3
Yaxlarƣa sǝmimiy agaⱨlandurux
1 I oƣlum, tǝlimimni untuma,
Degǝnlirimni ⱨǝmixǝ kɵnglüngdǝ qing tut.
2 Qünki u sanga bǝrikǝtlik künlǝr, uzun ɵmür wǝ hatirjǝmlik ⱪoxup beridu.
3 Meⱨriban wǝ ⱨǝⱪ-sǝmimiy boluxtin waz kǝqmǝ,
Bularni boynungƣa esiwal,
Ⱪǝlbinggǝ pütüwal.
4 Xundaⱪ ⱪilƣanda Huda wǝ bǝndilǝrning nǝziridǝ iltipatⱪa layiⱪ bolisǝn, danixmǝn ⱨesablinisǝn.
5 Ɵz ǝⱪlinggǝ tayanmay, Pǝrwǝrdigarƣa qin ⱪǝlbing bilǝn tayanƣin;
6 Ⱪandaⱪla ix ⱪilsang, Pǝrwǝrdigarni tonuxⱪa intil;
U sanga toƣra yollarni kɵrsitidu.
7 Ɵzüngni ǝⱪilliⱪ sanima;
Pǝrwǝrdigardin ǝyminip, yamanliⱪtin yiraⱪ bol.
8 Xundaⱪ ⱪilƣiningda, bu ixlar dǝrdinggǝ dǝrman,
Ustihanliringƣa yilik bolidu.
9 Pǝrwǝrdigarning ⱨɵrmitini ⱪilip mal-dunyayingdin ⱨǝdiyǝlǝrni sunƣin,
Etizingdin tunji qiⱪⱪan mǝⱨsulatliringdin Uningƣa atiƣin;
10 Xundaⱪ ⱪilƣiningda, ambarliring axliⱪⱪa tolup taxidu,
Xarab kɵlqǝkliringdǝ yengi xarab exip-texip turidu.
11 I oƣlum, Pǝrwǝrdigarning tǝrbiyisigǝ bipǝrwaliⱪ ⱪilma,
Uning tǝnbiⱨidin bǝzmǝ.
12 Qünki, ata ǝziz kɵrgǝn oƣliƣa tǝnbiⱨ-tǝrbiyǝ bǝrgǝndǝk,
Pǝrwǝrdigar kimni sɵygǝn bolsa uningƣa tǝnbiⱨ-tǝrbiyǝ beridu.
13 Danaliⱪⱪa muyǝssǝr bolƣan kixi,
Yoruⱪluⱪⱪa igǝ bolƣan kixi nemidegǝn bǝhtlik-ⱨǝ!
14 Qünki danaliⱪning paydisi kümüxning paydisidin kɵptur,
Ⱪimmiti sap altunningkidinmu ziyadidur.
15 U lǝǝl-yaⱪutlardin ⱪimmǝtliktur,
Intizar bolƣan ⱨǝrⱪandaⱪ nǝrsǝngdin ⱨeqbirimu uningƣa tǝng kǝlmǝstur.
16 Danaliⱪning ong ⱪolida uzun ɵmür,
Sol ⱪolida bayliⱪ wǝ xɵⱨrǝt bardur.
17 Uning yolliri sanga hux puraⱪ tuyulur,
Uning barliⱪ tǝriⱪiliri seni aram tapⱪuzur.
18 U ɵzini tapⱪan adǝmgǝ «ⱨayatliⱪ dǝrihi»dur,
Uni qing tutⱪan kixi nemidegǝn bǝhtlik!
19 Pǝrwǝrdigar danaliⱪ bilǝn yǝr-zeminni bǝrpa ⱪildi,
Ⱨekmǝt bilǝn asmanni ornatti.
20 Uning bilimi bilǝn yǝrning qongⱪur ⱪatlamliri yerildi,
Ⱨǝmdǝ bulutlardin xǝbnǝm qüxti.
21 I oƣlum! Danaliⱪ bilǝn bilimni kɵzüngdin qiⱪarma,
Pixⱪan ⱨekmǝt wǝ pǝm-parasǝtni qing tut.
22 Xuning bilǝn ular jeningƣa jan ⱪoxidu,
Boynungƣa esilƣan esil marjandǝk sanga güzǝllik ⱪoxidu.
23 Xu qaƣda yolungda aman-esǝn mangalaysǝn,
Yolda putlaxmaysǝn.
24 Yatⱪanda ⱨeq nemidin ⱪorⱪmaysǝn,
Yetixing bilǝnla tatliⱪ uhlaysǝn.
25 Bexingƣa dǝⱨxǝtlik wǝⱨimǝ qüxkǝndǝ ⱪorⱪmiƣin,
Rǝzillǝrning wǝyranqiliⱪidin ƣǝm ⱪilmiƣin!
26 Qünki Pǝrwǝrdigar sening tayanqingdur,
U putungni ⱪapⱪanlardin neri ⱪilidu.
27 Pǝⱪǝt ⱪolungdin kǝlsila, ⱨajǝtmǝnlǝrdin yahxiliⱪni ayimiƣin.
28 Ⱪolum-ⱪoxniliring seningdin ɵtnǝ sorap kirsǝ, «Ⱪaytip ketip, ǝtǝ kǝlgin, ǝtǝ berǝy» — demigin.
29 Ⱪoxnangƣa ziyankǝxlik niyitidǝ bolma,
Qünki u sanga ixinip yeningda hatirjǝm yaxaydu.
30 Birsi sanga ziyan yǝtküzmigǝn bolsa,
Uning bilǝn sǝwǝbsiz majiralaxma.
31 Zulumhor kixigǝ ⱨǝsǝt ⱪilma,
Uning yol-tǝdbirliridin ⱨeqnemini tallima.
32 Qünki ⱪingƣir yollarni mangidiƣanlar Pǝrwǝrdigarning nǝziridǝ yirginqliktur,
Lekin Uning sirdax dostluⱪi durus yaxawatⱪan adǝmgǝ tǝǝlluⱪtur.
33 Pǝrwǝrdigarning lǝniti rǝzillik ⱪilƣuqining ɵyididur,
Lekin U ⱨǝⱪⱪaniy adǝmning ɵyigǝ bǝht ata ⱪilur.
34 Bǝrⱨǝⱪ, mǝshirǝ ⱪilƣuqilarni U mǝshirǝ ⱪilidu,
Lekin kiqik peil kixilǝrgǝ xǝpⱪǝt kɵrsitidu.
35 Danalar xɵⱨrǝtkǝ warisliⱪ ⱪilidu,
Lekin ⱨamaⱪǝtlǝr rǝswa ⱪilinidu.