyildi. □ 10 Yǝⱨudalar bolsa: — Nemixⱪa bizgǝ ⱨujum ⱪilmaⱪqi bolisilǝr? — dewidi, ular jawab berip: — Biz Ximxonni tutup baƣlap, u bizgǝ ⱪandaⱪ ⱪilƣan bolsa, bizmu uningƣa xundaⱪ ⱪilimiz, dǝp qiⱪtuⱪ, — dedi.
11 Xuning bilǝn Yǝⱨuda yurtidiki üq ming kixi Etam ⱪoram texining ɵngkirigǝ qüxüp, Ximxonƣa: — Sǝn Filistiylǝrning üstimizdin ⱨɵküm sürüwatⱪinini bilmǝmsǝn? Xuni bilip turup, sǝn nemixⱪa bizgǝ xundaⱪ ⱪilding? — dedi. U ularƣa: — Ular manga ⱪilƣandǝk, mǝnmu ularƣa ⱪildim, dǝp jawab bǝrdi.
12 Ular uningƣa: — Biz seni baƣlap Filistiylǝrning ⱪoliƣa tapxurup berix üqün kǝlduⱪ, dewidi, Ximxon ularƣa: — «Biz ɵzimiz sanga ⱨujum ⱪilip ɵltürmǝymiz», dǝp manga ⱪǝsǝm ⱪilinglar, dedi.
13 Ular uningƣa: — Seni ɵltürmǝymiz; pǝⱪǝt seni qing baƣlap, ularning ⱪoliƣa tapxurup berimiz; ⱨǝrgiz ɵlümgǝ mǝⱨkum ⱪilmaymiz, dǝp jawab bǝrdi. Xuni dǝp ular ikki yengi arƣamqa bilǝn uni baƣlap, ⱪoram taxning üstidin elip mangdi. 14 U Leⱨigǝ kǝlgǝndǝ, Filistiylǝr warⱪiraxⱪiniqǝ uning aldiƣa yügürüxüp kǝldi. Əmma Pǝrwǝrdigarning Roⱨi uning üstigǝ qüxüp, ⱪollirini baƣliƣan arƣamqilar ot tutaxⱪan kǝndir yiptǝk üzülüp, tügüqlǝr ⱪolliridin yexilip kǝtti. 15 Andin u exǝkning yengi bir engǝk sɵngikini kɵrüp, ⱪolini uzitipla elip, uning bilǝn ming adǝmni urup ɵltürdi.□
16 Ximxon: —
«Exǝkning bir engǝk sɵngiki bilǝn adǝmlǝrni ɵltürüp,
Ularni dɵwǝ-dɵwǝ ⱪiliwǝttim,
Exǝkning bir engǝk sɵngiki bilǝn ming adǝmni ɵltürdüm!» — dedi.□
17 Bularni dǝp exǝkning engǝk sɵngikini taxliwǝtti. Xuningdǝk u xu jayƣa «Ramot-Leⱨi» dǝp nam ⱪoydi.□
18 U intayin ussap Pǝrwǝrdigarƣa pǝryad ⱪilip: — Sǝn Ɵz ⱪulungning ⱪoli bilǝn bunqǝ qong nusrǝtni barliⱪⱪa kǝltürdüng, ǝmdi mǝn ⱨazir ussuzluⱪtin ɵlüp, hǝtnisizlǝrning ⱪoliƣa qüxüp ⱪalarmǝnmu? — dedi.■
19 Xuning bilǝn Huda leⱨidiki azgalni yardi, su uningdin urƣup qiⱪti. Ximxon iqip, roⱨi urƣup jan kirdi. Bu sǝwǝbtin bu bulaⱪⱪa «Ən-Ⱨakkorǝ» dǝp nam ⱪoyuldi; ta bügüngiqǝ u Leⱨida bar.□
20 Ximxon Filistiylǝrning dǝwridǝ yigirmǝ yilƣiqǝ Israilƣa ⱨakim boldi.□
 
 
□ 15:2 «...uni sizning ⱪoldixingizƣa beriwǝtkǝnidim» — yaki «uni sining aƣinǝnggǝ beriwǝtkǝnidim». □ 15:4 «üq yüz qilbɵrǝ» — bǝzi tǝrjimilǝrdǝ «üq yüz tülkǝ» deyilidu. Lekin qilbɵrilǝr top bolup yürgǝqkǝ, azraⱪ gɵxni yǝmqük ⱪilix bilǝn ularni tutiwelix tülkilǝrni tutuwelixtin kɵp asan bolidu. □ 15:5 «etizdiki ormiƣan ziraǝtliri» — ibraniy tilida «etizdiki ɵrǝ turƣan ziraǝtliri» — demǝk, pixay dǝp ⱪalƣan ziraǝtlǝr. □ 15:8 «Ximxon ularni ⱪir-qap ⱪilip ⱪǝtl ⱪiliwǝtti» — ibraniy tilida «Ximxon ularni yota wǝ paqaⱪliriƣa urup, ularni ɵltürüwǝtti». □ 15:9 «Leⱨi degǝn jayda yeyildi» — yaki «Leⱨi degǝn jayda jǝnggǝ sǝp tüzdi». □ 15:15 «u exǝkning yengi bir engǝk sɵngikini kɵrüp...» — kona sɵngǝk bolƣan bolsa, qürüklikidin asanla sunup kǝtkǝn bolatti. □ 15:16 «Ularni dɵwǝ-dɵwǝ ⱪiliwǝttim» — yaki «Ularni ikki dɵwǝ ⱪiliwǝttim». Bu xeirdin ⱪariƣanda, Ximxon ikki yaki uningdin kɵp ⱪetim Filistiylǝr bilǝn soⱪuxⱪan boluxi mumkin. □ 15:17 «Ramot-Leⱨi» — «Leⱨining egizliki». ■ 15:18 1Sam. 17:26, 36; 2Sam. 1:2 □ 15:19 «Ən-Ⱨaⱪⱪorǝ» — «pǝryad kɵtürgüqining buliⱪi». □ 15:20 «Ximxon .... yigirmǝ yilƣiqǝ Israilƣa ⱨakim boldi» — Ximxonning ⱨakim bolƣan waⱪti bǝlkim Abimǝlǝk wǝ Yǝftaⱨning ⱨɵküm sürgǝn waⱪitliri bilǝn zamandax bolsa kerǝk; u Pǝlǝstinning ƣǝrbidǝ, ular xǝrⱪ wǝ ximalida ⱨɵküm sürǝtti.
☰